Jesús ganinkröta ye köböire nitre ja tötikaka kwe namani tödeke aune kä namani juto bätätre. Ñodre, apóstol Pablo nänbare juta Asia Menor aune Mediterráneo ye jökrä känti konkrekasion keta kabre ükatekäre aune nitre kristiano dimikakäre ne kwe ja mikadre rüere ye ngwane ja ngwandre dite kwetre aune ñaka kukwe käme nuaindre kwetre. Ye köböire, nitre kristiano jatani nirien kwati kä jökräbiti tibien.

Pablo mikani ngite arato. Yebiti ta, nämene yekänti tärä tikabare kwe konkrekasion keta kabre ye dimikakäre aune mäträkäre bätätre bätä mikani mokre kwe kukwe rakadrekä nebätä: kukwe metre tuanmetreta aune ja mikata rüere. Üai deme Ngöbökwe yebiti mikani gare kwe nitre “lobo romon” kwrere rükai abokän rabai ni ngökö “nitre tödekaka Jesubti diankäre jakri” (Hechos 20: 29, 30).

Siklo kena jatanina krüte ye ngwane, nitre jatani kukwe metre tuenmetre aune ja mike rüere. Dre rabai bare ja känenkäre ye mikakäre gare Jesús ganinkröta ye kukwe bämikani apóstol Juan ie tärä Apocalipsis yebätä. Kä ye näire Jesukwe kukwe ye mikani gare ie. Juankwe tikabare ye erere, Ngöbö töita ño Kä tibien aune ni kräke ye nitre ja mikaka Ngöbö rüere aune nitre kukwe ngwarbe driekä ye ñaka raba ketebätä. “Ni kä jökräbti temen amne ni bätäkä ngwarbe amne ni kukwe bätäkä ngwarbe amne ni nünanka juta kwatirekwatire te” yekwe kukwe kwin Gobran Ngöbökwe yebätä kukwe nuai (Apocalipsis 14:6). Kä tibien rabai bä nuäre, aune Ngöböta dre nuainmana ye nire nire nuaindi ye jökrä käkwe nünain yete.

Kukwe ye kwin krubäte, ¿ñan ererea? Ye erere tuin mäi angwane, kukwe Ngöbökwe tä Bibliabätä aune ye raba mä dimike ño kä nengwane aune ja känenkäre ye mäkwe mika gare bäri jai.

Mä raba ñäke Bibliabätä www.pr418.com/jw-ngb yekänti. Yekänti täräkwata Ngöböta kukwe kwin mike gare nie, tärä ¿Dre drieta erametre Bibliakwe? aune tärä o täräkwata mada ye kwain mäi arato. Ñobätä ni rabadre tö ngwen Biblia yei aune kukwe nietabätä ye ni itire itire aune ni ja mräkäre raba nuainne ño ye mikata gare tärä o täräkwata yebätä. Mä törba kukwe mikai gare bäri jai angwane, mä raba blite ni testiko Jehovakwe ben.

(Dianinkä Hechos, Efesios, Filipenses, Colosenses, Filemón, 1 Juan aune Apocalipsis yebätä.)