JESÚS ganinkröta ye namani bare kirabe akwa ütiäte krubäte nun kräke. Apóstol Pablo mikani gare krörö: “Akwa nengwane Gobran kri [Jesús] nükaninta nire mrükrä ngätäite; niara abrä nura ngokwä kena nitre tä kübiani ngätäite. Ñobätä ñakare angwane ño ni itibe köböite gata jatani, ne kwrere arato ni itibe köböite ni ngatanina rükaita nire. Angwane ño ni tä ngatain jökrä Adanbätä, ne kwrere arato ni nünandita Gobran kribätä” (1 Corintios 15:20-22, Ngöbö Täräe [NGT], tärä okwä ükaninte).

Jesús ganinkröta 16 nisán kä 33 yete. Köbö yete nitre Judea nämene niken nura ngwä öta nämene kena ye bien Jehová okwäkänti templo Jerusalén yekänti. Jesús ye “nura ngokwä kena” niebare Pablokwe ye ngwane, nämene mike gare Jesús ye bitikäre ni mada gaikröta bäri.

Apóstol kukwe niebare ne tä mike gare Jesús ganinkröta köböire kukwe kwin rabai bare: “Ni itibe köböite gata jatani, ne kwrere arato ni itibe köböite ni ngatanina rükaita nire”. Adán ja mikani ngite ye ngie nikani nibiti köböite ni jökrä tä krüte. Akwa, Jesukwe ja nire ñakare ngite biani ni kökatarikäre, ye köböire ni raba nemen kwäre ngite aune gata yebätä ni gaikröta yebiti. Romanos 6:23 (NGT) yekänti Pablo kukwe ye mikani gare metre: “Ñobätä ñakare angwane kukwe käme ütiä abrä gata, akwa jondron bian näin Ngöbökwe, nebrä ja nire kärekäre, Jesús Gobran kri [...] nikwe köböire”.

Jesús krütani aune ganinkröta ye ütiäte krubäte ni kräke ye niara arabe käkwe mikani gare. Niara gaikröta yebätä nämene blite ngwane, niebare kwe: “Nire nire käkwe tödekadre tibti abko Ngöbökwe dianditari angwane, nünandi kärekäre kwe [...]. Ñobtä ñan angwane Ngöbö ara käkwe ni jökrä tarebare kri krübäte, käkwe ja Odei itibe biani müre ketadre kräke, ni jökrä käkwe tödekadre Ngöbö Odei yebti angwane, ñan rabadre ganinte kärekäre [...], akwa nünandre kärekäre kwe” (Juan 3:14-16).

Kukwe ne bämike ja töite: ¡ja nire kärekäre känti ñaka ja tare nikadi jire! (Apocalipsis 21:3, 4.) ¡Ye kukwe kwin krubäte ie tö ngwandre! Ni ja tötikaka kri käkwe niebare krörö: “Kä ni krütanina doboi mikara ye tä ngwen törö nie ja nire nikwe ye jötrö, aune ni krütanina gaikröta ye tä mike gare nie gata ye jötrö”. Erametre: Jesús ganinkröta köböire ja nire rabai nikwe.