¿Ni madakwe mä mikanina tuin ngwarbe jai? ¿Mäkwe ja di käräbare o sribi ribebare ye ñaka biani mäi, o mä kwata bä jene, mä nüne juta madate o mä bobre yebätä mä mikani tuin ngwarbe jai? Ye erere ngwane, nun törba kukwe kwin mikai gare mäi: nitre jökrä töita ye erere ja kräke kwärikwäri, akwa Ngöbö abokän töi ñaka ye erere. Apóstol Pedro kukwe metre niebare: “Ngöbö abrä ñan [...] ni kitete”. (Mäkwe ñäkä Hechos 10:34, 35 yebätä, Ngöbö Täräe [NGT], tärä okwä ükaninte.)

Ni kädeka nämene Cornelio ye gwirete Pedrokwe kukwe ye niebare. Kukwe ne ütiäte ñobätä ñan aune Pedro ye ni Judea akwa Cornelio abokän ñaka ni Judea. Kä ye näire, nitre Judea yei nitre ñaka Judea nämene tuin käme aune ñaka nämene ja kete jire chi bentre. Akwa, ¿ñobätä Pedro nämene Cornelio gwirete? Jehovakwe nuainmanabare ie yebätä. Pedro ie kukwe ne niebare köböre: “Ngöbökwe jondron mikani kwin, mä ñan tärä bianka käme”. Jändrin se kwrere ángel niebare Cornelio ie köböre, niara rabadre ni juen Pedro kärere, ye ñaka nämene gare Pedro ie (Hechos 10:1-15, NGT). Nitre rabadre ja ükaninkrö ye Ngöbökwe ükaninte nükani gare apóstol Pedro ie.

Pedro niebare: “Metre bökänä nü gare tie, Ngöbö abrä ñan [...] ni kitete” (Hechos 10:34, NGT). Kukwe griekore kwitani “ni kitete” ye abokän “ni ni mada ngwäre mikaka ñärärä” gärätä (Nueva Concordancia Strong Exhaustiva). Ni ja tötikaka Bibliabätä kukwe ye mikani gare krörö: “Ye abokän ni kukwe ükatekä tä nikren ni mada ngwärebätä aune ye aibebiti tä kukwe ükete. Ni ye tä mate kwinbätä o ñakare ye aibebätä tä kukwe ükete, aune ñaka kukwe ye mike gare kwin jai”. Ngöbö töi ñaka ye erere, ni kwata bä jene jene, ni nüne juta jene jene te, ni jondron bäkäne o ñakare, aune kukwe mada ye ñan aibätä tä ja mike nitre yekri.

Ñakare aune, ni brukwä ye mikata ñärärä Jehovakwe (1 Samuel 16:7; Proverbios 21:2). Pedrokwe niebare: “Juta ño kwa te, niara jürä ngwanda nirekwe, angwane nire tä jondron kwin nuainne, ye nie abrä tuin bobre [...] ie” (Hechos 10:35, NGT). Ngöbö jürä ngwandre jabätä nieta ye abokän nikwe mikadre ütiäte jai aune tö ngwandre ie, bätä dre dre tuin käme ie ye nikwe ñaka nuaindre. Jondron kwin nuaindre nieta ye abokän dre dre tuin kwin Ngöböi ye nikwe nuaindre töi bökänbiti. Nitre tä jondron kwin nuainne brukwä kwinbiti aune töi bökänbiti ye kräke niara töi kwin (Deuteronomio 10:12, 13).

Mä mikanina tuin ngwarbe jai angwane, Pedrokwe kukwe niebare yekwe mä dimikai. Jehová tä nitre kä jökräbiti tibien töi mike näin ja kokwäre ne kwe rabadre mike täte (Juan 6:44; Hechos 17:26, 27). Nitre kwata bä jene jene, nitre nüne juta jene jene te o nitre bobre o jondron bökäne tä niara mike täte ye tätre orasion nuainne ye tä kukwe nuin aune dre ribeta kwetre jai ye tä mike nemen bare kräketre (1 Reyes 8:41-43). Kä kwinbiti niara okwäta nibätä ye ngwane, tä ni kä tibienbätä jökrä mike ñärärä. Ye tä mä töi mike Jehová, Ngöbö ñaka ni kitete ye mike gare bäri jai, ¿ñan ererea?