¿Ñobätä tä ja tare nika tuenmetre nakainkä?

NITRE ruäre tä orare Ngöböi, akwa niara tärä o ñaka ye ñaka tä nemen gare metre ietre. ¿Ñobätä tätre töbike ye erere? Kä jökräbiti ja tare nikata krubäte tuin ietre yebätä. ¿Ñobätä Ngöbö tä ja tare nika tuenmetre nakainkä ye ruäre ngwane mä tärä ngwentari jai?

¿Akräke Ngöbökwe ni sribebare ngite aune ja tare nikakäre? Ni sribebare nünankäre ye erere akräke ñaka rabadre nuäre ni kräke ngöbö ni sribekä mikakäre ütiäte jai. Töbike kukwe nebätä: karo mrä jutuadre mäi aune karo ye ñaka tädre kwin rabadre gare mäi angwane, ¿ni karo sribekä käkwe sribebare ye erere mäkwe nütüdre? Ñakare. Ni karo sribekä käkwe sribebare kwin akwa ni iti o jondron mada käkwe juani ngwarbe yebätä töbikadre metrere.

Ye erere arato, jondron sribebare ye tä ükaninte kwin jatäri aune sribebare bä nuäre tä nemen tuin nie, akwa, kukwe tare aune kukwe käme nuainta ye tä krubäte kä tibienbätä tuin nie arato. ¿Ye erere ie ni Sribekä tö namani? Biblia tä driere nitre sribebare kena ye sribebare töi metre akwa kukwe nuainbare kwetre ye köböite töi ñaka namanina ye erere (Deuteronomio 32:4, 5). Akwa yebiti ta kukwe kwin tärä: kukwe tare ye ükaiteta aune nitre Ngöbö mikaka täte ye töi mikaita metre kwe tä käbämike. Ye erere angwane, ¿ñobätä tä kä mike niken raire ta?

¿Ñobätä tä kä mike niken raire ta?

Kukwe ngwantarita abokän mikata gare ne ja erebe kukwe ngwanintari nire rabadre ni kä tibienbätä gobraine yebe. Jehová tö nämene ni gobraindi aune ñaka tö namani ni tuai ja gobraine akwle. Biblia tä mike gare metre: “Ni kä nebätä ie ja jie ngwan ñaka gare” (Jeremías 10:23). Adán aune Eva käkwe ja töi mikani ja mike gobran Ngöbökwe rüere, aune ñaka Ngöbö mikani  täte kwetre ye köböite ja mikani ngite kwetre (1 Juan 3:4). Ye medenbätä niaratre töi ñaka namanina metre aune ye köböite niaratre aune monsoitre jökrä kätä ja tare nike.

Kirabe nükebe kä nengwane, Jehová tä nitre kä nebätä tuenmetre ja gobraine, akwa kukwe namanina bare ye tä mike gare niaratre ñaka raba gobrane kwin. Erametre gobrantre jökrä tä ni mike ja tare nike. Rü, ni mada nuainta tare, kukwe käme aune kukwe ñaka metre nuainta o bren keta kabre, ye gobrantre jökrä ñaka raba denkä täte.

¿Kukwe tare ye ükaiteta ño Ngöbökwe?

Biblia tä käbämike gwäune Ngöbö jatai kä mrä kwin ngwena (2 Pedro 3:13). Nire nire tä ni mada aune Ngöbö tarere aibe käkwe nünain yete (Deuteronomio 30:15, 16, 19, 20).

Biblia tä mike gare arato köbö “kukwe üka[tekäre] nitre käme ben” tä nökrö jötrö ngwarbe ja ken, ye näire Ngöbökwe ja tare nika aune nitre tä ni mike ja tare nike ye mikai krüte (2 Pedro 3:7, NGT). Ye bitikäre, Jesukristo, Rei kädekani Ngöbökwe, ye nitre Ngöbö mikaka täte gobraindi (Daniel 7:13, 14). ¿Gobran ye dre nuaindi? Biblia tä mike gare: “Nitre töi jäme käkwe nünain kä tibienbätä, erametre kä jäme krubäte yete nünandi kwin kwetre” (Salmo 37:11).

Nitre kä tibienbätä ja mikani Jehová “ja nire bianka” rüere köböite bren keta kabre tä, ni kite umbre aune nita krüte ye Jesukristo rei kä kwinbiti käkwe ükaiteta (Salmo 36:9). Jesús gobran kwin yekri nitre ja mikai ye jökrä Jesús mikaita räre. Kukwe käbämikani Bibliabätä ne niarakwe mikai nemen bare metre:

▪ “Nitre nünanka ye ñaka käkwe niedi iti: ‘Ti bren’.” (Isaías 33:24.)

▪ “Ngöbökwe niaratre okwä ñöi sökadite jökrä ietre amne ni ñan krütadre jire iti mda amne  ñan ja müaidre jire chi mda amne ñan ja müaidre ja tare nikabtä, ñobtä ñan angwane kukwe nämane ükaninte ño känekäne, erere nikanina jökrä ta.” (Apocalipsis 21:4.)

Ngöbökwe ja tare nika diainkä käbämikani kwe ye gwäune mikai nemen bare metre kwe gare nie ye tä ni töi mike jäme, ¿ñan ererea? Kä nengwane tä tuenmetre nakainkä, akwa nita orasion nuainne ye niara tä kukwe nuin ie ni raba tö ngwen metre.

Ngöbö tä ni jökrä ken, aune tä mä ken arato. Mätä ja tare nike aune mätä ulire nieta mäkwe ie ye niara tä kukwe nuin aune köbö te mä mikadi kwäre ja tare nika aune töbika yebätä ye niara tö tuai nüke.