Siklo nikani kwä kükü ta ye bitikäre Miqueas kukwe tikabare ye namani bare: Mesías, Jesús, ye därebare Belén. Kä nikani grebiti kwäjätä näre ta ye ngwane, kä 29 yete, Mesías rükadre yebätä Daniel kukwe niebare ye namani bare arato. Jesukwe ja ngökani ñöte aune Ngöbökwe dianinkä üai deme kwe yebiti. Ye medenbätä, “meri monsoitre” iti, abokän Mesías ngüba nämene krubäte, ye nükani niebare ye ererebätä.

Bengwairebe, Jesús nikani “kukwe kwin Ngöbö Gobrain[bätä]” ye driere (Lucas 8:1, Ngöbö Täräe [NGT], tärä okwä ükaninte). Niebare ye erere, niara töi kwin aune ni mada tarere yebätä töi nämene bökän ni jökrä dimikabätä ye bämikani kwe. Töi kwinbiti kukwe kwin ja töi kräke driebare kwe aune nitre nämene “bren bätäkä ngwarbe” ye kwati mikaninta kwin kwe, yekwe bämikani Ngöbö nämene kain ngäbiti (Mateo 4:23). Ni iti ja tötikaka kwe ie kukwe nükani gare ne erere nükani gare, nitre umbre, bati aune kia nämene näin jiebiti yei: “Mesía kunina nun ie” (Juan 1:41, NGT).

Jesús rabadre gobrane Kä tibienbiti ye känenkri, rü, dobo kri aune kukwe keta kabre tare rabai nakainkä niebare kwe. Ye medenbätä niebare kwe: “Mun tädre mokre” (Marcos 13:37, NGT).

Jesús nämene töi metre aune käre Ngöbö kukwei mikani täte kwe, akwa nitre namani niara rüere käkwe murie ketani. Ni kä tibienbätä rabadre nüne kärekäre kä bä nuäre te ye Adán aune Eva köböite ñaka namani bare, akwa niara murie ketani ye köböire ni rabaita nüne ye erere.

Jesús murie ketani aune köbö nikani köbömä ta ye bitikäre ganinkröta ni üaire dite erere yebiti kukwe niebare ye namani bare arato. Ganinkröta ye bitikäre, nitre 500 biti bäri ja tötikaka ben yei ja mikani tuare kwe. Jämi nikenta kä kwinbiti ye känenkri, nitre nänkä jiebiti yekwe blitadre niara aune Gobran kwe yebätä “nitre nünanka kä jökräbti temen” yebe niebare kwe ietre (Mateo 28:19). ¿Nitre yekwe kukwe driebare nemen medente?

(Dianinkä Mateo, Marcos, Lucas, Juan aune 1 Corintios yebätä.)