Ngöbökwe ñaka Diablu sribebare. Ngöbökwe ángel sribebare abokän ja känenkäre ja mikani kwe Diablu o Satana. Jesús mikani gare, kena Diablu ye ñaka nämene ni ngökö aune ni mada kämike tä nuainne kä nengwane ye erere. Niara töi nämene kwin Ngöbö monsoi mada kä kwinbiti ye erere. (Mäkwe ñäkä Juan 8:44 yebätä.)

Ángel ja mikani Diablu ye käkwe ja mikani Ngöbö rüere aune Adán bätä Eva töi kwitani kwe arato ja mike Ngöbö rüere. Niarakwe ja mikani Satana, ye abokän “Ni Rüe” gärätä. (Mäkwe ñäkä Génesis 3:1-5 aune Apocalipsis 12:9 yebätä.)

Nitre mada üaire sribebare töbätä Ngöbökwe ye erere, ángel ja mikani Diablu ye törbadre dre kwin nuain aune dre käme nuain ye erere rabadre nuainne. Niara tö namani ja mikamana täte, ye käkwe töi mikani ñaka Ngöbö mike täte. (Mäkwe ñäkä Mateo 4:8, 9 aune Santiago 1:13, 14 yebätä.)

¿Diablu tä dre nuainne nitre töi kwitakäre? ¿Ni rabadre jürä ngwen jabätä? Kukwe ngwantarita ne mikata gare ño ye raba kwen Biblia yete mäi.