Moisés, ni mada tarebare
¿JA TARE YE DRE GÄRÄTÄ?
Ja tare ye abokän ni mada tareta krubäte meden gärätä. Ni mada tareta ye bämikata kukwe nieta ie aune jondron nuainta kräke yebiti, ye ruäre ñaka nuäre akwa nuaindre.
¿MOISÉS TÖI NÄMENE NE ERERE YE BÄMIKANI ÑO KWE?
Moisés nämene Ngöbö tarere ye bämikani kwe. ¿Niarakwe nuainbare ño? Käre nämene mike täte. Tärä 1 Juan 5:3 (TNM) tä niere erere: “Ngöbö tareta ye abokän ne gärätä: kukwe kwe ye nikwe mikadre täte”. Kukwe meden meden Ngöbö nämene ribere ie nuaindre, ñodre rabadre ja tuin ngwärere Faraón gobranka Egipto yebe o krimana ye ngökadrete kwe Mren Tain yebiti ta, kukwe ye ñaka namani nuäre nuaindre kräke, akwa dre ribe nämene nuaindre ie ye erere nämene nuainne käre (Éxodo 40:16).
Moisés nämene nitre Israel tarere ye bämikani kwe arato. Nitre yei nämene gare kwin Jehová nämene niara yebiti jie ngwen, ye medenbätä niaratre nämene ja tuin kukwe tare ben ye nämenentre mike gare ie. Biblia tä mike gare ‘nitre ye [nämene nemen] nünaninkä krö Moisés ngwärekri dekä nememe dere’ (Éxodo 18:13-16). Köböiti jire niara nämene nitre ye kukwe nuin ye nämene niara mike nainte arato, ye bämike ja töite. Akwa nämene nuainne kä jutobiti ñobätä ñan aune niara nämene nitre ye tarere.
Moisés nämene nitre ye kukwe nuin aune nämene orare kräketre arato. Nitre nämene ja mike niara rüere akwa nämene orare kräke. Ñodre, Moisés ngwai, Míriam, namani ñäke rüere ye ngwane, Jehovakwe mikani ja ngie nuin lepra kisete. Akwa ye käi ñaka namani jutobätä, ñakare aune jötrö ngwarbe blitabare kwe niara kräke kukwe nebiti: “Aune Moisés namani blite Jehovabe, aune namani niere: “¡Ngöbö, tita ja di kärere mäi! ¡Mä raba niara miketa räre!” (Números 12:13). Ja tare ye käkwe niara töi mikani orare ye kwrere.
¿KUKWE NE TÄ DRE DRIERE NIE JA TÖI KRÄKE?
Tä mike gare nie ni rabadre Moisés erere Ngöbö tarere metre, aune ja tare ye rabadre ni mike niara kukwei mike täte “[ja brukwä] ngöi jökrä” (Romanos 6:17). Nikwe Jehová mikai täte ne erere angwane kä rabai jutobätä (Proverbios 27:11). Ja tare yebiti nikwe sribidre Ngöbö kräke ye raba kukwe kwin mike nemen nikwe, ñobätä ñan aune dre kwin Ngöbö kräke erere nuainta ye tä kä mike juto nibätä (Salmo 100:2).
Arato nikwe ja töi mikadre jondron kwin nuainne ni mada kräke. Kukwe tä ni mräkä o ja ketamuko nikwe kisete ye niedre kwe nie angwane ja tare ye käkwe ni töi mikai 1) niara kukwe nuin, 2) niara ie ja ruin ño ye mike nüke gare jai aune 3) ni töita niara dimikabätä ye nikwe bämikadre ie.
Moisés ye erere, ni raba orare ni mada tare nikwe ye kräke. Ruäre ngwane ni mada dimikadre ño ye ñaka rabai gare nie aune juen ta tibiti ni rabai niere ie: “Dre nuaindre tikwe ye ñan nibi gare tie, orasion ye aibe ti raba nuainne mä kräke”. Akwa, mä raba ngwen törö jai “ni kwin näin blite Ngöböbe ja brukwäbiti, nebrä kä näin ni dimike” (Santiago 5:16, Ngöbö Täräe, tärä okwä ükaninte). Orasion nikwe ye raba Jehová töi mike jondron kwin nuainne ni mada kräke. Orasion nuaindre ye kukwe bäri kwin ni raba nuainne ni mada tare nikwe ye dimikakäre. *
Ni raba kukwe keta kabre mike gare jai Moisés yebätä ¿ñan ererea? Niara ngite ni erere akwa tödekadre, ja töi mikadre bobre aune ni mada taredre yebätä kukwe kwin bämikani kwe ni kräke. Nikwe ja di ngwandre ja töi mike Moisés erere, aune jondron kwin rabai krubäte nikwe bätä nitre tä nüne ni bäre ye kräke arato (Romanos 15:4).
^ párr. 8 Nikwe ja di ngwandre kukwe ükaninte Ngöbökwe ye erere nuainne, ne kwe niarakwe orasion nikwe ye kukwe nuadre. Mä törba kukwe mikai gare bäri jai angwane mä raba kapitulo 17 ye känene tärä ¿Dre drieta erametre Bibliakwe? yebätä, tärä ye nitre testiko Jehovakwe käkwe sribebare.