¿ERAMETRE Jesús kukwe ütiäte nuainbare ja nire kwe yebiti? Gare kwin nie ye erere, nitre ñaka jondron bökäne krubäte ngätäite Jesús ririabare aune niarakwe nünanbare kä tibienbätä ye ngwane jondron ñaka nämene krubäte kwe; metrere, “kä ñakare [nämene] jire chi jadükakrä” ie (Lucas 9:57, 58). Ne madakäre, nitre niara rüere ye brukwä namani kräke, namani ñäke blo niarabätä aune mrä murie ketani kwetre.

Ni ruäre raba niere: “Nünandre ye erere angwane, ja nire yebiti kukwe ütiäte nuainta ye ti ñaka raba niere”. Kukwe kwin nuainbare Jesukwe ye ni törba mikai gare jai arato. Ani kukwe ketabokä ye mike gare jai.

“Ti juanka tö dreye [...] abko tikwe mikadre bare täte jökrä, ye abko mrö kwrere tikrä.” (Juan 4:34.)

Jesukwe ja di ngwani Rün kä kwinbiti, Jehová, ye töi nuainne, jondron nuainbare metre kwe yebiti aune ja kukweibiti. * Texto tä mikani kuini käkwe miri gare ye erere, sribi nuain nämene niarakwe ye nämene kä mike juto krubätebätä, mrö ye kwrere. Kukwe meden namani bare abokän näire niarakwe kukwe bämikani ye ani mike gare jai.

Ñänä ruäre ye ngwane Jesús kukwe ye niebare (Juan 4:6). Juta Samaria yekänti niara nänbare ji ñaka kwin nänkäre yebiti ora dekäkri ye jökrä te aune mrö namani ie. Nitre ja tötikaka ben namani niere ja dibiti ie: “Dirikä, mrö kwete” (Juan 4:31). Jesukwe kukwe bämikani yebiti mikani gare kwe, Ngöbökwe sribi biani nuaindre ie abokän nuain nämene kwe ye nämene niara mike dite aune kä mike jutobätä. Jesús nämene kukwe ütiäte nuainne ja nire kwe yebiti, ¿ñan ererea?

“Tita ti Rün tarere.” (Juan 14:31.)

Jesús nämene kä kwinbiti ye ngwane nämene ja kete kwin Rün yebe. Niara nämene Rün tarere krubäte ye töi mikani kä kwe, tö dre nuain aune töi kwin keta kabre ye mike gare. Jesukwe kukwe niebare, jondron nuainbare aune ja ngwani ño yebiti Rün töi ño ye bämikani metre kwe. Erametre, ni raba niere niara ye Rün kwrere. Ye medenbätä, Felipe niebare ie: “Ma Rün mike tuadre nunye” ye ngwane, Jesukwe niebare ie: “Nire nire käta ti tuen, ye abko tä ti Rün tuen arato” (Juan 14:8, 9).

Jesús nämene Rün tarere krubäte ye medenbätä nämene juto biare mikakäre täte nememe niara murie ketani ye ngwane (Filipenses 2:7, 8; 1 Juan  5:3). Ja tare nämene kwe ye köböire nünanbare kwin kwe.

“Nikwe ja nire biandi kämikadre ja mräkä mada diäre, yebrä niekwe ja tare.” (Juan 15:13, Ngöbö Täräe, tärä okwä ükaninte.)

Ni jökrä ngite yebätä nünandre jankunu kä ja känenkäre te yei ni ñaka tö ngwen krubäte. Biblia tä niere: “Ni itibe [Adán] köböite ja mika ngite ye jatani ni jökräbiti, bätä ja mika ngite ye köböite gata ye jatani, aune ne erere gata ye jatani ni jökräbiti, ne ñan ñobätä aune ni jökrä käkwe ja mikani ngite” (Romanos 5:12, TNM). Ja mika ngite köböite ni ñaka raba ngitie jire akwle: gata yebätä (Romanos 6:23).

Akwa ni tare krubäte Jehovakwe, yebätä kukwe ükaninte kwe ni kräke. Ni mikakäre kwäre ngite aune gata yebätä, niarakwe Monsoi töi metre aune ngite ñakarebätä, ye juani ja tare nike aune ja bien murie ketadre ni kräke. Jesús nämene Rün aune ni kä tibienbätä tarere, ye töi mikani ja nire metre kwe bien ni ütiäre aune nuainbare kwe kä jutobiti (Romanos 5:6-8). Niara nämene ni tarere krubäte ye käkwe töi mikani kukwe ütiäte nuainne ja nire kwe yebiti. *

“Ni ne abra ti Ngobo tikwe. Niara tare kri tikwe. Niara käi nuäre kri tibtä.” (Mateo 3:17.)

Jesús ja ngökani ñöte ye ngwane Jehovakwe kukwe ne niebare kä kwinbiti. Kukwe yebiti mikani gare metre kwe nämene Monsoi ye tarere aune kain ngäbiti; ye medenbätä Jesukwe niebare metre: “Ti Rün tikwe käta ti tarere” (Juan 10:17). Jesús nämene tare Rünkwe aune nämene kain ngäbiti ye nämene gare metre ie, ye käkwe dimikani ñaka kä jürä ngwen jabätä ja tuakäre kukwe tare nuain nämenebätä aune ñäkä nämene blo rüere yebe. Rün nämene tarere aune kain ngäbiti ye käkwe dimikani arato ja tuin gata yebe (Juan 10:18). Rün nämene tarere aune kain ngäbiti nämene gare metre ie ye käkwe töi mikani kukwe ütiäte nuainne ja nire kwe yebiti.

Erametre Jesús kukwe ütiäte nuainbare ja nire kwe yebiti. Aune ni raba kukwe keta kabre mike gare jai niara yebätä. Ja nire yebiti kukwe meden ütiäte nuain raba ye mikani gare metre kwe kukwe keta kabrebiti nitre ja tötikaka niarabe ie, abokän mikata gare kukwe mada ja känenkäre yebätä.