Michelle: Köbö kwin dekä; tita täräkwata nebiti blite nitre nünanka mä bäre yebe. Kädekata ¿Mä törba kukwe metre mikai gare jai? Ti törba täräkwata ne mikaite mäi.

Sofía: ¿Mätä blite Ngöbö kukweibätä?

Michelle: Jän. Kukwe keta ti ngwantarita täräkwata nebätä ye mike ñärärä. ¿Mä törba meden...?

Sofía: Ñan blita jankunu tibe. Ti ñan törba kä juain ngwarbe ta mäkän.

Michelle: ¿Ñobätä mätä kukwe ye niere?

Sofía: Ngöbö tärä o ñakare ye ñaka nemen tuin era tie.

Michelle: Mätä blite metre tibe yebätä tä debe mäi. ¿Käre mätä töbike ye erere?

Sofía: Ñakare, ti nämä chi ye ngwane ti nämä näin iglesiate, akwa mekera ti ñaka niena näin iglesia yete.

Michelle: Nibira gare tie. Akwa, ti jämi ja kädeke mäi. Ti kä Michelle.

Sofía: Ti abokän Sofía.

Michelle: Mä käi nibi juto tibätä, Sofía.

Sofía: Tibätä arato.

Michelle: Ti ñaka ki mä töi mikakäre ja dibiti kukwe mikata täte tikwe ye mike täte, akwa ti törba ngwaintari mäi: ¿Ngöbö tärä o ñakare ye kukwe namanina bare abokän köböite mä ñaka mike era jai?

Sofía: Jän. Kä nikanina 17 ta yete ti meye te karo matani.

Michelle: Ye tare krubäte. ¿Aune juruainbare tare?

Sofía: Ñaka niena dikekä.

Michelle: ¿Metreya? Mätä ulire krubäte raba ruin tie.

Sofía: Jän. Ngöbö tärä, “¿se ñobätä mada tä kukwe ye erere tuenmetre nakainkä? ¿Ñobätä tä ni tuenmetre ja tare nike krubäte? yebätä tita töbike käre”.

Michelle: Jata ruin kore mäi aune mätä kukwe ngwentari ye nierare. Nita ja tare nike ye ngwane, ñobätä kukwe tä nakainkä nibätä ye ni töta tuai nemen gare jai. Ñodre, nitre brare aune merire kirabe Ngöbö mikaka metre täte yebätä kukwe ye erere namani bare arato.

Sofía: ¿Metreya?

Michelle: Jän. ¿Mä törba mikai gare jai?

Sofía: Jän, ti törba mikai gare jai.

Michelle: Habacuc ni Ngöbö kukwei niekä käkwe kukwe ne ngwanintari Ngöböi mike ñärärä. Ani ñäke Habacuc kapitulo 1 bersikulo 2 aune 3 yebätä: “¿Bäbe tibike ja di kärere mäi aune mäkwe ti kukwe nuai, Jehová? ¿Kukwe tare nuainta ni madabätä yebätä bäbe tikwe ja di käräi mäi, aune mäkwe ti mikai kwäre? Ni mada nuainta tare [...], ¿ye ñobätä mätä ti mike tuin?” ¿Mä tärä kukwe ye erere ngwentari jai?

Sofía: Jän.

Michelle: ¿Aune dre gare mäi? Habacuc kukwe ye ngwanintari Ngöböi ye ngwane ñaka mikani ja ngie nuin kwe aune rabadre tödeke bäri ñaka niebare kwe ie.

Sofía: Kukwe ye ütiäte krubäte.

Michelle: Nita ja tare nike ye tuin Ngöböi aune töita kukwe yebätä ye drieta Bibliakwe arato.

 Sofía: ¿Töita ño kukwe yebätä?

Michelle: Tibike mike gare keteiti mäi Éxodo 3:7 yebiti. ¿Mä törba ñäkäibätä?

Sofía: Jän. Tä niere: “Aune Jehová niebare arato: ‘Juta tikwe ye tä ja tare nike krubäte Egipto ye gare metre tie aune nitre tä niaratre mike sribire ja dibiti yebätä niaratre tä ja muaire ye kukwe ruin tie; ñobätä ñan aune niaratre tä ja tare nike ye gare kwin tie’”.

Michelle: Tä debe. Bersikulo ne tä niere ye erere, ¿nitre tä ja tare nike ye tuin Ngöböi?

Sofía: Jän, ye erere raba tuin tie.

Michelle: Aune ñaka tä mike ñärärä jerekäbe. Bersikulo yebätä kukwe nieta mrä ye miketa ñärärä. Ngöbökwe niebare: “Niaratre tä ja tare nike ye gare kwin tie”. ¿Ngöbö töi ñaka nibätä raba kukwe ye erere niere raba ruin mäi?

Sofía: Ñaka, ñakare raba ruin tie.

Michelle: Ni mada tä ja tare nike tuin nie ye ñaka ja erebe ni mada tä ja tare nike abokän nemen tare nie yebe.

Sofía: Ye metre.

Michelle: Kukwe ye ngwen törö jai. Juta Ngöbökwe nämene ja tare nike yebätä ani kukwe mada mike gare jai. Tä Isaías 63:9 yebätä. Bersikulo yebätä kukwe nieta kena tä niere: “Nitre nämene ja tare nike ye ngwane niara namani ja tare nike arato”. ¿Juta Ngöbökwe nämene ja tare nike ye namani tare ie nie raba mäkwe?

Sofía: Jän, ye erere raba ruin tie.

Michelle: Erametre Ngöbö töita krubäte nibätä aune nita ja tare nike ye nemen tare krubäte ie. Kukwe ruäre tä nemen tare nie ye ngwane, niarai tä nemen tare arato.

Michelle: Ti jämi nikenta ye känenkri ti törba kukwe mada mikai gare mäi.

Sofía: Mä raba niere.

Michelle: Biblia tä dre niere Ngöbö die yebätä ye mike ñärärä. ¿Mä raba ñäke Jeremías 10:12 yebätä?

Sofía: Jän, tä niere: “Niara ye kä tibien Sribekä di kwe yebiti, Niara töbätä ye köböire dobro sriberabe kwin kwe ne kwe tädre kärekäre, aune Niara ie kukwe nüke gare ye köböire kä kwinta ye ükaninte kri kwe”.

Michelle: Tä debe. Ani ja tötike jötrö ngwarbe bersikulo yebätä. ¿Ngöbö nämene ja di ribere nuäi jondron jökrä sribekäre raba ruin mäi?

Sofía: Nämene ja di ribere krubäte.

Michelle: Ngöbö die tärä jondron jökrä ni bäre ye sribekäre, ¿die tärä jondron ükatekäre ñan ererea?

Sofía: Jän.

Michelle: Ani bliteta mä meye yebätä. ¿Niara tä ja tare nike ye ñobätä nemen tare krubäte mäi?

Sofía: Ye ti meye aune tare tikwe yebätä.

Michelle: Mä di tärä mikakäreta kwin angwane, mäkwe nuaindre, ¿ñan ererea?

Sofía: Jän.

Michelle: Töbike kukwe yebätä. Nita ja tare nike ye nemen tare Ngöböi aune di tärä nita ja tare nika ye diankakäre gwäune nibi gare nie Bibliabätä. Akwa, ¿tä ja di ngwen ñaka diankakäre ye nüke gare mäi?

Sofía: Käne ti ñan nämene töbike ye erere niarabätä.

Michelle: Akwa kukwe ne ngwantari raba: ¿Ñobätä jämi denkä? ¿Kukwe tare ben nita ja tuin ye kukwe ütiätebätä jämi ükete raba ruin mäi? *

Sofía: Ñaka gare tie, kukwe tärä raba ruin tie.

Michelle: Teléfono mäkwe tä ngö nemenkä. Ye medenbätä, ti jataita mada ngwane mä känti kukwe ye kädriekäre bäri mäbe, ¿raba tuin ño mäi?

Sofía: Jän, raba tuin kwin tie, tä debe. *