¿Nitre gaikröta käbämikata Bibliakwe ye mätä mike era jai? * Ni mräkätre tare nikwe krütanina abokän nikwe tuaita nieta ye tuin kwin krubäte nie, akwa ¿ye rabai bare metre? Kukwe ngwantarita ye mikakäre gare jai, nitre apóstol Jesukwe kukwe bämikani yebätä ani blite.

Nitre gaikröta ye nitre apóstol nämene mike era jai. ¿Ñobätä? Kukwe ketebubätä. Kena, Jesús murie ketani ye bitikäre ganinkröta ye tuani kwetre. Jesús ganinkröta ye nitre Apóstol tuani aune ye bitikäre “ja mräkätre [...] siento krärike jire” nämene jakänti yekwe tuani arato (1 Corintios 15:6). Ne madakäre, Jesús ganinkröta ye namani bare metre aune nitre kwati käkwe mikani era jai, tärä ketabokä Bibliabätä tä mike gare ye erere (Mateo 27:62–28:20; Marcos 16:1-8; Lucas 24:1-53; Juan 20:1–21:25).

Ketebukäre, nitre apóstol yekwe Jesús tuani nitre nimä miketa nire: iti kä Naín känti, iti Capernaum känti aune iti kä Betania känti (Lucas 7:11-17; 8:49-56; Juan 11:1-44). Ni nimäkäre ganinkröta, mikata gare kena täräkwata nebätä, ye abokän Jesukwe mräkätre jeñe kwe mikaninta nire. Dre namani bare ye ani mike gare bäri kwin jai.

“Mä ngwai rükaita nünenta.” Lázaro krütanina köbö köböbäkära nikani ta yete ye ngwai Marta ie, Jesukwe kukwe ye niebare. Jesukwe kukwe niebare ye ñaka nükani gare bengwairebe Marta ie. “Rükaita nire [...] gare tie”, niebare kwe, akwa ye rabai bare ja känenkäre nämene nütüre. Jesukwe mikani gare Marta ie: “Ti abrä ni mikakata nire, aune ja nire bianka” aune ye bätäräbe Lázaro ganinkröta kwe. ¡Yekwe Marta töi mikani ñan krütare ye bämike ja töite! (Juan 11:23-25, Ngöbö Täräe [NGT], tärä okwä ükaninte.)

¿Lázaro krütani ye bitikäre köbö köböbäkära nikani ta yete nämene medente? Lázaro ñaka niebare nämene nire kä madakänti. Ñakare, üai ñaka ngatain abokän niken kä kwinbiti ye ñaka nämene Lazarobätä. Jesukwe Lázaro ganinkröta ye ngwane, ñaka dianinkä kwe kä kwinbiti nünankäreta Kä tibienbätä. Ye erere ngwane, ¿nämene medente? Nämene kübien dobote (Eclesiastés 9:5, 10).

Jesukwe gata ye bämikani nita kübien yebätä abokän ni mikaita nire ye ngwane ni rükaita ngwäte. Mikata gare ye erere, Jesukwe niebare: “Ti  mräkä Lázaro tä kübien, akwa ti bike niken gainkrö. Nitre ja tötikakakwe niebare Jesús käre: Ji dokwäte [Jesús], Lázaro tä kübien ngwane rabaita kwin. Akwa [...] kübia näin ye kwrere kädrie nämene Jesukwe, nütü namani nitre ja tötikakakwe. Te, Jesukwe niebare bä ngrabe nitre ie: Lázaro ngatanina” (Juan 11:11-14, NGT). Jesukwe Lázaro mikaninta nire aune bianinta kwe mräkätre ie. ¡Kukwe ütiäte krubäte nuainbare kwe kräketre!

Jesús nämene Kä tibienbätä ye ngwane nitre ganinkröta kwe yebiti bämikani kwe rabai Reire Gobran Ngöbökwe yete angwane nuaindi ye erere kwe. * Rabai gobrane kä tibien nebiti ye ngwane, ja nire biainta kwe nitre tä kübien “dobote” yei, kä ye abokän blitata kukwe ja üairebiti. Yebätä Jesukwe niebare: “Ti abrä ni mikakata nire”. Mä mräkätre tare mäkwe krütani abokän mäkwe tuaita ye käi rabai juto mäbätä yebätä töbike. Nitre gaikröta yebätä kä rabai juto krubäte abokänbätä töbike arato (Lucas 8:56).

Jesukwe niebare Marta ie: “Nire tä tödeke tibiti, yebrä gataira, akwa nünandita kwe. Arato ni jökrä täte nire, kätä tödeke tibiti, yebrä ñan tärä getaka käre” (Juan 11:25, 26, NGT). Jesús rabai Gobrane Kä Mil Krati ye ngwane nitre krütanina gaikröta kwe yekwe tödekaibiti angwane, nünain kärekäre kwetre.

Jesukwe kukwe metre mikani gare ni gaikröta yebätä ye bitikäre, kukwe ngwanintari kwe Marta ie nebiti tödeka Martakwe mikani gare kwe jai: “¿Mäkwe ti kukwe ne kari täteya?”, biti Martakwe niebare ie: “Jän Ji dokwäte, tikwe kanina täte mä abrä Gobran kri, Ngöbö Monsoi” (Juan 11:26, 27, NGT). ¿Mä abokän tä töbike ño? ¿Marta erere mä tö tödekai ni gaikröta yei? Ye erere angwane, Ngöbö töita ño ni kä tibienbätä kräke ye mikadre gare käne jai (Juan 17:3; 1 Timoteo 2:4). Kukwe rabai gare mäi ye köböire mäkwe tödekai. Biblia tä dre niere kukwe nebätä ye mäkwe mikamana gare jai nitre testiko Jehovakwe yei. Ni gaikröta käbämikata ye niaratre mikai gare kä jutobiti mäi.