Michelle: Köbö kwin, Sofía. Mä kuni gwi tie ye kwin krubäte.

Sofía: Jän, mä nüta ti känti ye käi nibi juto tibätä arato.

Michelle: Nita ja tare nike ye ngwane jata nemen ruin ño Ngöböi yebätä nikwe blitaba ti rükaba käne mä känti ye ngwane. * Mekerabe mätä kukwe ye ngwentari jai, metrere mä meye te karo matani ye ngwane bäri mätä ngwentari jai mäkwe nieba tie. Akwa nengwane, ¿niara tua ño?

Sofía: Ruäre ngwane tä nemen kwin aune ruäre ngwane abokän tä nemen bren, akwa matare tä kwin.

Michelle: Ye käi nibi juto tibätä. Kukwe namani bare ye ñaka tä mä mike nüne kä jutobiti raba ruin tie.

Sofía: Jän, ñongwane ja tare nika ñaka rabaira ye ruäre ngwane tita ngwentari jai.

Michelle: Ni jökrä tä töbike ye erere. Tikwe blitaba kä nuära mäbe ye ngwane tikwe ngwantariba mäi, Ngöbö die tärä ja tare nika ye diankakäre se ñobätä tä ni tuenmetre ja tare nike ye tä törö mäi, ¿ñan ererea?

Sofía: Jän, tä törö tie.

Michelle: Kukwe ye mikadre gare jai Bibliabätä ye känenkri, kukwebätä tikwe blitaba käne mäbe ye ruäre ti törba kädrieita mäbe.

Sofía: Raba.

Michelle: Kena, ñobätä Ngöböta ja tare nika tuenmetre nakainkä ye ni Ngöbö mikaka täte metre nünanbare kirabe käkwe ngwanintari jai, aune Ngöbökwe ñaka ñäkäbare ie bätä tödeka ñaka nämene kwe ye ñaka niebare kwe ie.

Sofía: Jän, ye ñaka nämä gare tie.

Michelle: Nita ja tare nike ye ñaka nemen tuin kwin Jehovai rababa gare nie arato. Biblia tä niere, kirabe sete juta kwe ye “nämene ja tare nike ye ngwane niara namani ja tare nike arato”. * Nita ja tare nike ye ngwane Ngöböta ja tare nike nibe arato tä nemen gare nie ye tä ni dimike, ¿ñan ererea?

Sofía: Jän.

Michelle: Aune Ngöbö dite krubäte yebätä raba ja tare nika ye denkä köbö meden erere te ye rükaba gare mrä nie.

Sofía: Kukwe ye ara ñaka nüke gare tie. Die tärä diankakäre, ¿se ñobätä mada tä kukwe käme ye tuenmetre nakainkä jankunu?

Michelle: Génesis, tärä kena Bibliabätä ye ani ñäkebätä. ¿Adán aune Eva yebätä kukwe mikata gare bätä kri ngokwä ñäkäibare ietre yebätä kukwe gare mäi?

Sofía: Jän, driebare tie kwela nitre catolicokwe yete. Kri dati ye ñaka ngokwä kwetadre kwetre niebare Ngöbökwe ietre, akwa ñaka kukwei mikani täte kwetre.

 Michelle: Kwin krubäte. Akwa ye känenkri dre namani bare ye ani mike gare jai, ñobätä ñan aune ni kä tibienbätä tä ja tare nike yebätä tä blite arato. ¿Mä törba ñäkäi Génesis, kapitulo 3, bersikulo 1 nemen 5 yebätä?

Sofía: Jän, tä niere: “Dänkin Ngöbökwe jändrän bätäkän ngwarbe dätebare kena, ne ngätäite jändrän nämane krati kä dianta tibi. Tibi ne abko bäri töbtä ni ngökabti jändrän jökrä känsenta ngwä [...]. Bati tibi jatani, käkwe niebare meriye: Kri jökrä nete noko, ¿Ngöbökwe ñan ngwäkä kwetamna jire chi munye ñan ñan? [...]. Meri ye käkwe niebare mda tibiye: Kri jökrä tä nete noko, nunkwe ngwäkä kwetadre nieba Ngöbökwe, akwa krita dati kä kuin Eden te ruäre, se aibe munkwe ñan ngwäkä kweta amne, munkwe ñan kise mika jire chi btä, ñobtä ñan angwane ye ngwane mun gatadi, nieba Ngöbökwe nunye, [...]. Abtä tibikwe niebare mda meri yeye: Mun ñan krütadre. [...] Ñobtä ñan angwane munkwe kri ngwäkä se kwetadre angwane, mun rabadre töbtä kri. Dre kuin btä dre käme rabadre gare jökrä munye. Mun rabadre Ngöbö kwrere arato abko, ie Ngöbö ñan tö”.

Michelle: Tä debe. Ani blite bersikulo yebätä. Kena, kulebra krati blitabare Eva ben nieta. Metrere kulebra yebiti Satana, Diablu blitabare mikata gare texto mada Bibliabätä yekänti. * Ngöbökwe Adán aune Eva ie kri dati ngokwä ñäkäibare ye abokän metre o ñakare ye ngwanintari kwe Eva ie. ¿Adán aune Evakwe ñaka Ngöbö kukwei mikai täte ye ngwane dre rabai barebätä niebare kwe ietre?

Sofía: Krütai niebare kwe ietre.

Michelle: Ye erere. Ye bitikäre, Diablukwe kukwe ngwarbe niebare Ngöbö rüere. Kukwe niebare kwe ne mike ñärärä: “Mun ñan krütadre”. ¡Ngöbö biani ni ngökö kwe!

Sofía: Kukwe ye ti ñan kukwe nuabare jire.

Michelle: Aune Satanakwe Ngöbö biani ni ngökö ye ngwane, kukwe keteiti ngwanintari ye abokän namani mikadre gare kä rikadre raire ta yete. ¿Ñobätä gare mäi?

Sofía: Mmm... Ñaka gare tie.

Michelle: Ani bämike ne kwrere. Bati ti jatadre mä känti ye ngwane ti bäri dite mä kräke tikwe niedre mäi. ¿Ti ñaka blite metre ye rabadre gare ño mäi?

Sofía: Tikwe mä die ye gadre yebiti raba ruin tie.

Michelle: Metre. Nikwe jondron doboko känändre aune jondron ye raba nakainkä tie o mäi ye nikwe mikadre gare jai. Kukwe ye nuäre mikadre gare.

Sofía: Nüra gare tie.

Michelle: Akwa tikwe ñaka ja biandre bäri dite mäbätä ñakare aune ti bäri blite metre tikwe niedre mäi ye ngwane kukwe ye ñaka ja erebe, ¿ñan ererea?

Sofía: Ye metre.

Michelle: Ni blite metre ye ñaka raba nemen gare ni die tärä o ñakare bämikadre yebiti.

Sofía: Ye metre.

Michelle: Mäkwe kä mikadre niken ta ne kwe nitre madakwe mä ja ngwen ño mikadre ñärärä ye aibe köböire mä blite metre o ñakare ye raba nemen gare.

Sofía: Raba tuin metre tie.

Michelle: Tärä Génesis yekänti kukwe nieta yebätä ani bliteta. ¿Diablu ye bäri dite Ngöbö kräke niebare kwe?

Sofía: Ñakare.

Michelle: Kukwe ñaka metre niebare ye abokän rabadre nuäre bämikadre Ngöbö kräke. Ngöbö ñaka blite metre ye mikani gare metrere Satanakwe. Ye abokän, kukwe ne kwrere niebare kwe Eva ie: “Niara tä mä ngökö; akwa ti abokän tä kukwe metre niere mäi”.

Sofía: Kukwe ye ütiäte krubäte.

Michelle: Ngöbö ye töbätä aune Diablu kukwe ngwarbe niebare rüere ye mikakäre gare bäri kwin kä mikadre niken ta kwe ye nämene gare kwin ie. Ye ngwane rabadre gare metre niaratre nibu ye meden nämene ni ngökö.

Sofía: Akwa Eva krütani ye ngwane Ngöbö nämene kukwe metre niere ye namani gare, ¿ñan ererea?

Michelle: Kukwe ruärebätä, jän. Akwa, Satanakwe kukwe mada niebare Ngöbö rüere. Bersikulo 5  ye miketa ñärärä. ¿Diablukwe dre niebare mada Eva ie?

Sofía: Kri ngokwä kwetadre kwe angwane rabadre töbätä.

Michelle: Ye metre, kwetadre kwe angwane “dre kuin btä dre käme rabadre gare jökrä [ie]. [Aune] rabadre Ngöbö kwrere”. Yebätä Ngöbö nämene jondron kwin ñäkäire ni kä tibienbätä ie niebare kwe arato.

Sofía: Nüra gare tie.

Michelle: Ye kukwe ngwarbe niebare kwe arato.

Sofía: ¿Ñori? Ñan nüke gare tie.

Michelle: Diablukwe kukwe niebare yebiti mikani nüke gare kwe Eva aune ni kä tibienbätä ye jökrä ie, Ngöbökwe ñaka niaratre jie ngwandre ye ngwane rabadre nüne bäri kwin. Arato nämene gare Jehovai bäri kwin rabadre kukwe yebätä kä tuenmetre niken ta, ne kwe Diablukwe kukwe niebare ye mikadre gare. Aisete tuanimetre kwe gobrane Kä tibienbätä kä braibe te. Yebätä ja tare nikata krubäte ni bäre tibien: ñobätä ñan aune Diablu tä ni kä nebätä gobraine aune Ngöbö ñan ai tä gobrane. * Akwa ti törba kukwe kwin mikai gare mäi.

Sofía: ¿Kukwe kwinya?

Michelle: Jän, Biblia tä kukwe kwin driere Ngöböbätä. Tä niere, nita ja tare nike ye ngwane Jehová tä känime ni ken. Ñodre, rei David kukwe tikani Salmo 31:7 yekänti ye ani mike ñärärä. Niarakwe nünanbare ye näire ja tare nikabare krubäte kwe, akwa dre niebare kwe Ngöböi ye mike ñärärä. ¿Mä törba ñäkäi bersikulo yebätä?

Sofía: Jän, tä niere: “Erametre kä täi juto tibätä aune mätä ti tarere krubäte kätä mä töi mike kukwe kwin nuainne ti kräke ye käi rabai juto tibätä, ñobätä ñan aune tita ulire krubäte ye tuin mäi; tita ja tare nike ye niena gare mäi”.

Michelle: David ja tare nikabare krubäte, akwa kukwe nämene nemen bare niarabätä ye jökrä nämene tuin Jehovai yebätä nämene töbike angwane ja nämene nemen ruinta kwin ie. Aune mä, kukwe meden tä ni mike ja tare nike bätä ja nemen ruin ño nie abokän ñaka raba nüke gare nitre madai akwa ye jökrä gare Jehovai, yebätä mätä töbike angwane tä mä dimike, ¿ñan ererea?

Sofía: Jän, krubäte.

Michelle: Ne madakäre, Biblia tä niere niarakwe ñaka ni tuainmetre ja tare nike kärekäre. Arato gwäune niarakwe Satana tä gobrane ye diainkä aune kukwe tare tä nemen bare Satana köböite ye jökrä ükaite kwe. Aune kukwe meden käkwe mä bätä mä meye mikanina ja tare nike ye diainkä kwe arato. ¿Ti raba kiteta bämän madate mä känti? Kä nebera braibe te Ngöbökwe ja tare nika diainkä ye ñobätä nikwe mikadre gare metre jai ye ti törba mikai gare mäi. *

Sofía: Jän, raba tuin kwin tie.