Kukwe ngwantarita ruäre ne mä tärä ngwentari jai, abokän kukwe ne käkwe mä dimikai mike gare jai Biblia mäkwe ye arabebätä. Mä törba angwane, nitre testiko Jehovakwe raba kukwe ngwantarita nebätä ja tötike mäbe.

1. ¿Gobran meden namani Jesukwe?

Ngöbökwe käbämikani rei David ie, niara mräkätre ye bükün rabai gobrane kärekäre Gobran Ngöbökwe yete. Jesús ye David mräkätre bükün, kä nengwane niara tä Reire kä kwinbiti. (Mäkwe ñäkä Salmo 89:4 aune Lucas 1:32, 33 yebätä.)

David nämene bati krubäte ye ngwane, Ngöbö Jehová käkwe dianinkä, ne kwe rabadre gobrane juta Israel yebiti. David krütani ye bitikäre, Jehovakwe Salomón dianinkä ne kwe rabadre gobrane rün täte “kürä gobrankäre Jehovakwe” yete, Jerusalén (1 Crónicas 28:4, 5; 29:23). Salomón krütani ye bitikäre, kürä gobrankäre Jehovakwe yete nitre reire kwati krubäte käkwe gobranbare. Akwa nitre namani reire ye jökrä bäsi käkwe ñaka Ngöbö kukwei mikani täte. Ye medenbätä, Jehovakwe nitre rükä Babilonia tuanimetre juta Jerusalén ye gainte kä 607 Kristo känenkri (k.1k.) aune gobran ye diankakäre kürä gobrankäre Jehovakwe yete. Ye ngwane ja känenkäre, David mräkätre monsoi mada ñaka namanina gobranenta jire chi juta Jerusalén yete. (Mäkwe ñäkä Ezequiel 21:27 yebätä.)

2. ¿Kä nikani nuäi ta angwane rei namaninta Gobran Ngöbökwe yete?

Jerusalén ganinte ye bitikäre, Jehovakwe niebare Daniel ni Ngöbö kukwei niekä ie, niarakwe rei mrä diainkä kä kwinbiti ne kwe rabadre gobrane kä tibien nebiti. Akwa ¿ñongwane rabadre gobrane? (Mäkwe ñäkä Daniel 7:13, 14 yebätä.)

Köböbare abokän Daniel ni Ngöbö kukwei niekä käkwe mikani gare yekänti kukwe ye mikata gare. Gobran Jerusalén ye gadrete Ngöbökwe niebare ye erere, köböbare yete, kri kri krubäte ye netadre niebare Ngöbökwe. Ye bitikäre kä rikadre “kwä kükü” ta angwane kri dokwä ye ririadreta mikani gare. Bibliabätä, kä komä biti ötare ye abokän köbö 1,260, ye medenbätä kä kwä kükü ye abokän: köbö 2.520 (Apocalipsis 12:6, 14). Kukwe rabai bare mikani gare keta kabre Bibliabätä yekänti, köbö kwati nieta ye abokän kä kwati gärätä (Números 14:34). Ye medenbätä, kä nikani 2.520 ta angwane rei namaninta Gobran Ngöbökwe yete. (Mäkwe ñäkä Daniel 4:10-17 yebätä.)

  3. ¿Ñongwane Jesús namani gobrane?

Ngöbökwe Jesús mikani Reire kä kwinbiti kä 1914 yete, aune ye namani bare metre kä 2.520 yete, Jerusalén ganinte ye bitikäre. Jesús namani Reire kä kwinbiti ye ngwane Satana bätä chokalitre kitani kä tibienbätä kwe (Apocalipsis 12:7-10). Kukwe namani bare ye nitre kä tibienbätä käkwe ñaka tuani, akwa ye köböite kukwe tare tä nemen bare Kä tibienbätä ye abokän nita tuin (Apocalipsis 12:12). Kä 1914 yete ja känenkäre kukwe tare keta kabre tä nemen bare ye kätä mike gare metre Jesús namani gobrane kä ye ngwane. (Mäkwe ñäkä Mateo 24:14 aune Lucas 21:10, 11, 31 yebätä.)

4. ¿Jesús tä Reire ye kätä mä dimike ño?

Kukwe rabai bare niebare abokän namanina bare metre ye kätä mike gare, mä raba tö ngwen Kukwe Ngöbökwe ie aune Jesús tä Reire ye käkwe gwäune ni kä tibienbätä mikai kwäre ja tare nikata yebätä ie mä raba tö ngwen arato. (Mäkwe ñäkä Salmo 72:8, 12, 13 aune Daniel 2:44 yebätä.)

Mä törba kukwe mada mikai gare bäri jai angwane mäkwe ñäkä página 215 nemen 218 tärä ¿Dre drieta erametre Bibliakwe? yebätä.

[Kukwe jatäri página 17]

(Para ver el texto en su formato original, consulte la publicación)

Octubre

607 k.1k. ← Kä 2.520 → 1914 kä 1

1000 k.1k. | 1 k.1k. | 1 kä1 | 1000 kä1

← Kä 606 aune sö krämä →←Kä 1.913 aune sö krä ükän→

Gobran Jerusalén ganinte

Mä raba ne täine: Kä 606 aune sö krämä + kä 1.913 aune sö krä ükän = Kä 2.519 aune sö krä jätä biti krobu = kä 2.520

Ngöbökwe Jesús mikani Reire kä kwinbiti