Ngöbö ye muko metre ñaka abokän monsoi rabadre. Niarakwe ni aune jondron nire ye jökrä sribebare. Akwa, ni sribebare ne kwe nikwe ja ngwendre niara töi erere, ye medenbätä ni brare kena, Adán, ye ie “monso Ngöbökwe” niebare. Ye erere arato, Jesús ye “Ngöbö Monsoi” nieta ñobätä ñan aune niara sribebare Rün töi erere. (Mäkwe ñäkä Lucas 3:38 aune Juan 1:14, 49 yebätä.)

Ngöbökwe Jesús sribebare Adán känenkri. Ngöbökwe niara sribebare kena aune niara ye köböire jondron jökrä mada aune angeletre sribebare kwe. Yebätä, Biblia tä niere Jesús ye “Ngöbö Odei mubai amne jändrän jökrä däte ngämi känenkri”. (Mäkwe ñäkä Colosenses 1:15, 16 yebätä.)

Jesús däredre Belén ye känenkri, nämene nüne ni üaire erere kä kwinbiti. Kä nükani debe näre angwane, Ngöbökwe mikani därere Mariabätä ne kwe rabadre nemen ni kä nebätä erere. (Mäkwe ñäkä Lucas 1:30-32; Juan 6:38 aune 8:23 yebätä.)

¿Ñobätä Ngöbökwe Jesús mikani därere Kä tibienbätä ni kä nebätä ye erere? ¿Sribi meden ütiäte nuainbare kwe? Mäkwe kukwe ye mikai gare jai Bibliabätä angwane, Ngöbö aune Jesús kukwe nuainbare ni kräke ye rükai gare bäri kwin mäi aune mäkwe debe biain kukwe yebätä.