¿Dre tärä nemen tare mäi abokänbätä mäkwe muabarera?... * Ye erere namanina bare ni jökräbätä. Akwa ruäre ngwane ni küde o ni ngüre ye ñan ai tä nemen tare nie. Ñodre, ni mada raba kukwe ngwarbe niere nibätä, aune ye raba nemen tare nie, ¿ñan ererea?... Kukwe ngwarbe nieta Ngöböbätä ye tä nemen tare ie arato. Ani blite kukwe yebätä aune nikwe dre nuaindre kä mikakäre jutobätä ye ani kädriere.

Nitre ruäre nämene Ngöbö tarere krubäte nie nämene kwetre akwa niaratre arabe “nämenentre mike ulire” nieta Bibliabätä. Niaratre nämene Ngöbö “mike ulire” ye bämike ja töite. Akwa, ¿ye tä nemen bare ño? Ni ñaka Ngöbö mike täte ye ngwane ñobätä tä nemen ulire ye ani mike gare jai.

Jehovakwe nitre nibu sribebare kena Kä tibienbätä yekwe mikani ulire krubäte. Niarakwe mikani nüne kä bä nuäre kädeka nämene jardín “Eden” yekänti. ¿Nitre ye kädeka nämene ño?... Adán aune Eva. Dre nuainbare kwetre ye ani mike gare jai.

Jehovakwe Adán aune Eva mikani nüne jardín yete, ye bitikäre niaratre kä ye ngübadre kwin niebare kwe ietre. Niaratre rabadre monso ngübare aune nüne kärekäre kä yekänti niebare kwe ietre arato. Akwa niaratre monsoi jämi nemen ye känenkri kukwe tare namani bare. ¿Dre nakaninkä gare mäi?... Ángel iti käkwe Eva töi mikani ñaka Ngöbö mike täte. Biti Adankwe ñaka Ngöbö mikani täte arato. Namani bare ño ye ani mike gare jai.

Ángel kulebra mikani blite Eva ben. Eva “rabadre Ngöbö kwrere” niebare ie ye namani tuin kwin  ie. Biti dre nuaindre kwe ye kulebra niebare ie aune ye erere nuainbare kwe. ¿Dre nuainbare kwe gare mäi?...

Jehovakwe kri ngokwä ñäkäibare ie ye kwetani kwe. Ngöbö jämi Eva sribere känenkri, niebare kwe Adán ie: “Krita nete ne, ma tö raba mden mden ngwäkä kwetai, erere makwe kweta, akwa kri dre kuin btä dre käme mikakrä gare, se ngwäkä makwe ñan tö ngwian kwete jire chi, ñobtä ñan angwane makwe kri ngwäkä se kwetadre angwane, ma krütadi”.

Kukwe ükaninte ye nämene gare Eva ie, akwa okwä namani kri yebätä aune “kri ngwäkä ye namani tuen nuäre nuäre ie, namani tuen bänänte ie. [...] aisete kri ngwäkä ye ötani kwe bti kwetani kwe”. Biti biani kwe Adán ie aune Adankwe “kwetani arato”. ¿Ñobätä nuainbare kwe raba ruin mäi?... Ñobätä ñan aune Eva nämene bäri tare kwe Jehová yebiti ta, aune dre nämene tuin kwin Eva ie ye erere nuainbare kwe. Akwa Ngöbö mikadre täte ni mada yebiti ta ye bäri ütiäte, ¿ñan ererea?

¿Kulebra blitabare Evabe ye törö mäi? Ni iti nemen muñeco mike blite ye kwrere ni iti käkwe kulebra mikani blite. ¿Nire kukwei namani ngitiekä kulebra ye kadate raba ruin mäi?... Ye abokän “tbi kira, arabe kädekata Diablu amne Satana” kukwei.

¿Mäkwe dre nuaindre kä mikakäre juto Ngöböbätä gare mäi?... Käre mäkwe mikadre täte. Satana raba ni jökrä töi mike ja mike täte aune ñaka Ngöbö mike täte nieta kwe. Yebätä, kukwe nebiti Jehová tä mäträre nibätä: “Mäkwe ja ngwan töbätä monso tikwe [o ti ngängän], bätä kä ngwan juto ti brukwäbätä, ne kwe kukwe kwandre niedre tie, ni kätä ñäke ti rüere yei”. Satana tä “ñäke [Jehová] rüere” nieta, ye abokän tä niara kötaire gärätä. Niara raba ni jökrä töi kwite ne kwe ñaka rabadre Ngöbö mike täte nieta kwe. Mäkwe Jehová mikai täte aune mäkwe sribidi kräke angwane, kä rabai jutobätä. ¿Mäkwe ja di ngwain nuainne?...