TÖBIKE kukwe nebätä, ja ketamuko mäkwe ütiäte mä kräke käkwe jondron nuaindre akwa ñobätä nuaindre kwe ye ñaka rükadre gare mäi. Kukwe nuaindre kwe yebätä nitre ruäre rabadre ñäke rüere aune niara ye ni mikaka ja tare nike nie rabadrebätä. ¿Mäkwe ja mikadre jötrö ngwarbe niaratre yekri, o ja ketamuko mäkwe yekwe dre niedi ye mä rabadre ngübare? Niara ñaka tädre yete kukwe ye mikakäre gare angwane, ¿mä rabadre kukwe ye ngübarebätä bätärekä aune töbiketari kukwe meden niarabätä abokän ñaka gare mäi ye mikakäre gare jai?

Mäkwe kukwe ye mikadre gare jai känenkri, bäri kwin mä rabadre kukwe ne ngwentari jai: “¿Kukwe gare nuäi tie ja ketamuko tikwe yebätä? ¿Ñobätä ütiäte ti kräke?”. Töbikadre ne erere ye kwin krubäte, ¿ñan ererea? Ye erere arato, Ngöbö ni mikaka ja tare nike nikwe niedre ye känenkri bäri kwin ni rabadre töbiketari kukwe meden Ngöböbätä abokän ñaka gare nie ye mikakäre gare jai.

Ngöbökwe jondron ruäre nuainbare o tuanimetre nemen bare ye ñaka raba nüke gare mäi. Nitre kwati rabai niere mäi niara ye töi käme aune nitre ye rabai mä töi mike ñäke rüere niaratre tä nuainne ye erere. ¿Mäkwe ja töi mikai kukwe ye mike gare bäri jai ye köböire kukwe kwin rabai mäkwe? Niara gare kwin mäi o ñakare ye aibe köböire mä rabai kukwe ye nuainne. Mäkwe ngwantari jai: “¿Ngöbö ja ketamuko tikwe ye tita mike tuin ño jai?”.

Mä ñaka nüne kwin angwane, Ngöbö ye ñaka ja ketamuko mäkwe mä raba nütüre. Akwa mä raba töbiketari: ¿kukwe tare ben mätä ja tuin yebätä Ngöbö ye ngite, o niara ye tä jondron kwin mike nemen bare mä kräke? Nibira gare nie ye erere, Satana ye “tä ni jökrä dänkiene kä nebtä” (Juan 12:31). Ye medenbätä nitre tä ja tare nike krubäte yebätä niara ngite metrere. Aune kukwe keta kabre ben nita ja tuin ye ni ngite yebätä o dre rabai bare ñaka gare jabätä nie ye kisete, ¿ñan ererea?

Akwa, ¿Ngöbö abokän käkwe dre nuainbarera? Biblia tä niere Ngöbö ye kä kwinta aune Kä tibien Sribekä; jondron sribebare kwe ye ngätäite ni ngrabare ye tä, abokän sribebare kwin krubäte kwe, aune nita murie jäke, bätä ja nire nikwe, ye tä niara kisete (Salmo 124:8; 139:14; Daniel 5:23). ¿Kukwe jökrä ne tä dre mike gare nie?

Tä mike gare nie ja nire nikwe ye tä gare niarai (Hechos 17:28). Jondron keta kabre bä nuäre kä nebätä tä ni bäre, ja tare aune ja ketamuko, jondron bänä nuata, ni kwata ruin, ni kukwe ruin nie, jondron rä ruin nie..., ye jökrä Ngöbökwe biani nie (Santiago 1:17). Erametre kukwe kwin bianta kwe nie ne tä niara mike Ja Ketamuko kwin nikwe abokän ni rabadre tarere aune tö ngwen ie, ¿ñan ererea?

Akwa yebiti ta, ñaka raba nemen nuäre mä kräke tö ngwankäre Ngöböi. Niara jämi gare kwin mäi mä raba nütüre, aune ye nüke gare. Kukwe keta kabrebätä Ngöbö ni mikaka ja tare nike nitre ruäre tä niere, ye ni ñaka raba kädriere jökrä kukwe kädrieta braibe nekänti. Akwa ¿nikwe ja di ngwandre niara mike gare bäri kwin jai ye ñan bäri ütiäte? * Gare kwin nunye mäkwe ye erere nuaindi angwane, kukwe metre rabai gare niarabätä mäi. Ngöbö ñaka ni mikaka ja tare nike. Ñakare aune: “Ngöbö abokän ja tarekä” (1 Juan 4:8, TNM).