▪ Jehovakwe kukwe biani nuaindre juta Israel ie yebätä kukwe ne biani nuaindre ietre arato: “Mä ñaka rabadre kukwe ükete jire niaratre [juta mä bäre] yebe ja mika gure ye kräke. Mä ñaka rabadre mä ngängän ye bien niara ngobo yei, aune mä ñaka rabadre niara ngängän den mä ngobo kräke” (Deuteronomio 7:3, 4). ¿Ñobätä kukwe ne ñäkäibare ietre?

Kena, Satana töi nämene nitre jökrä juta Israel yekänti töi kwitai ne kwe rabadre ngöbö ngwarbe mike täte ye nämene gare kwin Jehovai. Ngöbökwe mikani gare, nitre Israel ye käkwe ja mikadre gure nitre ñaka niara mike täte yebe angwane, nitre ye kämikaikä niarabätä aune rabai ngöbö ngwarbe mike täte. Niaratre kukwe ye erere nuaindre aune kukwe keta kabre tare rabadre bare bätätre. Ngöbökwe ñaka niaratre kadre ngäbiti aune kriemikadre ye ngwane, niaratre rabadre nuäre töi kwitadre nitre rüere yei. Kukwe ye rabadre bare angwane, ¿ñokänti juta Israel ye köböire Mesías käbämikani ye rükadre? Ye medenbätä Satana tö namani nitre Israel töi kwitai ja mike gure nitre ñaka Ngöbö mike täte yebe.

Ne madakäre, nitre Israel itire itire yebätä Ngöbö töi nämene. Nitre itire itire ye rabadre ja mäke kwin niarabe ye aibe köböire rabadre nüne kwin aune kä jutobiti ye nämene gare ie. Nitre ñaka Ngöbö mike täte ben niaratre ja mikadre gure abokän raba töi kwite yebätä Jehová töi nämene krubäte, ¿ye kwin o käme? Töbike rei Salomón yebätä. Meritre ñaka Ngöbö mike täte ben ja mikadre gure ye köböite kukwe tare raba nemen bare ye nämene gare kwin niarai, ñobätä ñan aune Jehovakwe mikani gare: “Niaratre mun töi mikai ngöbö kwetre ye mike täte”. Akwa yebiti ta, Salomón namani nütüre niara töbätä yebätä kukwe ye erere ñaka rabai barebätä. Ye medenbätä Ngöbökwe kukwe mikani gare ye ñaka kukwe nuabare jire kwe. ¿Ye köböite dre namani barebätä? “Bätärekä jatäri meritre ben niara ja mikani gure yekwe niara brukwä mikani [...] ngöbö mada mike täte.” ¡Kukwe tare krubäte namani bare! Jehová ñaka namanina Salomón kain ngäbiti aune, niarakwe ñaka Ngöbö mikani täte ye köböite, gobran namani ñäkäninbiti jene jene (1 Reyes 11:2-4, 9-13).

Nitre jökräbätä kukwe ñaka namani bare Salomón ye erere nitre ruäre raba niere. Ñodre, Mahlón ja mikani gure meri nünanka Moab kädeka nämene Rut yebe, meri ye käkwe Ngöbö mikani metre täte. Akwa erametre ja mika nämene gure meri nünanka Moab ben ye köböite kukwe tare nämene nemen bare. Mahlón kukwe nuainbare ye käikitaka ñaka Bibliabätä. Rut jämi Jehová mike Ngöbö jakwe ye känenkri, Mahlón nämene bati ye ngwane krütani raba ruin nie. Niara eteba Kilión, ye ja mikani gure Orpá ben, meri nünanka Moab abokän käkwe ñaka “ngöbö kwe” tuanimetre. Akwa, Rut ja mikani kukwebätä ye bitikäre kä nikani ruäre ta yete Boaz ja mikani gure ben. Ye bitikäre nitre nünanka Judá ie Rut namani tuin “meri ñaka Judio töi metre” ye kwrere. Rut aune Boaz ja mikani gure ye köböire kukwe kwin krubäte namani bare niaratre kräke (Rut 1:4, 5, 15-17; 4:13-17).

Kukwe ne jökrä nikwe ngwandre törö jai angwane, ¿ni raba niere Mahlón aune Rut kukwe nuainbare ye käkwe ñaka Jehová kukwe niebare nuaindre ye mikani ütiäte jai? Nikwe töbikadre ye erere angwane, nita ja töi mike ni ngwian ganainkä lotería yebiti kätä niere lotería ye kwin ngwian ganainkäre nünankäre jai ye kwrere. Kukwe nieta ye ñaka ütiäte ¿ñan ererea?

Nitre kristiano kä nengwane ye rabadre ja mike gure “ni tödekaka Jesubti aibe ben” nieta Bibliakwe. Ne madakäre, tä mike mokre ñaka “ja kete nitre ñaka kukwebätä nibe yebe”. Kukwe ne nieta nitre kristiano metre tö ja mikai gure yei. Akwa, nire nire niena gure ni ñaka kukwebätä ben, yebätä Biblia tä mäträre ne kwe kukwe tare rabadre kisete ye ngwane kukwe kwin rabadre bare kräketre (1 Corintios 7:12-16, 39; 2 Corintios 6:14). Kukwe nieta ne jökrä tä mike gare, Jehová ja mika gure Ükatekä ye tö nitre mikaka täte, tä gure o kaibe ye tuai nüne kä jutobiti.