¿YE METRE? Jän, ye erere. Ngöbö Jehová tä käbämike nitre niara mikaka täte yei: “Tikwe ngite [mäkwe] ye juain ta [mäbiti], aune tikwe ñaka ngite [mäkwe] ngwain törö jire jai” (Jeremías 31:34). Nitre ja mikani ngite tä ja töi kwiteta, yebiti niara tä ngite juen ta ye ngwane, niara ñaka ngite kwetre ngwenta törö jai ye mikata gare metre kwe nie kukwe yebiti. Akwa ¿ye tä mike gare ni jondron jökrä Sribekä ye ñaka raba ngite juanta ta kwe nibiti ye ngwenta törö jai? Ngöböta ngite juen ño ta nibiti aune tä käikwitekä jabiti, ye Ezequiel niara kukwei mikaka gare kätä mike gare bäri kwin. (Mäkwe ñäkä Ezequiel 18:19-22 yebätä.)

Ezequiel yebiti, Jehovakwe kukwe tare niebare nitre kä Judá aune juta Jerusalén yekänti ñaka ja ngwani metre ye kräke. Juta ye ñaka namanina kukwe metre mike täte aune niaratre namani nitre nuainne tare krubäte. Nitre nünanka Babilonia käkwe juta Jerusalén ye gaite niebare Jehovakwe, akwa kukwe kwin mikaninta gare kwe: niaratre itire itire ben kukwe ükaite. Niaratre ja töi mikai dre nuainne ye ererebätä kukwe ükaite bentre niebare kwe (bersikulo 19 aune 20).

Nitre nämene kukwe käme nuainne akwa ye bitikäre nämene ja töi kwiteta angwane, ¿dre nämene nemen bare bätätre? Bersikulo 21 yekänti, Ngöbökwe niebare: “Ni kukwe käme nuainkä, ye käkwe ja töi kwitadreta kukwe käme nuainbare kwe ye jökräbätä aune rabadreta kukwe ükaninte tikwe ye jökrä mike täte metre, bätä rabadreta kukwe kwin aune metre nuainne, ye käkwe nünain jankunu. Ñaka krütai”. Nire nire tä ja mike ngite akwa tä ja töi kwiteta metre aune tä kukwe käme tuenmetre yebiti Jehová tä juto “biarebe ja mika ngite ye juankäre ta” (Salmo 86:5).

¿Aune dre nie raba ja mikani ngite kwe yebätä? Bersikulo 22 tä niere ja känenkäre: “Kukwe käme nuainbare kwe ye jökrä... ñaka ngwainta törö niara rüere”. ¿Kukwe “ñaka ngwainta törö niara rüere” ye dre gärätä?

Ni ja tötikaka kri tä niere, kukwe hebreore kwitani “ngwainta törö” ye abokän ñan jondron ngwanta jerekäbe törö jai gärätä, “ñakare aune jondron nuaindre metre arato: ni töi aune jondron nuainta ye tä sribire gwairebe”. Ye medenbätä, kukwe “ngwanta törö” nieta ye abokän “jondron nuainta” ye gärätä. Ye tä mike gare, ni ja mikaka ngite tä ja töi kwiteta kukwe käme yebätä ye Jehová ñaka ngite kwe ngwenta törö jai jondron nuainkäre niara rüere, o miketa ja ngie nuain aune kukwe niere rüere ja mikani ngite kwe yebätä. *

Kukwe kwin krubäte tä tikani Ezequiel 18:21 aune 22 ye tä bämike Jehová tä ngite juen ño ta nibiti. Ni ja mikaka ngite tä ja töi kwiteta yebiti Ngöböta ngite juen ta angwane, ñaka tä ngite kwe ye ngwenta törö jire jai. Ñakare aune, tä mikete ja jie bitikäre o ja trökri ye kwrere (Isaías 38:17). Kukwe käme nuainbare ye niara tä käikwitekä täte jabiti (Hechos 3:19).

Ngöbökwe ni mikadre tuin bobre jai ye ni jökrä tä ribere jai, ñobätä ñan aune ni abokän ngite, nita ja mike ngite mantre jetebe (Romanos 3:23). Ye medenbätä, nikwe ja brukwä tätebiti ja töi kwitai kukwe käme nuainbare yebätä angwane, Jehovakwe ngite juain ta nibiti rabadre gare nie ie niara tö. Aune niara tä ngite juen ta nibiti ye ngwane tä käikwitekä jabiti, o niara ñaka ni mike ja ngie nuin aune kukwe niere ni rüere ja mikani ngite yebätä gärätä. ¡Ye kwin krubäte! ¿Mä törba rökrai Ngöbö ni mike tuin bobre krubäte jai ye ken?

KUKWE BIBLIABÄTÄ DIANINKÄ ÑÄKÄKÄRE SÖ NE KRÄKE:

▪ Ezequiel 6 nemen 20

[Nota]