NÖKRÖ NGÖBÖ KEN
“Munkwe jändrän kärä [...] amne [...] biandi munye”
“Blitadre ño Ngöböbe abko [...] makwe diridre nunye.” (Lucas 11:1.) Nitre ja tötikaka ye iti käkwe kukwe ye ribebare Jesús ie. Kukwe ye mikakäre gare, Jesukwe kukwe ketebu bämikani, ne kwe nikwe oradre ño aune Ngöbö rabadre kukwe nuin ye driekäre. ¿Ngöböta orasion mäkwe ye kukwe nuin ye mä tärä ngwentari jai? Ye erere angwane, Jesukwe kukwe niebare ne rabai ütiäte mä kräke. (Mäkwe ñäkä Lucas 11:5-13 yebätä.)
Kukwe bämikani kena ye tä blite metrere ni iti orasion nuainkä yebätä (Lucas 11:5-8). Jesús kukwe bämikani ye tä blite ni iti känti ni mada nükani kä ruäre deu yebätä, aune mrö ñaka namani bukara ie. Niara rabadre kukwe ye ükete jötrö ngwarbe, ye medenbätä, kä rabadrera raire deu akwa ni ju bökänkä ye rikadre ja ketamuko kwe yekänti aune ban kärädre krämä kwe ie. Bengwairebe, ja ketamuko kwe ye ñaka törbadre rükai krö ñobätä ñan aune ñaka törbadre mräkätre tuai nüke ngwäte. Akwa niara rabadre jankunu ja ketamuko kwe nike aune mrä ja ketamuko kwe rükadre krö aune dre kärädre ie ye erere biandre kwe. *
¿Kukwe ne tä dre drie nie orasion yebätä? Ni rabadre nuainne jankunu: jondron käräta jankunu, känänta aune kise mikata jankunu jondronbätä ye kwrere (Lucas 11:9, 10). ¿Ye nuainta ño? ¿Ye abokän nita orare angwane kise metata jukwebätä Ngöböi aune niara ñaka ni kukwe nuin ye gäräbare Jesukwe? Ñakare. Ngöbö ñaka ni ja ketamuko bämikani ye kwrere, niara töi ño ye ererebätä nitre tä dre dre ribere orasionte aune tä tödeke yei niara tö jondron ye biain. Nita tödeke ye nita bämike jondron käräta jankunu yebiti. Nita jondron kärere jankunu ja kräke yebiti bämikata jondron käräta nikwe ye nita ribere jai aune Ngöbö raba jondron ye bien nie ie nita tö ngwen (Marcos 11:24; 1 Juan 5:14).
Kukwe bämikani ketebukäre ye tä blite, Jehová, ni “orasion Kukwe Nuaka” yebätä (Salmo 65:2). Jesukwe ngwanintari: “¿Mun mden ngäbäkre rünre, ie ngäbäkreta gwa kärere kwetadre jae angwane, tä tbi [kulebra] [...] bien kwetadre ie? Erere arato, ¿mun mden ngäbäkre rünre, ie ngäbäkreta kwi mrüke kärere angwane, tä dribe bien kwetadre ie?”. Erametre: ni rüne ñaka jire iti raba monsoi tare kwe yei jondron raba kukwe tare mike monsoi kisete ye bien. Ye bitikäre, Jesukwe mikani gare nitre rüne ngite akwa “ie jändrän kuin bian gare” monso kwe yei, “se abko mun Rün kä käinbti bäri moto kuin munkrä abko ie munkwe niara Üai Deme [ye jondron bäri kwin] kärädre angwane, biandi kwe munye” (Lucas 11:11-13; Mateo 7:11). *
Ngöbö töi ño ye ererebätä nitre tä dre dre ribere orasionte aune tä tödeke yei niara tö jondron ye biain
Kukwe bämikani nebiti Jesús tä driere nie, Jehová, ni “orasion Kukwe Nuaka”, ye nikwe mikadre tuin jai ni Rün ni tarekä ye kwrere aune monsoi tä dre dre ribere jai ye erere niara tö biain ie. Ye medenbätä, nire nire tä Jehová mike täte raba orare töi jämebiti, tö dre dre ie ribekäre ja kräke. Ne madakäre, Jehová tö jondron kwin ie niaratre kräke ye gare kwin ietre, ye medenbätä orasion kwetre ye kan ngäbiti ta Ngöbökwe angwane, niaratre tä jondron kärere ye ñaka ai bianta ietre akwa tätre kain ngäbiti töi kwinbiti. *
Kukwe Bibliabätä dianinkä ñäkäkäre sö ne kräke:
Lucas 7 nemen 21
^ párr. 2 Nitre kirabe nämene nitre menteni kain ngäbiti ño ye Jesukwe kukwe bämikani tä mike gare. Nitre kadre ngäbiti ye nämene ütiäte krubäte nitre Judea kräke. Nitre ja mräkäre nämene ban ribere jai ye ererebätä nämene sribere ja kräke, nämene krüte ie angwane, nämene niken kärere nitre ruäre nünanka bäre yei. Ne madakäre, nitre ja mräkäre bobre ye jökrä nämene kübien ja käntibe kä kübiakäre yekänti, aune metrere nämene kübien tibienta, ye medenbätä ni iti nämene nüke krö angwane nämene nitre mada mike nüke ngwäte.
^ párr. 4 Jesús nämene käre nitre mike töbiketari kukwe ütiäte o kukwe bäri ütiäte yebiti, nämene “bäri moto kuin” niere ye ngwane. Ni iti ja tötikaka kri tä mike gare: “Kukwe nieta kena ye tä nemen metre, akwa kukwe nieta bobukäre ye ngwane tä nemen bäri metre”.
^ párr. 5 Mäkwe oradre ño Ngöböi ne kwe niarakwe mä kukwe nuadre yebätä mä törba kukwe mada mikai gare jai angwane, mä raba ja tötike tärä ¿Dre drieta erametre Bibliakwe? yebätä kapitulo 17 yekänti, nitre testiko Jehovakwe käkwe sribebare.
