“Meri monsoitre” iti rükai niebare Ngöbökwe ye abokän jatai Abrahán monsoitre iti yekri. Ngöbökwe kukwe ye käbämikani Abrahán ni ja ngwanka metre yei. Ni ye köböire ni Kä tibienbätä jökrä yekwe kukwe kwin rabai (Génesis 22:18). Ye bitikäre, Jacob, Abrahán bräi, nikani nüne Egipto. Kä yekänti, mräkätre namani kwati aune namani juta Israel.

Ye bitikäre, Faraón, gobran Egipto bikaka kri, yekwe nitre Israel mikani klabore. Nitre ye diankakäre kä Egipto yekänti, Ngöbökwe ni niara kukwei niekä Moisés ye mikani Mren Tain ye ñäkebiti. Biti, kukwe biani kwe ie jie ngwankäre aune kriemikakäre. Kukwe ye ngätäite Kukwe Keta Jätä biani Ngöbökwe ye nämene aune jondron biandre kwetre ne kwe ngite juandrebiti ta ye niebare arato. Ni Ngöbö kukwei niekä mada juain Ngöbökwe ye Moisekwe niebare nitre Israel ie Ngöbö üai deme yebiti. Ni Ngöbö kukwei niekä ye abokän “meri monsoitre” iti käbämikani.

Siklo nikani kobokä ta ye bitikäre, Ngöbökwe käbämikani rei David ie “meri monsoitre” iti ye abokän rabai gobrane kärekäre. “Meri monsoitre” iti ye ara namani Mesías, ni kädekani Ngöbökwe ni kä tibienbätä Mikakäre Kwäre aune Kä tibien kwitakäre bä nuäre.

David aune nitre mada Ngöbö kukwei niekä yebiti Ngöbö jatani kukwe mada mada mike gare Mesías yebätä. Ni ye töi bobre aune töi kwin krubäte mikani gare kwetre. Gobrain kwe ye ngwane, mrö nika, kukwe blo aune rü ñaka rabaira, bätä nitre gobraindi kwe ye jökrä nünain jäme jabe aune jondron nire yebe. Bren, ja tare nika aune gata, rakadrekä ñaka ai nämene Ngöbö töite, ye riaikä. Ne madakäre, nitre krütanina ye mikaita nire nünankäre Kä tibienbätä.

Miqueas yebiti Mesías däredi Belén mikani gare Ngöbökwe, aune murie ketai ye mikani gare kwe Daniel yebiti. Akwa, Ngöbökwe mikaita nire aune kädekai Reire kä kwinbiti. Danielkwe tikabare gobrantre Kä tibienbätä ye jökrä täte Mesías rabai Gobrane kärekäre. Akwa ¿Mesías nükani niebare ye erere?

(Dianinkä Génesis 22 nemen 50, aune Éxodo, Deuteronomio, 2 Samuel, Salmos, Isaías, Daniel, Miqueas bätä Zacarías 9:9 yebätä.)