Estelle, * nämene niken käre iglesiate monsotre kwe yebe, tö namani kukwe Bibliabätä mikai gare jai niebare kwe pastor ie, pastor ñaka niara dimikani, yebätä ñaka nänbare jankunu kwe iglesiate. Niebare kwe: “Nitre iglesiate tärä juani ti kräke aune tärä yebätä niebare kwetre ti ñaka raba näin jankunu iglesiate angwane, tikwe ngwian jakwe juandre. Niaratre tö namani ngwian diainkä tikän ye rükaba gare tie.”

Angelina, tä kirabe kukwebätä, käkwe niebare: “Iglesia tikwe yete bämä jondron ngwian ngwäre ye ngwan nämä gwita gätä nuain nämä ye ngwane, aune batire batire ngwan nämä gwita ye ngwane nunkwe ngwian kitadre te ribe nämä nunye. ‘Ngöbö ñaka tä nitre yebe’, tikwe nütüba”.

Iglesia meden meden gare mäi, ¿yete nitre tä kukwe keta kabre nuainne nitre mikakäre ngwian bien ja dibiti? ¿Kukwe nuainta kwetre ye erere drieta Bibliakwe?

Jesús, ni kukwe metre ükatekä käkwe niebare: “Munkwe jondron ne kani ngäbiti ngwarbe, angwane bian ngwarbe arato munkwe” (Mateo 10:8, Ngöbö Täräe, tärä okwä ükaninte). Kukwe ütiäte Bibliabätä ye rürübäin ñaka raba aune ni jökrä ie driedre.

¿Nitre kristiano kena nämene dre nuainne jondron konkrekasion kräke ye ütiä biankäre?

Nitre itire itire nämene ngwian bien nämene nütüre ‘nuäi nuäi ja brukwäte ye ererebätä, ñaka nämene bien ja moto ulirebiti aune ñaka nämene bien ni mada nämene biamana ietre yebätä, ñobätä ñan aune kä nuäre nibätä ngwian biankäre, ni ye abokän Ngöböta tarere’ (2 Corintios 9:7). Apóstol Pablo nämene jondron kwata sribere jure rürübäindre ye ngwiainbiti nämene ja ngübare sribikäre Ngöbö kräke (Hechos 18:2, 3). Niebare kwe: “Nun nämane Ngöbö kukwei kuin [...] kädriere munbe angwane [...]. Nun nämane sribire tare dibire rare, ñobtä ñan angwane nun ñan tö namani sribi mikai mun kötärä” (1 Tesalonicenses 2:9).

Ju gätä nuainkäre nitre testiko Jehovakwe ie ye kädekata Ju ja Ükarakrö, aune ñaka tä sribebare jondron ütiäte ütiäte yebiti. ¿Tätre dre nuainne jondron ütiä biankäre? Nitre Testiko ñaka jondron ngwian ngwäre ye ngwen gwita aune ñaka sobre juen ngwian ribekäre. Ñakare aune, nire nire kräke kukwe ja üaire drieta ye ütiäte abokän raba ngwian kite ngwian ngwä tä Ju ja Ükarakrö känti yete.

Täräkwata sribeta ye imprimita aune juanta ye ütiäre ngwian bianta krubäte. Akwa täräkwata yebätä kukwe mika ñaka gare ngwian ganainkäre aune ñaka ngwian ribetabätä arato. Sribeta ne kwe kukwe metre Bibliabätä rabadre gare ni madai.

¿Nibi tuin ño mäi? ¿Jesús kukwe niebare aune nitre kristiano kena kukwe bämikani ye erere nuainta jondron ütiä biankäre raba ruin mäi?