Juta Turku mrenkräbätä yekänti nitre sribire krubäte abokän känti ti ririabare. Ti rün ganamane ja meta yebiti, aune ti bätä ti eteba köre nun nämä ja kite ja meta yebätä arato. Ti nämä näin kwelate ye ngwane nitre tö nämä ja metai tibe yebe ti nämä ja mete. Ti nämä bati ye ngwane ti nämä ja kete nitre ni mada kämikaka yebe, aune nitre nämä ni mada nuainne bäri tare ye erere ti jataba nuainne arato. Musika heavy metal ye rababa gare tie arato, ye käkwe ti töi mikaba ja mike ni musika rock täkäkä bäri ütiäte ye kwrere.

Tikwe tambores musika täkäkäre kökaba ja kräke, ye bitikäre nitre mada känänba tikwe musika täkäkäre jabe akwa ti abokän rababa kantaka. Kä musika täkäkäre yekänti ti nämä ja ngwen kä ngwarbe ni dokwäbiti ye kwrere. Nun nämä ja bämike ni jürä ngwandre jabätä kwrere ye nämä nemen tuin bäri kwin jankunu nitre kwati yei. Nun nämä nemen musika täke nitre kwati okwäkänti aune nun nämä discos ruäre grabare, nunkwe disco grababa mrä ye rababa kwin nitre ni mada kitaka musika täkäkäre ye kräke. Kä 1980 rababara krüte ye ngwane nun rikaba Estados Unidos musika täkäkäre aune discos ye rürübäinkäre. Juta Nueva York bätä Los Ángeles yekänti nunkwe musika keta kabre täkäba aune nun rikadreta Finlandia ye känenkri nunkwe blitaba nitre ie musika täkä gare yebe.

Nitre ben ti nämä musika täke yebe ti tö nämä näin käre, akwa ti tö nämä kukwe bäri ütiäte nuaindi ja nire tikwe yebiti. Nitre kwati nämä musika täke arato aune sribi ye ñaka nuäre nuaindre ye käkwe ti mikaba töbike krubäte; ne madakäre, ti ñaka nämä kukwe ütiäte nuainne ja nire tikwe yebiti, ye ñaka nämä kä mike juto tibätä. Ti nämä ja ngwen käme krubäte, yebätä ti kukwai ñukwäte jürä nämä tibätä. Ngöbökwe ñaka ti kain ngäbiti jire nämä ruin tie, akwa nitre nänkä kukwe ngwarbe yebätä täräi keta kabre yete ti nämä kukwe känene kukwe nämä ti mike töbike ye mikakäre gare jai aune ti nämä ja di kärere krubäte Ngöböi.

Nünankäre, ti nämä sribire obisina tärä juankäre yekänti. Bati rababa gare tie ni nämä sribire tibe ye testiko Jehovakwe. Jötrö ngwarbe tikwe kukwe ngwantariba krubäte ie. Kukwe ye mikaba gare kwe tie Biblia yebiti ye käkwe ti töi mikaba kukwe ye mike gare jankunu jai, ye medenbätä tikwe ja tötika Bibliabätä kömikaba ben. Bämän rikaba braibe ta angwane, nitre ben ti nämä musika  täke yei kukwe kwin krubäte mikaba gare, niaratre nübaiba musika täke aune discos grabare biti rürübäine kä Estados Unidos yekänti. Kukwe ngöräbe kwin nämä ti kräke rababa ruin tie.

Ti törbaba disco mada grabai tikwe nieba ni Testiko ti tötikaka yei, aune ye bitikäre tikwe ja töi mikai bökän kukwe Bibliabätä ja jie ngwankäre ye mike täte. Niara töbikaba ño ye ñaka nieba kwe tie, ñakare aune kukwe niebare Jesukwe tä Mateo 6:24 yebätä tikwe ñäkädre nieba kwe tie. Yete nieta: “Ni ñakare jire abko rabadre sribire bkänkä nibu kräke”. Jesukwe kukwe niebare ye rükaba gare tie angwane ti töi rababa ñan krütare. Köbö ye bitikäre ni ti tötikaka Bibliabätä ye töi rababa ñan krütare arato, ñobätä ñan aune nitre ben ti nämä musika täke yebe tikwe ñaka musika täkäi jankunu ne kwe ti rabadre näin Jesús jiebiti tikwe mikaba gare ie.

Biblia rababa ñuai okwä kwrere ti kräke aune ti nämä ja mike ngite ye abokän rababa mike gare tie (Santiago 1:22-25). Ti nämä ni mada nuainne tare krubäte ye rababa gare tie: ti nämä bike kri aune ti tö nämä krubäte jondron ie ja kräke, ti nämä ñäke käme, ti nämä ja mete ni madabe, ti nämä sö duen aune ti nämä dö ñain krubäte. Kukwe Bibliabätä ja jie ngwankäre ye erere ti ñaka nämä ja ngwen ye rükaba gare tie angwane, ti rababa rubun akwle ja kräke. Akwa ti ja töi mikaba kwatibe ja töi kwite (Efesios 4:22-24).

Tikwe ja ngwani käme ye nämä nüketa ti töite angwane, nämä metrere ti miketa rubun ja kräke. Akwa, ni ti tötikaka ye ti dimikaba krubäte. Biblia tä dre niere ye mikaba gare kwe tie, Isaías 1:18 yekänti: “Munta ja mike ngite ye rabai [jondron] tain träte kwrere, akwa kwitai ngwen nieve kwrere”. Bersikulo ne aune bersikulo mada Bibliabätä ye mikaba gare bäri kwin tie, ni Rün kä kwinbiti ye ni mike tuin bobre jai aune nire nire tä ja töi kwite kukwe käme nuainbare kwe yebätä aune tä tuenmetre ye niara tö dimikai.

Jehová rababa gare tie aune ti rababa tarere ye ngwane, ti töi rababa ja diankabätä mento niara kräke (Salmo 40:8). Juta San Petersburgo (Rusia) yekänti, nitre testiko Jehovakwe käkwe gätä kri känti nitre juta madate nübaita nuainba kä 1992 ye ngwane tikwe ja ngökaba ñöte.

Ja ketamuko kwin namanina kwati krubäte tikwe juta Jehovakwe yete. Nane nane nunta ja ükökrö musika kwin täkäkäre aune jondron kwin biani Ngöbökwe tie yebiti nunta kä ngwen juto jabätä (Santiago 1:17). Tita gure kristina ben, ye köböire kukwe kwin krubäte tä tikwe. Niara yebe gwairebe kätä juto tibätä aune kukwe tare yebe nunta ja tuin gwairebe bätä ti töita ño ye tita mike gare ie.

Tikwe ñaka ja mikadre testiko Jehovakwe akräke, ti ñaka tädre nire kä nengwane. Käne ti nämä käre kukwe tare mike ja kisete, ti nämä ja mike kukwe kri te ye ti nämä ükete aune bätäräbe ti nämä ja mike kukwe mada tare te. Akwa kä nengwane tita kukwe ütiäte nuainne ja nire tikwe yebiti ruin tie aune kukwe jökrä tä nemen bare kwin jatäri tie.