Ti nünanka Texcoco. Ti därebare ye ngwane, Texcoco yekänti ji kwin ñaka nämä. Törö tie nitre nünanka kä mada nun bäre yekänti nämä kite burros yebiti jondron ngwena ere rürübäindre. Nun ja mräkäre nüne bobre ngätäite ti ririabare aune nun ni ökän jai akwa ti abokän ni kükükäre. Ti rün nämä huaraches ükete (o sandalias cuerore ye ükete), kä nämä kwä kükü tibiti ye ngwane niara krütaba. Ti meye ja tare nikabare krubäte nun ngübakäre.

Niara ruai nämene violín täke aune nitre musika täkäkä ye jie ngwan nämene kwe musika kirabe täkä nämene iglesiate yebätä. Mräkätre jökrä bäsi nämene jondron musika täkärä ye ngö mike kukwe nuara; ti meye nämä kantare siba iglesiate aune ti grü nämä ópera kantaire aune piano täke. Kukwe drie nämä nunye iglesiate ye nun nämä mike täte krubäte. Ñodre, ti nämä nitre sacerdote dimike iglesiate aune ti tö nämä ja tuai misionero Iglesia católico yete. Akwa película känti nitre ja mete kisebiti aune ngotobiti ye ti nämä tuin krubäte, aune ti nämä tuin bäri ye ngwane, nämä ti töi mike bäri ni mada nuainne tare.

Juta Puebla yekänti kwela nitre iglesiate kräke känti nitre tötika nämä yete ti rikaba. Ti tö nämä ja tuai sacerdote, akwa ja tötika jatabara krüte tie ye ngwane Iglesia ye ti mikaba ulire krubäte. Meri bati monja rababa ti nike ne kwe ti rabadre ja mike gure ben, kukwe yebe tikwe ja tuaba, aune tikwe kä ngwanba nüke jai kukwe yebätä, akwa yekwe ti töi mikaba ja mike gure. Arato sacerdote ruäre nämä kukwe driere ye erere ñaka nämä nüne rababa tuin tie. Ja känenkäre kukwe ie  ti tö nämä ja kräke yebätä tikwe ñaka ja töi mikaba mada.

Conservatorio Nacional de Música Juta México yete tikwe ja töi mikaba ja tötike musika täkäbätä. Ti graduaba ye bitikäre, tikwe ja mikaba gure aune monso rababa nibokä tikwe. Gätä nuain nämä iglesiate ye ngwane ti nämä kantare, sribi ye nuain nämä tikwe.

Nunkwe ja mikaba gure ye bätäräbe nun ñaka rababa nüne kwin jabe. Ti muko aune ti, nun ñaka nämä ja ngübare kwin kwärikwäri, ñobätä ñan aune nun nibu nämä mokrere krubäte jabiti. Kena nun nämä ñäke jerekäbe kukwere jai, akwa ye bitikäre nun jataba ja mete kwärikwäri. Kä kwäjätä biti komä te nun nämä gure jabe ye bitikäre nunkwe kä mikakaba jabätä, aune ja känenkäre nunkwe ja tuametreba.

Ti jämi ja denkä mento ti muko yebätä angwane nitre testiko Jehovakwe rababa gare kena tie. Niaratre nibu rükaba ti gwirete aune ja tötika Bibliabätä drieba kwetre tie. Kukwe nämä gare krubäte tie ti nämä nütüre, yebätä tikwe ja tötika ka ngäbitiba mikakäre gare ietre niaratre nämä kukwe driere ye ñaka metre. Tikwe kukwe ñaka nuäre ngwantariba ietre ne kwe ñaka mikai gare kwetre tie ti rababa nütüre, akwa kukwe ye jökrä mikaba gare kwetre tie Biblia yebiti ye käkwe ti töi mikaba ñan krütare; ye ngwane kukwe ñaka nämä gare krubäte tie rükaba gare jabätä tie. Ti muko ye ñaka nämä nitre Testiko ye mike ütiäte jai aune ti abokän kisete sribi nämä krubäte, yebätä ti ñaka rababa niaratre kain ngäbiti jankunu.

Kä rikaba kwärike ta ye bitikäre, ja kwanbata tie nitre testiko Jehovakwe yebe. Kä ye ngwane ti nämä nüne Elvira ben, aune ti nämä niaratre kain ngäbiti ja gwirete ye nämä nemen kwin kräke, yebätä tikwe ja tötika Bibliabätä kömikabata. Akwa, ti nämä ja ngwen käme ye tuametrekäre kä rikaba kwati ta tibiti.

Erametre ti tö nämä Jehová mikai täte angwane, ti rabadre kukwe käme nuain nämä tikwe ye tuenmetre rükaba gare tie. Ye nuainkäre, kena ti rabadre sribi nuain nämä iglesiate tikwe ye tuenmetre aune ti rabadre sribi mada känene nünana jai (Apocalipsis 18:4). Ne madakäre ti rabadre ja mike gure metre Elvira ben.

Akwa ti nämä nemen jötrö rubun krubäte ye kukwe keteiti abokänbätä ñaka nämä nemen nuäre ja gobrainkäre tie. Bersikulo ketebu Bibliabätä käkwe ti dimikani krubäte. Salmo 11:5 käkwe mikaba gare tie ni ni mada nuainkä tare ye kräke Jehová brukwä, aune 1 Pedro 3:7 käkwe mikaba gare tie Ngöbökwe orasion tikwe kukwe nuadre ie ti tö angwane, ti rabadre ti muko mike ütiäte jai. Bersikulo ketebu yebätä tikwe töbikatariba aune tikwe ja di käräba Jehovai; bätärekä jatäri ti ñaka jataba nemen rubun jötrö ngwarbe.

Kä nengwane tita nüne kä jutobiti ti mräkätre ben. Tita ja di ngwen ja mäkäkäre kwin monsotre ti muko käne yekwe ben aune ti mräkätre tä nüne tibe ye tita dimike tödekakäre kwatibe.

Ti nämä chi ye ngwane ti tö nämä ja tuai sacerdote nitre mada dimikakäre; akwa nengwane ni mada dimikadre ño ye gare metre tie, aune ye tä ti mike kukwe ütiäte nuainne ja nire tikwe yebiti. Kä nengwane tita nitre mada tötike musika täkä yebätä, sribi yebiti tita ti mräkätre ngübare. Jehová tä ti ngübarebätä bätärekä yebätä tita debe bien krubäte ie, ñobätä ñan aune niarakwe kä biani ja töi kwitakäre tie aune ja ngwankäre kwin.