Ni ngöka ye kukwe ñaka metre gare nie akwa nieta. ¿Mäkwe kukwe ñaka metre ye niebarera bati? *... Nitre umbre ruäre tä Ngöbö tarere akwa tärä kukwe ye nuainne. Ni iti kädrieta Bibliabätä käkwe kukwe ye nuainbare, ni ye gare mäi raba ruin tie. Ni ye kädeka nämene Pedro, aune nitre ni jätä biti nibu ja tötikaka Jesube ngätäite niara nämene. ¿Ñobätä ni ngökabare kwe ye mä tönibi mikai gare jai? Kukwe namani bare kira ye kukwe nuin.

Jesús kani ngite ye bitikäre, ni nitre sacerdote jie ngwanka yekänti jänikani. Kä ruäre deu namanina niken ta ye ngwane, Pedro nükani jubäre aune ni mada ñaka gabare jire aune namani täkäni ñukwä bukaninte ken. Niara jutuabare meri sribikä yete ie, aune tuanimetre niken gwä kwe aune niara nükani gare ie ye ngwane niebare kwe: “Ma nämane dikekä siba Jesube arato”. Akwa Pedro nikaninkä aune kukwe ye ñaka metre niebare kwe.

Ye bitikäre meri mada sribikä ie niara jutuabare, aune kitani ngise kwe: “Jesu [...] ben ni noko nämane dikekä”. Kukwe ye ñaka metre niebareta Pedrokwe. Ye bitikäre, nitre mada krötabare niara ken aune niaratre niebare ie: “Ma ye tä nekete Jesube kwrere”.

Kä jürä namani Pedrobätä, yebätä bämäkäre ni ngökabare kwe. Niebare ja dibiti kwe: “Ni ye abko gare ñakare jire chi tie”. Ye bätäräbe, antlan ngwänänbare. Jesús nikrabare Pedrobätä ye ngwane, kukwe niebare ora krati känenkri Jesukwe niarai ye nükani törö ie: “Antlan ngämi ngwäne, känenkri makwe ti rükandite [ti ñaka gare mäi mäkwe niedi] bämä jire”. Pedro ja muaibare krubäte. Kukwe nuainbare kwe yebätä ja namani ruin ngite ie.

¿Kukwe ye erere raba nemen bare mäbätä?... Kukwe ne bämike ja töite, mä tädre kwelate aune monsotre mada rabadre blite nitre testiko Jehovakwe yebätä. Iti käkwe niedre: “Niaratre ñaka bandera mike ütiäte jai”. Aune mada käkwe niedre: “Nitre ye ñaka rüre ja mikakäre juta kwetre yekri”. Monso mada käkwe niedre arato: “Nitre ye ñaka kristiano ñobätä ñan aune ñaka Navidad käi ngwen juto jabätä”. Ye bitikäre, iti nikradre mäbätä  aune niedre kwe: “Mä testiko Jehovakwe, ¿ñan ererea?”. ¿Mäkwe dre niedre ie?...

Mä tädre juto biare kukwe mikakäre gare kwin. Pedro ñaka nämene juto biare; yebätä kukwe ngwanintari ja dibiti ie angwane, ni ngökabare kwe. Niarakwe ni ngökabare yebätä ja namani ruin ulire krubäte ie, ye kukwe kwin nuainbare kwe aune Ngöbökwe ngite ye juani tabiti.

Ani blite Ananías yebätä mada. Ananías ye ni mada ja tötikaka Jesube abokän käkwe ni ngökabare, aune muko Safira, kräke kukwe ye namani debe. Akwa Ngöbökwe ñaka ngite juani ta niara aune muko kwe yebiti. Ñobätä ye ani mike gare jai.

Jesukwe nitre apóstol tuanimetre aune nikaninta kä kwinbiti nünankäre Ngöböbe ye ngwane köbö jätä nikanina ta. Nitre mil krämä käkwe niara kukwe nuabare aune ja ngökabare ñöte kwetre Jerusalén. Nitre kwati ye juta mente känti jatani bieta Pentecostés käi ngwen juto jabätä, aune nämenentre ja töi mike kwatibe ja mikete bäri köbö kabre te ja tötikakäre kukwe mrä mika nämene täte kwetre yebätä. Nitre ja tötikaka Jesube ye nämene ngwian jeñe kwetre yebiti nitre dimike ribe nämene kwetre jai ye ererebätä.

Ananías bätä muko kwe Safira ye kä jeñe rürübäinbare ja mräkätre ye dimikakäre. Ananías ngwian biani nitre apóstol ie angwane, ngwian biani ietre kä ütiäre ye jökrä biani kwe namani niere; akwa ye ñaka metre, ñobätä ñan aune ngwian ye ruäre diani kwetre jai. Ngöbö die köböire, kukwe ye namani gare Pedro ie aune niebare kwe ietre: ‘Mäkwe ñaka ni kä tibienbätä ngürü, ñakare aune mätä Ngöbö ara jire ngökö’. Angwane batibe Ananías nikani ngwakare tibien. Ora nikani krämä ta angwane muko Safira ye nikani gwä mada. Dre namani bare muko kwe yebätä ye ñaka nämene gare jire ie, ni ngökabare kwe arato, aune niara nikani ngwakare tibien.

¡Kukwe ütiäte krubäte ja töi kräke! Kukwe metre niedre käre ye ütiäte krubäte, aune ni jökrä rabadre nuainne. Erametre, ni jökrä ie tä nainte, metrere ni tä bati ye ngwane. ¿Jehová tä mä tarere aune ngite ye juain ta kwe mäbiti nuainbare kwe Pedro kräke ye erere ye käi juto mäbätä?... Käre ni rabadre kukwe metre niere ye mäkwe ngwan törö jai. Nane nikwe ni ngökadre ye ngwane, Ngöbökwe ngite juandre ta nibiti ye nikwe ribedre ie. Pedro käkwe nuainbare ye erere, aune Ngöbökwe ngite juani tabiti. Nikwe ja di ngwain ñaka ni ngököta jire angwane, Ngöbökwe ngite juain ta nibiti arato.