NI GRIEKO ja tötikaka kukwe kira yebätä käkwe nünanbare kä 2.500 nikanina ta yete, ye kukwe ne tikani nitre Egipto niara näire yebätä: “Nitre Egipto jondron bökäne krubäte tä bieta nuainne, niaratre tä mröre ünä ye bitikäre, krinku sribebare taiti o tabu (uno o dos codos) mrü ngwaka kräke, jükani, sribebare kwin, abokän teri kri sribebare ni ngwaka ye kwrere mikata ye ni iti tä niken ngwena bolore ta aune tä mike tuare nitre itire itire tä mröre yei aune tä niere ie: ‘Mike ñärärä aune dö ñain aune kä ngwen juto jabätä, ñobätä ñan aune mä krütai ye ngwane mä rabai ne erere’”.

Nitre Egipto ñan aibe nämene töbike ye erere ja nire aune gata yebätä. Kä nengwane nitre kwati tä niere arato “mröre, tomana ñain aune kä ngwen juto jabätä”. Nita krüte ye ngwane ja nire ñaka tärä nemen nikwe, ¿se ñobätä ni ñan rabadre kä ngwen juto jabätä ni tä nire ngwane? ¿Ñobätä ja di ngwandre kukwe metre nuainne? Gata ye bitikäre kukwe mada kwin ñaka angwane, nüna raba kä nengwane aibe kräke. Nitre nämene ñaka tö ngwen ni krütani gaikröta yei nämene ja töi mike ne erere niebare Pablokwe: “Nitre ngatani ñan nüketa nire ngwane, ‘ari mröre, ari tomana ñain, ñobätä ñakare angwane ni gatai jetebe’” (1 Corintios 15:32, Ngöbö Täräe, tärä okwä ükaninte).

Erametre, nitre krütanina ye ñan tä käi kwitaninkä täte jabiti ye nämene gare kwin Pablo ie. Nitre ye raba nüketa nire aune ñaka krütaita jire ye nämene gare metre ie. Kukwe ütiäte namani bare ye nämene niara mike töbike ye erere, kukwe namani bare ye metre aune kukwe nie ñaka jire rüere ye nämene gare ie: ye abokän Jesukristo ganinkröta. * Kukwe ye köböire metrere tödeka nitre kristiano kena yekwe namani dite.

¿Jesús ganinkröta ye ñobätä ütiäte ni kräke? Kukwe ye namani bare metre, ¿ye ñokänti gare nie? Nitre kristiano nämene nüne juta kirabe Corinto  yekänti yei Pablokwe tärä tikani angwane, dre niebare kwe ietre ye ani mike gare jai.

Nitre kristiano ruäre konkrekasion Corinto yekänti ie kukwe ye ñan nämene nüke gare kwin, aune mada abokän ñaka nämene tö ngwen ni krütanina gaikröta metre yei. Pablo tärä tikani kena niaratre ie ye ngwane, ni krütani ye ñaka rabadre ganinkröta angwane dre dre raba nemen bare ye niarakwe mikani gare ietre. Niarakwe kukwe ne niebare: “Ni krütanikrütani ñan rükadreta nire, ye ngwane Ngöbökwe Kristo mikaninta nire ñakare arato. Amne Ngöbökwe Kristo mikaninta nire ñakare, ye ngwane kukwe dirita nunkwe abko ngwarbe [...]. Erere arato, [n]unta tödeke ngwarbe Kristobti. Ngöbökwe Kristo mikadreta nire ñakare bkänä akräke, nun rabadre kukwe ngwarbe niekä Ngöböbtä [..., aune ] munta tödeke ngwarbe bti amne mun tä ngite janknu Ngöböye [...]. Ngöbökwe Kristo mikaninta nire ñakare, ye ngwane nitre tödekaka Kristobti krütanikrütani ye abko ñakare dianintari” (1 Corintios 15:13-18).

“Abti ja mräkätre [...] siento krärike jire, ie ja mikani tuadre batibe jökrä kwe [...]. Yebti ja mikani tuadre kwe Santiagoye amne nitre niara kukwei ngwianka mda mdaye. Mrä, Kristokwe ja mikani tuadre tie arato.” (1 Corintios 15:6-8)

Pablo kukwe niebare kena ye rüere kukwe mada nie ñaka raba: nitre krütanina ye ñaka gaikröta akräke, Kristo ñaka ganinkröta arato. Kristo ñaka ganinkröta akräke, kukwe kwin ye drie tädre ngwarbe, ni ngöka tädre krubäte. Ne madakäre, Kristo ganinkröta yei nitre kristiano nämene tödeke metrere, aune kukwe ye tä kukwe ruäre bäri ütiäte Bibliabätä drieta ye ngätäite, ñodre Ngöbö gobranka kri, Ngöbö kädekata ño, Gobran kwe aune ni mikai kwäre. Kristo ñaka ganinkröta akräke, Pablo aune nitre apóstol mada käkwe kukwe driebare ye namani ngwarbe aune ñaka ütiäte.

Kristo ñaka ganinkröta akräke, nitre kristiano tä tödeke kukwe ngwarbe ie. Ne madakäre, Pablo bätä nitre mada kristiano käkwe ñan kukwe ngwarbe niedre Jesús ganinkröta ye aibebätä, ñakare aune Ngöbö Jehová, käkwe Jesús ganinkröta ie niaratre nämene tödeke yebätä kukwe ngwarbe niedre kwetre arato. Ye erere ngwane, “Kristo krütani ni ngite [...] ye diankakäre nibtä” niebare ye rabadre ñaka ütiäte, ñobätä ñan aune Ni ni Diantarikä ñakare dianintari gata yebätä, aune ñaka rabadre ni mada dentari arato (1 Corintios 15:3). Yekwe mikadre gare nitre kristiano, ruäre murie ketani, ye tödekabare ngwarbe ni krütanina gaikröta yei.

Pablo ie kukwe ne nükani gare: “Nikwe nünandre kä nebtä aibe kräke nita tödeke Kristobti ne ngwane, ni jökrä ngätäite, ni abko bäri bobre jakän” (1 Corintios 15:19). Nitre mada kristiano ye erere, Pablo ja tare nikabare, ja tuabare kwe kukwe tare ben, rüe nakaninkä aune ja tuani kwe gata yebe, ñobätä ñan aune niara nämene tödeke ni krütanina gaikröta aune kukwe mada jökrä rabai bare yei. ¡Ni krütanina gaikröta ye kukwe ñaka metre nie tädre akräke ngwarbe niarakwe tö ngwandre ie!

Kukwe ngwarbe nie nämene ye Pablo ñaka nämene nütüre. Jesús krütani aune ganinkröta ye nämene gare kwin ie, aune ye mikakäre gare metre nitre Corinto ie kukwe ne niebare kwe: “Kristo krütani ni ngite [...] diankakäre nibtä abko nämane tikani kore Ngöbö Kukweibtä [...]. Erere arato, Kristo doboi mikani, abti köbömäkäre Ngöbökwe mikaninta nire abko nämane tikani kore Ngöbö Kukweibtä, ye kwrere nakaninkä. Yebti Kristokwe ja mikani tuadre Pedroye, bti ja mikaninta tuadre kwe nitre ja töitikaka ben ni jätäbti nibu yeye. * Abti ja mräkätre [...] siento krärike jire, ie ja mikani tuadre batibe jökrä kwe. Ja mräkätre Kristo tuakatuaka ye tä nüne kwati akwa, ruäre abko krütanina. Yebti ja mikani tuadre kwe Santiagoye amne  nitre niara kukwei ngwianka mda mdaye. Mrä, Kristokwe ja mikani tuadre tie arato” (1 Corintios 15:3-8).

Kristo krütani ni ngite ütiäre, doboi mikani aune ganinkröta ye nämene gare metre Pablo ie, ye medenbätä namani mike gare. ¿Ñobätä kukwe ye nämene gare metre ie? Nitre kwati okwäbiti kukwe ye namani bare. Jesús ganinkröta ye ja mikani tuare ni itire itire ie, nitre ye ngätäite Pablo nämene, nitre braibe aune nitre kwati siento krärike biti bäri, nitre kwati yei Jesús ganinkröta namani gare angwane ñaka namani tuin era kena ietre (Lucas 24:1-11). Nitre kwati käkwe kukwe ye tuani nämene nire Pablo näire aune kukwe ye metre namanintre niere (1 Corintios 15:6). Kukwe nemen bare ye ni iti o nibu tä niere angwane ñaka mikata nemen era jai, akwa nitre siento krärike biti bäri käkwe kukwe ye mikadre gare angwane nuain ñaka raba ye erere.

Ne madakäre, Kristo krütani, doboi mikani aune ganinkröta niebare Pablokwe ye ngwane, bobu jire niebare kwe “tikani kore Ngöbö Kukweibtä”. Kukwe madabiti abokän, kukwe niebare Mesías yebätä nämene Tikani Hebreore ye namani bare metre, yebiti namani gare arato Jesús ye Mesías käbämikani.

Kukwe ye nämene tikani Ngöbö Kukweibätä aune nitre kwati kukwe tuani ja okwä jeñebiti, akwa Jesús ganinkröta ye nitre ruäre ñaka mikani era jai, aune kä nengwane nitre ruäre täbe töbike ye erere. Nitre ruäre ye tä niere nitre ja tötikaka ye Jesús ngwaka goibare aune biti niara ganinkröta ye namanintre niere. Akwa nitre ja tötikaka die ñaka nämene aune ñaka nämene nuäre kräketre rabakäre dobo känti guardiatre nämene krare yekänti. Nitre mada tä niere Jesukwe ja mikani tuare ye abokän kukwe ngwarbe bämikani ja töite. Akwa, kukwe ye ñaka metre, ñobätä ñan aune nitre kwati käkwe kukwe ye tuani aune namani bare köbö jene jene te. Ne madakäre, ¿kukwe ngwarbe bämikani ja töite akräke, raba gwa rien aune döräire, Jesús ganinkröta käkwe nuainbare Galilea ye erere? (Juan 21:9-14.) ¿Kukwe  ngwarbe bämikani ja töite akräke kise mika manandre kwe ja küde aune ja ngoto yebätä nitre nämene ja ükaninkrö yei? (Lucas 24:36-39.)

Nitre mada tä niere nitre krütanina ganinkröta nieta ye abokän ni ngökata, nitre ja tötikaka Jesube käkwe kukwe ngwarbe känänbare niekäre. Akwa, ¿ñokäre niaratre ye nuainbare? Jesús ganinkröta ye mikabätä gare, niaratre ja tare nikabare, kötaibare aune murie ketani. ¿Kukwe ngwarbe nie nämene akräke ñobätä niaratre ja nire mikani kukwe tare te? Ne madakäre, niaratre diribare kena rüe okwäkänti Jerusalén yete, nitre rüere ye tö namani kukwe ngwarbe känäin mikakäre ngite.

Jesús ganinkröta ye metrere nitre ja tötikaka töi mikani kukwe driere ni Däkien yebätä kukwe tare yebiti ta. Jesús ganinkröta ye namani bare metre abokän ie nitre kristiano namani tödeke metrere. Nitre kristiano kena käkwe ñaka ja nire kwetre ye mikani kukwe tare te blitakäre ni dirikä töbätä murie ketani yebätä. Ñakare aune nuainbare kwetre Jesús ganinkröta ye mikakäre gare, ñobätä ñan aune kukwe ye nämene bämike niara ye Kristo, Ngöbö Monsoi, ni nire aune dite krubäte abokän nämene dimike aune jie ngwen. Jesús ganinkröta ye käkwe mikani gare niaratre ye rabadi ganinkröta arato. Ne madakäre, Jesús ñaka ganinkröta akräke, nitre ñaka tödekadre Kristo ie, aune niara ñaka mikaninta nire akräke, ni madakwe ñaka niara kädriedre jire nibe.

¿Kristo ganinkröta ye köböire dre kwin tä nikwe?