¿Ne gare mäi?

¿Ñobätä nitre kirabe nämene betún ye mike munkwata kwrere jai?

▪ Biblia tä mike gare, nitre torre Babel sribekä käkwe “ladrio dätebare [...], ketadre [...] dobro rebe munkwata kwrere” (Génesis 11:3, JK).

Betún ye abokän jondron petróleo yete diankata. Kä Mesopotamia yekänti jondron ye krubäte, kite dobrote kwin aune nemen ngötäre nierare. Jondron yebiti jondron mada ketaka nämene jabätä kirabe ye nämene gare ni jökrä ie. Tärä ruäre kukwe känänkäre yebätä nieta, jondron ye nämene “kwin krubäte ju krikri sribe nämene ladrillo yebiti ye kräke”.

Kukwe keteiti nämene tikani täräkwata Archaeology yebätä abokän känti Zigurat (pirámide escalonada) nämene juta Ur (Mesopotamia) kirabe yekänti tuaninbiti bitinkä ye kädrie nämene. Ni kukwe ye tikaka käkwe niebare: “ladrillo kukwani ye ngätäite mortero sribebare betún yebiti ye täbe, kä mötörikri juta Irak yekänti petroleo ye nämene metrere abokänbiti sribi jatani kena. Jondron drüne rebe ye dokwäre gobrantre tä rüre jabe aune nitre tä ni mada nuainne tare kä nengwane, akwa kirabe nämene nitre mike nüne metre keteitibe jabe. Betún mrita nämene ñö, üman, aune jondron madabe yebiti ju sribebare ye nuabarera kä kwati krubäte te”.

¿Täräkwata ñobätä kukwe tika nämene kirabe?

▪ Apóstol Juan niebare: “Kukwe tä kabre mda tikwe niedre munye akwa, ti ñan tö tikai jökrä täräbtä munye”. Nita ñäke kukwe nebätä ye bitikäre nita ngwentari jai, ¿täräkwata ñobätä kukwe tika nämene kirabe? (2 Juan 12).

Kukwe griekore chartes, ye abokän “täräkwata” gärätä, täräkwata ye sribe nämene papiro yebiti. Papiro ye abokän krimu nirien ñöte, kwata ye sribe nämene täräkwatare tärä okwä tikara. ¿Sribe nämene ño? Tärä ruäre kukwe känänkäre tä mike gare: “Krimu ye kwata dianka nämene, abokän 3 metros (10 pies) ngare, tikaka nämene nginimo aune mika nämene ketebu jabiti: keteiti mika nämene mota aune keteiti abokän mika nämene krökäin. Biti kri sribebare mazo kwrere yebiti trekate nämene ne kwe täräkwata ye rabadre käre, biti mrä bäsöka nämene”.

Nitre ja tötikaka jondron kirabe yebätä yei, kukwe tikani kwanina papiro kirabe yebätä, kä Egipto yekänti aune mar Muerto bäre tibien. Kukwe tikani papiro kirabe yebätä kwanina ruäre kä yekänti ye abokänbätä kukwe tikabare Jesús näire o känenkri ye tä mikani. Tärä tikabare nitre apóstol yekwe tä Bibliabätä, ye tikabare kena Papiro yebätä raba ruin.

[Ni (nitre) jondron üai bianka página 11]

Spectrumphotofile/ photographersdirect.com

© FLPA/David Hosking/ age fotostock