¿Jondron meden biandre mäi abokän käi rabadre bäri juto mäbätä? Ni madakwe mä tare yebätä jondron biandre kwe mäi aune biandre kwe ja töi jeñebiti mäi ye käi rabadre juto mäbätä. Nitre ruäre tä jondron bien töi ñobiti nie ye ütiäte, ¿ñan ererea? Ye käi nemen juto nibätä angwane, Ngöböbätä bäri käi nemen juto. Ñodre, apóstol Pablo kukwe niebare abokän tä 2 Corintios 9:7, [Ngöbö Täräe, tärä okwä ükaninte] yebätä töbike.

¿Ñobätä Pablokwe kukwe ne tikabare? Ñobätä ñan aune nämene nitre kristiano Corinto dimike ne kwe ja töi mikadre kwetre ja mräkätre kukwebätä nünanka Judea nämene dre ribere jai ye dimike. ¿Nämene nitre Corinto ye töi mike jondron bien ja dibiti? Ñakare. Kukwe ne niebare kwe ietre: “Mun itire itire käkwe ngwian bian, munkwe nütübare ño ja brukwäte erere. Ñansi ngwäre ötabätä biane munkwe; aune ñan ja gitaretari bian munkwe; ñobätä ñakare angwane ni tä kä ngwen nuäre jabätä ngwian biane, nebrä Ngöbö tä tarere.” Ani ja tötike bäri kwin kukwe niebare nebätä.

“Munkwe nütübare ño ja brukwäte erere.” Pablo niebare ye erere, ni kristiano metre ye tö jondron biain ye medenbätä tä jondron bien. Ne madakäre, mräkätre kukwebätä tä dre ribere jai yebätä tä töbike. Ni ja tötikaka Bibliabätä kätä mike gare, kukwe griekore kwitani “nütübare ño” ye abokän “kukwe mikata gare käne jai aune töbikata käne kukwe nuainkäre” ye meden gärätä. Ye medenbätä, ja mräkätre kukwebätä tä dre ribere jai yebätä ni kristiano tä töbiketari aune ñongwane dimikadre kwe ye ererebätä tä dimike (1 Juan 3:17).

“Ñansi ngwäre ötabätä biane munkwe; aune ñan ja gitaretari bian munkwe.” Nitre kristiano jondron biandre ye ngwane ñaka rabadre kukwe ketebu nuainne niebare Pablokwe: jondron bien töi kämebiti aune ni madakwe nuainmanandre ie yebätä biandre kwe. Kukwe griekore kwitata “ngwäre ötabätä” ye abokän töi “ulirebiti” meden gärätä. Tärä kukwe mikakäre gare jai tä niere, nire tä jondron bien ñaka töi kwinbiti “ye tä nemen ulire ngwian bianta kwe yebätä”. Nire tä jondron bien ni mada tä nuainmana ie yebätä yei ja ñaka tä nemen ruin kwin jondron bien. ¿Ni töi ye erere käkwe jondron biandre ye nire törbadre kai ngäbiti?

“Ni tä kä ngwen nuäre jabätä ngwian biane, nebrä Ngöbö tä tarere.” La Biblia de Nuestro Pueblo tä niere ye erere: “Nireta jondron bien kä jutobiti ye tare Ngöbökwe”. Ni kristiano rabadre ja töi mike ye erere jondron biankäre ni madai. Aune nireta jondron bien töi kwinbiti yebätä kätä nemen juto (Hechos 20:35). Nirekwe nuaindi ye erere yebätä kä rabai juto. Kä juto nieta ye abokän ni ie ja ruin ño aune tä kä mike ño ja ngwärebätä ye meden gärätä. Nire tä jondron bien kä jutobiti ye tä kä mike juto ni jondron ka ngäbitikä ye brukwäbätä aune Ngöböbätä arato.

Ni kristiano käkwe jondron biandre ye ngwane rabadre apóstol Pablo kukwe niebare üai demebiti ye mike täte. Nikwe ni die, jondron nikwe o kä diandrekä jai ni mada dimikakäre ye ngwane, nikwe nuaindre ja töi jeñebiti aune ni töi mantiame ni mada kräke ye medenbätä nuaindre, metrere nitre tä jondron ribere jai ye kräke nuaindre. Ja töi mikata jondron bien ye erere, ye tä kä mike juto nibätä, aune ye köböire ni rabai tare Ngöbökwe, ñobätä ñan aune nire tä jondron bien kä jutobiti ye tareta kwe.