Ti nämä chi yebätä tita töbiketa angwane, kä jutobiti ti nämä nüne ti rün aune ti meye ben mötörikri juta Francia yekänti ye tä nüketa törö tie. Ti rün käkwe columpio (jondron ja miniananka) sribeba ti kräke, aune käre ti nämä nen jubäre tibien kriblü ngätäite ta ye käi nämä nemen juto tibätä. Kä 1966 ye ngwane nitre testiko Jehovakwe rükaba nun känti. Ti rün nämä blite raire bentre aune sö rikaba krä kükü ta ye ngwane ja mikaba Testiko kwe. Kä rikaba braibe ta angwane ti meye ja töi mikaba ye erere nuainne aune niaratre nibu ja tarere yekwe ti ngübaba.

Ti rün aune ti meye käi España yebätä nun rikabata España. Kä rikaba braibe ta angwane ti jataba bren jakän. Ti kise aune ti ngoto salakwä jataba ngritete tare krubäte tie. Kä kubura nun rababara näin doctor kwati känti, ye bitikäre nun janama doctor reumatólogo (ja tötikaka ni krä mröka yebätä) yekänti, käkwe nieba metre nunye: “Ñaka nibira nuaindre”. Yete ti meye ngetrakaba. Ti nämä bren krubäte artritis ye kisete aune sistema inmunológico ye nämä tejidos ti ngrabare ye juen ngwarbe ye köböite ti krä mröka ye nämä nemen tare tie aune nüen tie ye doctor nieba ti rün aune ti meye ie.

Ti mikadrete monsotre ngübata yekänti nieba doctorkwe. Ti rababa kä jene yekänti ye ngwane, bäsi ti krütaba. Kukwe nämä ükaninte ye ñaka nuäre nuaindre. Meritre monja käkwe ti dokwä tikakaba aune dän käme kitaba kwetre tibätä. “¿Kä rükai ño tie nete?”, ti rababa nütüre muare kwärä.

Tikwe Jehová mikadre ño täte ye ti rün aune ti meye drieba tie, yebätä nitre kukwebätä nämä kukwe keta kabre nuainne kä yekänti ye ti ñaka nämä nuainne, akwa meritre monja yei ñaka rababa nüke gare. Jehovakwe ñaka ti tuanemetre ye ti nämä ribere ie aune nämä ti kriemike rababa ruin tie. Ni rünkwe ni tare tä kise kite ni ngärä ye kwrere.

Sabado yete nitre ja mräkäre tuanmetre nämä jötrö ngwarbe ni bren tuin känti, ye ngwane ti rün aune ti meye nämä niken täräkwata ngwena tie ne kwe tödeka tikwe tädre dite. Tärä biandre  monsotre kia ie ye ñäkäi nämä meritre monja yekwe, akwa ti abokän ie täräkwata bian nämä ye ñaka ñäkäi nämä kwetre. Biblia nämä kwati tikwe arato, aune ti nämä ñäke mantre jetebebätä. Kä tibien kwitai bä nuäre yete ni ñaka rabai bren käbämikata yekänti ti tö nünain kärekäre yebätä ti nämä blite monsotre kia merire mada ben (Apocalipsis 21:3, 4). Ti nämä nemen ulire aune ja nämä nemen ruin kaibe tie, akwa ti nämä tödeke bäri Jehovai.

Sö rükaba krä ti tibiti ye bitikäre doctor nieba tie ti rikadreta ja gwirete. Ti ñaka rababata kwin, akwa ti rükabata ja gwirete ye käi rababa juto tibätä. Ti krä mröka jataba nakwainkä bäri tie aune jataba bäri tare tie. Ti nämä bren akwa kä nämä 14 tibiti ye ngwane tikwe ja ngökaba ñöte, ti töi rababa kwatibe ja di ngöibiti Jehová mikabätä täte. Akwa ruäre ngwane ja rababa ruin ulire tie. “¿Ñobätä ne tä nakainkä tibätä? ¡Ti miketa kwin! Ti rababa ribere ti Rün kä kwinbiti yei. ¿Tita ja tare nike krubäte ye ñan tuin mäi?”

Ti nämä monsore ngwane tikwe ja tare nikaba krubäte. Ti ñaka raba nementa kwin jire ye rükaba gare jabätä tie, akwa monsotre merire ja ketamuko tikwe nämä kwin aune nüne kä jutobiti ye erere ti ñaka nämä nüne ye rababa ti töi nike käre. Yebätä ja rababa ruin ngwarbe tie aune ti ñaka törbaba ja ketai ni madabe. Akwa, ti mräkätre aune ja ketamuko tikwe käkwe ti dimikaba käre. Alicia ja ketamuko kwin tikwe abokän nämä kä ngwen gre ti käne ye täbe törö tie. Tikwe ñaka ja töi mikadre bren tibätä yebätä aune kukwe nämä ti kisete yebätä, ñakare aune tikwe ja töi mikadre nitre mada dimike nieba kwe tie.

Kä rababa 18 tibiti ye ngwane, ti rababata bren krubäte, aune ti rababa niken gätäbätä ye ngwane ti rababa nemen nainte. Akwa ti nämä nemen gwi ye ngwane ti nämä ja tötike nguseta Bibliabätä. Tärä Job aune Salmo yekwe mikaba nüke gare tie kä nengwane Jehová tä ni ngübare metrere kukwe ja üairebiti. Ti nämä orare jankunu ye köböire “Ngöbö di kri” yekwe ti dimikaba aune “Ngöbökwe kä jäme jakwe mika[ba] [ti] motobtä” (2 Corintios 4:7; Filipenses 4:6, 7).

Kä rababa 22 tibiti ye ngwane ti jataba näin silla de rueda yete. Meri bren mikani silla de rueda yete ye erere nitre madakwe ti mikadre tuin jai yei ti ñaka törbaba. Akwa ti rababa jondron ruäre nuainnenta kaibe aune “kukwe tare” rabai bare tibätä ti nämä nütüre ye erere ñaka rababa bare, ñakare aune kukwe kwin rababa bare. Isabel ja ketamuko tikwe käkwe nieba tie tikwe ja töi mikadre kukwe driere 60 ora sö kratibätä ben.

Kenanbe kukwe ye rababa tuin jene tie, akwa tikwe ja di käräba Jehovai aune ti mräkätre bätä ja ketamuko tikwe käkwe ti dimikaba ye köböire rababa bare tie. Sö krati te tikwe kukwe drieba ye rikaba jötrö ta aune ye köböire kä jürä ñaka rababara tibätä bätä jakai riakaba tie. Kä rababa juto krubäte tibätä yebätä kä 1996 yete tikwe ja mikaba prekursora regular, ye abokän ora nuaindre nuäi sö kratire kratire ye näre te kukwe drieta. Tikwe kukwe kwin krubäte diani nuaindre jai, ñobätä ñan aune ti rökraba Ngöbö ken aune ja rababa ruin dite ngrabare tie. Ne madakäre, tä ti dimike blite nitre madabe kukwe mikata täte tikwe yebätä aune tita niaratre dimike ja mäke Ngöböbe.

Kä 2001 yete kä morente, karo mataba ja te ye köböite ti juruainba tare aune ti ngüre krobu rötabätäba tie. Ti nämä hospitalte camabiti aune ti ngüre nämä tare krubäte tie ye ngwane, tikwe oraba ja töite: “¡Jehová mäkwe ñaka ti tuanmetre!”. Ye bätäräbe meri nämä camabiti ti ken käkwe ngwantariba tie: “¿Mä testiko Jehovakwe?”. Ti di ñaka rababa blitakäre ben yebätä tikwe dokwä ngrükateba ie. Biti nieba kwe tie: “¡Mun gare kwin tie! Täräkwata munkwe yebätä tita ñäke”. Kukwe nieba tie yebätä ja rababa ruin bäri kwin tie. Ti nämä bren krubäte akwa ti nämä kukwe kwin mike gare Ngöböbätä. ¡Ütiäte krubäte!

Ti rababata chi ja kokwäre ye ngwane, tikwe ja töi mikaba kukwe driere bäri hospital yete. Yeso nämä mikani ti ngürebätä, akwa ti meye nämä niken ti ngwena silla de rueda yete. Mantre jetebe nun nämä niken nitre bren ruäre tuin känti, ja nämä ruin ño ietre ye nun nämä ngwentari ietre aune tärä bätä täräkwata tä blite Bibliabätä ye nun nämä bien ruäre ietre. Nun nämä kukwe driere ünä  ye ngwane ti nämä nemen nainte krubäte, akwa käre Jehová nämä ja di bien tie.

Tita näin bäri bren, aune ti rün krütani ye tä ti mike bäri ulire. Yebiti ta, tita ja töi mike kukwe kwinbätä. ¿Tita nuainne ño? Ruäre ngwane tita niken ti mräkätre aune ja ketamuko tikwe ben jondron nuainne ye kätä ti dimike kukwe tä ti kisete ye käi kwitekä jabiti. Tita nemen kaibe ye ngwane, tita ñäke täräbätä, ja tötike Bibliabätä aune kukwe driere teléfono yebiti.

Ne madakäre, tita jondron ruäre käi ngwen juto jabätä, ñodre, murie tä mate ti ngwärebätä aune kriblü rä mane ye tita niken räse. Ye tä ti töi mike debe bien. Kukwe ruäre tä nemen nuäre tie ye kätä kä mike juto tibätä. Bati ti nämä kukwe driere ye ngwane, ja ketamuko tikwe nämä ti ngwen silla de rueda yete käkwe nünankaba ken kukwe tikakäre täräkwatabätä jai. Batibe sillabe ngöi ti rikaba betekä järäte aune karo nämä mikaninte te ti mataba. ¡Nun rikakaba krubäte! Akwa kukwe tare ñaka rababa bare rababa tuin nunye ye ngwane nunkwe ja kötaiba krubäte.

Ti ñaka raba jondron keta kabre nuainne; ye abokän jondron mikateta nuaindre jai ye erere tita mike tuin jai. Käre tita okwä kwain aune kä mrä käbämikata Ngöbökwe ye tita bämike ja töite (2 Pedro 3:13). Ti täi kwin, ti täi näin nekwäre sekwäre aune kä täi juto krubäte tibätä ye tita nemen bämike ja töite. Rei David kukwe niebare ne tä ti brukwäte: “Mäkwe Jehová ngüba; mäkwe ja ngwan dite, aune mäkwe ja brukwä mika dite” (Salmo 27:14). Köbö tä niken köböitire köböitire ta ye ngwane jata nemen ruin bäri di ñakare tie, akwa köbö tä niken köböitire köböitire ta yete Jehová tä ti mike bäri dite. Ti tuin bren, akwa tita dite kukwe ja üairebiti.