Alberto, sribibare bäsi kä kwäjätä Ni Rükä ye kwrere, tä mike gare: “Sacerdote nitre rükä jie ngwanka käkwe nieba nunye: ‘Ngöböta munbe’. Akwa ti nämä nütüre: ‘Biblia tä niere: “Ñaka ni mada murie ketadre”, ¿se ño mada tita niken ni mada murie kete?’”.

Rübare Kri Bobukäre ye ngwane Ray sribibare ni rükä ye kwrere Ru Mrente yebiti. Bati niarakwe ngwanintari sacerdote nitre rükä jie ngwanka ie: “Mätä näin rute nuen aune mätä orare nun rükä kräke bätä nunkwe ganandre ribeta mäkwe orasionte. Akwa nitre nun rüe tä ye erere nuainne, ¿ñan ererea?”. Sacerdote nitre rükä jie ngwanka käkwe niebare ji ni Däkienkwe ye ñaka raba nüke gare.

¿Kukwe niebare ye ñaka nibi tuin kwin mai? Ñaka töbika, mä ñan aibe töita kore.

Jesukwe kukwe keteiti bäri ütiäte niebare ye tä niere krörö: “Mata ja tarere au, ye kwrere makwe ni mda mda tare arato” (Marcos 12:31). ¿Nitre nünanka ni käite ye aibe ni rabadre tarere niebare kwe? Ñakare. Nitre ja tötikaka ben yei niebare kwe: “Munkwe ja taredi kwärikwäri ngwane, mun abrä nitre ja tötikaka tikwe rabai gare nitre jökrä ie” (Juan 13:34, 35, Ngöbö Täräe, tärä okwä ükaninte). Niaratre rabai ja tarere krubäte köböire töi ñaka nitre mada erere rabai gare. Niaratre ñaka ni mada murie ketai ye ñan aibebätä töi nämene, ñakare aune töi nämene juto biare ja nire kwetre ye bianbätä ni mada kräke.

Aune ye erere nuainbare kwetre. Tärä enciclopedia tä mike gare: “Tertuliano aune Orígenes, nitre ji ngwanka Iglesiate kena, nämene niere nitre kristiano ñaka rabadre ni mada murie kete, kukwe ye ñaka nämene niaratre mike sribire ni rükä ye kwrere nitre Roma rükä yebe” (The Encyclopedia of Religion).

Nitre testiko Jehovakwe tä bäsi kä jökräbiti tibien. Kä medenkänti rü tä nakainkä yekänti nitre Testiko tä nüne angwane, tätre ja tarere kwärikwäri ye bämikata kwetre.

Ñodre, kä 1994 yete nitre hutus aune tutsis rübare jabe juta Ruanda yete angwane, nitre testiko Jehovakwe ñaka ja mikani jire rü yete. Nitre Testiko hutus aune tutsis ja nire mikani kukwe tare te, akwa yebiti ta ja kriemikani kwärikwäri kwetre. Nitre Testiko hutus mräkätre kukwebätä tutsis kriemikani yebätä niaratre nibu nakani ngite nitre rükä Interahamwe yei angwane, niaratre kukwe ne niebare ietre: “Munta nitre tutsis dimike yebätä kukwe ne tä nemen bare munbätä”. Aune niaratre nibu murie ketani (Juan 15:13).

¿Nibi tuin ño mäi? ¿Ja taredre bökän niebare Jesukwe erere nitre yekwe nuainbare raba ruin mäi?