Herman kän muko krütani, aune Linda ja tuanimetre muko kwe ben, ja namani gare ietre ye käi juto bätätre. Akwa, ja mikata gure bobukäre ye ngwane kukwe ruäre tä nakainkä nitre gurebätä ñaka namani bare kena erere ye nüke gare ietre. *

Mäkwe ja mikaninta gure angwane, ¿ye tuin ño mäi? Tamara, ja tuanimetre, ye bitikäre kä nikani komä ta angwane ja mikaninta gure kwe, tä niere: “Mätä ja mike gure kena ye ngwane mäkwe nünain käre mä muko ben nemen ruin mäi; ye käita nemen juto mäbätä. Ja mikata gure bobukäre ye ngwane ni töi ñan nemena ye erere, ñobätä ñan aune ni gure raba nementa kaibe ye ñan nemen tuin era nie yebätä nita nemen töbike jankunu”.

Akwa, nitre kwati ja mikaninta gure ye tä nüne kä jutobiti muko kwe yebe, ¡aune ye erere mä raba nüne arato! ¿Dre nuaindre? Kukwe ketamä ben ja tuata  aune kukwe Bibliabätä ja jie ngwankäre raba mä dimike ño ja tuakäre kukwe yebe ye ani mike gare jai. *

Ellen, nünanka Sudáfrica tä niere: “Ti nämene nüne ño ti muko käne ben ye käre nüke törö tie, metrere nun nämene kä denkä ngwarbe jai basakäre kä madakänti, yekänti tita niken ti muko ben ye ngwane tä nüketa törö tie. Ruäre ngwane ti nämene nüne ño ti muko käne ben aune tita nüne ño ti muko tä tibe yebe yebätä tita töbike.” Mä muko ye nämene gure käne angwane, käre tädre blite muko käne yebätä ye ruäre ngwane ñan rabai mate kwin mäbätä.

KUKWE NIETA: Mäkwe nünanbare kä kwati te mä muko käne yebe o mä muko tä mäbe yekwe nünanbare kä kwati te muko käne yebe, yebätä ñan raba käi nikwitekä jötrö munbiti ye mäkwe mika nüke gare jai. Ñodre, nitre gure ruäre tä muko kwe kädeke muko käne ye käbiti nieta kwetre. ¿Mäkwe dre nuaindre ja tuakäre kukwe ye erere ben? “Ja raba[dre] ruen ja kwrere jökrä munye”, nieta Bibliakwe (1 Pedro 3:8).

Mä muko rabadre muko käne kädriere angwane mä ñaka rabadre mokrere. Mä muko törbadre blitai muko käne yebätä angwane, töita ño ye mäkwe mika nüke gare jai aune mäkwe kukwe nua. Tä dikaire mäbätä ye mä ñan nütü drekebe ngwarbe. Juan, kän muko krütani akwa kä kwäjätära ja mikaninta gure kwe, tä mike gare: “Käre Kathty tä ti tuenmetre blite ti muko käne yebätä. Ye köböire ñobätä ti töita kore ye tä mike nüke gare jai”. Kukwe ye erere nuaindre angwane, raba mä dimike ja mäke bäri kwin mä muko ben.

Mä muko töi ño aune dre dre nuain gare ie yebätä mäkwe ja töi mika. Mä muko ye ñaka ja ngwen mä muko käne erere, akwa kukwe mada abokän nuain gare ie. Dre dre tä mä töi mike mä muko tarere yebätä mäkwe töbikatari nünankäre kwin ben, akwa ñaka “ja dikaidre” ni madabätä (Gálatas 6:4, Ngöbö Täräe [NGT], tärä okwä ükaninte). Edmond, ja mikanina gure bobura, tä mike gare krörö: “Nitre nibu tä ja ketamukore ye töi ñaka ja erebe, ye erere arato nita nemen gure kena biti ja mikata gure bobukäre ye ñaka ja erebe arato”.

¿Mäkwe nünanbare kwin mä muko käne ben ye ñan rabadre mä muko tä mäbe mike ulire yekäre mäkwe dre nuaindre? Jared tä niere: “Ti muko käne ben ti nämä ye abokän tärä bä nuäre nunkwe tikani ja ñäte ye kwrere nämä tuin tie tikwe nieba ti muko tä tibe ie. Tärä bä nuäre tuateta ye kwrere nun nämene nüne kwin jabe ye ruäre ngwane tita miketa törö jai. Akwa, ti ñan tä kukwe ye aibe ngwenta törö käre jai. Ñakare aune, tärä bä nuäre tikata ye kwrere ti aune ti muko kräke kukwe kwin tä nemen bare ye nunta tike ja ñäte, ye tä ti mike nüne kä jutobiti kä nengwane”.

Javier, ja tuanimetre ye bitikäre kä nikani kwä ti ta ye ngwane ja mikaninta gure kwe, tä niere: “Krire nun ja mikaba gure ye ngwane, ti muko ye ja ngwen ño abokän nitre ja ketamuko tikwe nämä miketari ñärärä rababa ruin ie”. Ne madakäre, Leo tä niere: “Nitre ruäre nämä niere ti okwäbiti ti muko ie, niara muko käne ye nämene törö ietre aune nämene tare krubäte kwetre”.

KUKWE NIETA: Nitre ja ketamuko mäkwe töita ño ye mäkwe mika nüke gare jai. Juan tä niere: “Ja ketamuko käne nikwe ye kräke ñaka nemen nuäre ja ketakäre nibe aune ni muko mrä yebe, ñobätä ñan aune ni täbe ni muko käne yebe ruin ietre”. Biblia tä niere ye erere, nikwe “ja mikadre kwin [...], angwane ja mikadre jäme [...] nitre jökrä kräke” (Tito 3:2, NGT). Mäkwe kä mika niken ta ne kwe mä mräkätre aune ja ketamuko mäkwe töi rabadre jäme mä kräke. Mä nämene nüne mä muko käne ben ye erere mä ñaka niena nüne, yebätä nitre ja ketamuko mäkwe raba nuainne arato. Javier ie tä törö, ja känenkäre niara aune muko kwe ye namaninta ja kete kwin ja ketamuko käne kwetre yebe. Akwa tä niere: “Nunta ja di ngwen ja ketamuko mada känänkäre, aune tä nun dimike arato”.

 Mä tädre ja ketamuko mäkwe ben angwane, mä muko töita ño ye mäkwe ngwan törö jai. Ñodre, mä tädre blite ja ketamuko mäkwe ben ye ngwane munkwe blitadre mä muko käne yebätä angwane, mäkwe ja ngwan töbätä aune mäkwe töbika kwin käne blitakäre ne kwe ja ñaka rabadre ruin ngwarbe mä muko ie. Proverbio Bibliabätä tä niere: “Ni tärä abokän ñaka töbike käne blitakäre ye kukwei tä mate ngitra tu grine tä ni tikekä ye kwrere ni madabätä, akwa nitre töbätä tidrä ye abokän tä ni mada miketa kwin” (Proverbios 12:18).

Andrés, muko käne kä mikaninkäbätä, tä niere: “Ti ngökadreta bobukäre ye jürä nämä tibätä”. Ye bitikäre, ja mikani gure kwe Rita ben. Andrés tä niere: “Rita muko käne töi kwin ye erere ñongwane tikwe ja ngwain ye ti nämä ngwentari jai. Ti töi ñaka kwin rabadre ruin ti muko ie ye ngwane raba ti tuenmetre ni madabätä nämä ruin tie ye nämä ti mike töbike krubäte”.

KUKWE NIETA: Kukwe meden tä mä mike töbike yebätä mäkwe blita mä muko ben. “Blita ñaka kwin jabe kukwe ükatekäre ye ngwane ñaka tä nemen bare kwin”, nieta Bibliakwe (Proverbios 15:22). “Blita[ta] [...] kwin jabe” ye abokän, blitata bökän jabe meden gärätä, yekwe Andrés aune Rita dimikani tö ngwen jai kwärikwäri. Andrés tä niere: “Kukwe rabadre jabätä tie Rita ben ye ngwane tikwe ñaka ja töi mikai jire ja tuenmetre ben tikwe nieba ie, aune ye erere nieba kwe tie arato. Ye bitikäre tita tö ngwen täte ie.”

Mä muko tä mäbe ye muko käne ñaka ja ngwani metre ie angwane, mäkwe ja di ngwan ne kwe mä muko tö ngwandre mäi. Ñodre, Miguel aune Sabrina, niaratre ja tuanimetre muko käne ben, blitadre kwetre muko käne yebe angwane, mikai gare kwetre jai käbämikani kwetre jai. Sabrina tä niere: “Nunkwe kukwe käbämikani jai yekwe nun töi mikani jäme aune nun mikani tö ngwen jai” (Efesios 4:25).

Nitre kwati tä ja miketa gure ye tä nüne kä jutobiti jabe, aune ye erere mä raba nüne mä muko ben arato. Mä muko kena ben ja namani gare mäi, yebiti ta mä muko tä mäbe yebe ja raba nemen gare bäri kwin mäi. Andrés tä niere: “Rita tä ti dimike krubäte. Kä kwäjätä biti komä nun niena jabe aune nun tö krubäte jai; käre ti tö nünain ye erere ben”.