Santiago, juta Chile yete ti ririabare, kä yekänti ja murie keta nämä, droga dua nämä aune nitre kukwe käme nuainkä ni madabätä nämä krubäte. Kä nämä kwärike tibiti ye ngwane, ti rün murie ketani. Ye bitikäre, ti meye nünanba ni brukwä käme ben abokän käre nämä nun nuainne tare. Kä kabre te ti nuainbare tare ye täbe törö tie.

Ti nämä monsore ye ngwane, kukwe ñaka kwin nie nämä tie ye ngwane ti nämä nemen rubun krubäte. Ti jataba musika heavy metal ye kukwe nuin, dö ñain krubäte aune ruäre ngwane ti nämä droga duen. Nitre mada nämä ja mete nitre droga rürübäinkä yebe ye ngätäite käre ti nämä ja mete siba arato, bä kabre nitre ye tö rababa ti murie ketai. Bati, nitre kukwe käme nuainkä ni madabätä yekwe ngwian biani ni brukwä käme ni mada murie ketaka yei ti murie ketakäre. Cuchillobiti ti däkäteba bati kwe, akwa tikwe kwäräbebabätä. Köbö mada ngwane, nitre droga rürübäinkä yekwe kürü ketateba ti dokwäte aune törbaba ti jäkäi kwin.

Kä 1996 ye ngwane meri kädeka nämä Carolina rababa tuin ja bä tie, aune kä 1998 ye ngwane nunkwe ja mäkäteba. Nun ngobo däreba kena ye ngwane ti brukwä nämä käme yebätä ti rababa töbike. Ti ñaka törbaba ja tuai ti uyie ye erere aune ti ñaka törbaba ti mräkätre nuaindi tare. Ti dimikadre yekäre ti rikaba Centro de Rehabilitación yete. Kräkä bianba tie yebiti ti jataba ja kräkäimike yekwe ñaka ti dimikaba. Kukwe chibätä ti nämä nemen rubun krubäte; ti brukwä nämä käme krubäte. Ti ñaka törbaba jankunu ti mräkätre nuaindi tare yebätä ti jababa ja murie kete. Akwa ñaka rababa bare tie.

Kä kabre te ti ñaka nämä Ngöbö mike era jai, akwa ti tö jataba mikai era jai. Yebätä, ti nämä niken iglesia evangélica yete. Ye ngwane, ti muko jataba ja tötike Bibliabätä nitre testiko Jehovakwe ben. Ti brukwä nämä nitre ye kräke aune ti nämä ñäke kämekäme ietre. Akwa käre niaratre nämä blite töi jämebiti tibe ye rababa ti mike töi niä.

Bati, Carolina nieba tie tikwe Salmo 83:18 ye känändre Biblia tikwe yebätä, bersikulo yebätä Ngöbö kä Jehová nieta. Iglesiate ti nämä näin yete ti nämä ja kite Ngöböbätä, akwa kä  Jehová ye abokän ñaka nämä gare tie. Kä 2000 yete ti jataba ja tötike Bibliabätä nitre testiko Jehovakwe ben.

Jehová ye Ngöbö ni mike tuin bobre jai aune tä ngite juen nibiti ta jataba nüke gare bätärekä jatäri tie. Ñodre, Éxodo 34:6, 7 tä niere Jehová ye “Ngöbö ni mike tuin bobre jai bätä moto kwin, ñaka nemen rubun jötrö ngwarbe aune jondron kwin nuainne bätä kukwe metre niere, tä ni kwati tarere krubäte, kukweta nainte nie bätä ja mikata ngite ye tä juen ta nibiti”. Kukwe yekwe ti dimikaba krubäte.

Akwa, kukwebätä ti nämä ja kite ye ñaka rababa nuäre nuaindre ti kräke. Ti töi ñaka rabai jäme ti nämä nütüre. Batire batire ti ñaka nämä ja ngwen kwin ye ngwane, töi kwinbiti Carolina nämä ti dimike aune ti nämä ja di ngwen ye nämä tuin Jehovai nie nämä kwe tie. Niara nämä ti dimike ye köböire ti nämä ja di ngwen Jehová mikakäre täte, akwa ruäre ngwane ja rababa ruin ngwarbe tie.

Bati, Alejandro, ni testiko Jehovakwe ti tötikaka Bibliabätä, käkwe ñäkämanama tie Gálatas 5:22, 23 yebätä, yete Ngöbö Üai tä ni töi mike ño ye kädekateta: “Nita ni mda mda tarere, käta neme bäri juto nibtä, nita nüne jäme [...], nita jändrän jökrä ngibiare bätärekä, nita ni mda mda kaen ngäbti ja moto jämenbti, nita ja moto mike kuin ni mda mdakrä, [...] tödekata [...], amne nita bike tidrä ni mda mdabtä amne, ni töi kämekäme ye nita ketebtä”. Ti töi rabadre ye erere, yekäre tikwe tö ngwandre Ngöbö üai deme yei aune tikwe ñaka tö ngwandre ja di jeñe yei mikaba gare kwe tie. Kukwe yekwe ti okwä ngianteba.

Kä rikaba braibe ta angwane, nitre testiko Jehovakwe nämä gätä kri nuainne yebätä ti rikaba. Nitre kukwe ükete kwin, kä merebe aune nitre nämä jäme jabe yekwe mikaba nüke gare tie kukwe metrebätä ti nämä (Juan 13:34, 35). Tikwe ja ngökaba ñöte febrero kä 2001 yete.

Ti brukwä nämene käme krubäte. Nitre kwati brukwä nämä ti kräke, akwa ti ara ngite. Jehovakwe ti töi mikani jäme aune tikwe ja mikani kukwe kri te yebätä ti mikani kwäre kwe. Kä nengwane tita nüne jäme aune tita mike täte gwairebe ti muko aune monsotre tikwe nibu ben.

Ti ñaka niena ja ngwen blo yebätä ti mräkätre aune nitre ja ketaka käne tibe ye töi nemen ñan krütare. Niaratre ye kwati tö kukwe metre Bibliabätä mikai gare jai. Niaratre ye ñan aibe ie tikwe diribarera; ñakare aune tikwe nitre mada dimikanina Jehová mike gare jai arato. ¡Biblia niaratre ye töi kwitanina arato ye käita juto krubäte tibätä!