Nita jondron ribere jai ye ni jämi kärere Ngöböi känenkri nemena gare ie niebare Jesukwe (Mateo 6:8.) Ne madakäre, David, namani reire nitre Israel kirabe yebiti, käkwe tikabare krörö: “Kukwe jämi nüke ti tidräte, akwa, jökrä nemena gare mäi Jehová” (Salmo 139:4). Yebätä, ni ruäre raba ngwentari jai: “Ti töita ño aune tita dre ribere jai ye gare ie, ¿se drekäre tikwe oradre?”. Kukwe ye mikakäre gare, Biblia tä dre niere orasion yebätä ye ani mike gare jai. *

Kukwe jökrä gare Jehovai * nieta Bibliakwe, akwa ñaka tä kukwe ruäre aibe mike gare jai nitre niara mikaka täte yebätä nieta kwe arato (Salmo 139:6; Romanos 11:33). Memoria mikata computadorate ye erere niara töi ñaka, ñobätä ñan aune memoria computadorate yete kukwe jökrä tika ñan raba. Erametre, ni töita ño ye jökrä Ngöbö tö mikai gare jai, ñobätä ñan aune tö ja ketai kwin nibe (Salmo 139:23, 24; Santiago 4:8). Nita dre ribere jai ye gare kwin Jehovai akwa nikwe oradre niebare Jesukwe (Mateo 6:6-8). Ni töita ño ye nikwe mikai gare bäri Ni ni Sribekä yei angwane, nikwe ja ketai bäri kwin ben.

Ruäre ngwane nikwe dre ribedre metrere Ngöböi ye ñaka tä nemen gare nie. O jata nemen ruin ño nie ye ñaka tä nemen niebare nie. Akwa, ye tuin ie aune dreta nakainkä nibätä gare kwin ie ye ererebätä ni dimikai kwe (Romanos 8:26, 27; Efesios 3:20). Yebätä, Ngöböta ni dimike, aune ñongwane tä nuainne ye ni ñaka tä gain abokän tä nemen gare nie angwane, jata nemen ruin bäri ken nie.

Nitre Ngöbö bäri dite krubäte mikaka metre täte tä dre ribere orasionte ie ye niara tä nuainne kräketre nieta Bibliakwe, akwa kukwe medenbätä ñaka orasion jökrä kukwe nuin ye mikata gare Bibliakwe arato. Ñodre, juta Israel kirabe yekänti ni mada nuain nämene tare krubäte, ye näire Ngöbökwe kukwe ne niebare Isaías ni Ngöbö kukwei niekä ie niedre nitre Israel yei: “Munkwe orasion nuaindi krubäte, akwa tikwe ñaka kukwe nuai; mun kise ngite krubäte ni mada därie yebätä” (Isaías 1:15). Mikata gare erere, nitre tä Ngöbö kukwei mike ngwarbe jai o kukwe ñaka kwinbätä tätre orare ye ngwane Ngöbökwe kukwe nuadre ye niaratre ñaka raba ngübare (Proverbios 28:9; Santiago 4:3).

Akwa, Biblia tä mike gare: “Ngöbö tö dreye [...] abko erere nita kärere ie, ye ngwane tä ni kukwei kaen ngäbti” (1 Juan 5:14). ¿Nitre Ngöbö mikaka täte tä orasion nuainne ye tä mike nemen bare jökrä kräke ai gärätä? Ñakare. Ñodre, Pablo ie “kri tukwä, ye kwrere jire [namani] ruen ngritekä [...] ngrabare” abokän nämene mike ja tare nike ye diandrekäbätä ribebare bämä kwe ie (2 Corintios 12:7, 8). Okwä nämene bren krubäte raba ruin nie. Pablo die nämene nitre bren mikakäreta kwin aune ni iti krütani ganinkröta kwe arato, akwa nämene bren ye ñaka namani nuaindre kräke yebätä namani töbike ni raba niere (Hechos 19:11, 12; 20:9, 10.) Kukwe ribebare kwe ye erere ñaka nuainbare kräke, akwa Ngöbökwe dimikani ye kani ngäbiti kwe töi kwinbiti (2 Corintios 12:9, 10).

Erametre, nitre ruäre nünanbare kirabe yekwe dre ribebare ye nuainbare bengwairebe kräketre (2 Reyes 20:1-7). Akwa kä ye ngwane kukwe ye erere nämene nemen bare nane nane. Nitre Ngöbö mikaka täte nämene dre ribere ie orasionte ye ruäre ngwane ñaka nämene nuainne kräketre, aune ye nämene niaratre mike ulire. Nitre ye iti, kädeka nämene rei David käkwe niebare krörö muare kwärä: “Nuäite ti käi rikwitaikä Mäbiti O Ngöbö, ¿kärea?” (Salmo 13:1, Book of Worship for Valiente Indians, tärä okwä ükaninte). Akwa, David dimikani bä kabre Jehovakwe nükani gare ie ye ngwane, namani tö ngwen bäri ie. Ye medenbätä nämene orare ye ngwane niebareta kwe: “Mätä ti tarere erametre ye ie tita tö ngwen” (Salmo 13:5). David erere, nitre Ngöbö mikaka täte kä nengwane tätre orare bati bobu dre ribeta kwetre nuain jämi kräketre ye känenkri (Romanos 12:12).

Dre ribeta metrere nikwe jai ye erere tä bien nie.

Ni rüne tä monsotre kwe tarere, akwa monsotre tä dre ribere ie aune ñongwane tö ie ye niara ñaka raba bien jökrä ietre. Ye erere arato, nita dre ribere orasionte Ngöböi ye nuaindre ño kwe ni kräke aune ñongwane nuaindre kwe ie ni törbadre ye erere ñaka raba nuainne jökrä ni kräke. Akwa, ni rüne tä monsotre tarere ye tä jondron bien monsotre kwe yei ñongwane tätre ribere jai ye ererebätä aune tä nuainne kwin, ye kwrere Ngöbö töita ni kräke ie nikwe tö ngwandre (Lucas 11:11-13).

Nita dre ribere ie ye tä nuainne abokän ga ñaka.

Kukwe meden ben nita ja tuin ye ngwane Jehová ñaka ni dimike drekebe ngwarbe, yebätä ¿nita dre ribere ie ye niara jämi nuainne ni kräke ni rabadre nütüre? Ñakare, nikwe orabare ye niarakwe nuainbarera abokän nikwe ñaka gani ye nikwe mikadre gare jai. Ñongwane ni di mikadre ie ni tö namani ye erere te ja ketamuko nikwe tä ni tarere käkwe ni dimikani ni raba niere (Proverbios 17:17). ¿Jehovakwe töi mikani ni dimike? Nita dre ribere orasionte Ngöböi ye raba nuainne ni kräke Biblia yebiti. Nikwe ja tuadre ño kukwe ruäre ben ye namani gare nie Biblia yebätä ni raba niere (2 Timoteo 3:16, 17).

Nitre Ngöbö mikaka täte kisete kukwe kri tä ye niara ñaka raba ükete jökrä kräketre, akwa tä dimike ja tuakäre kukwe yebe (2 Corintios 4:7). Bati, Jesukwe ribebare ie, niara mikadre kwäre kwe kukwe tare krubäte yebätä, ñobätä ñan aune ñaka tö namani mikai ngwarbe jai. Yebätä, Jehovakwe ángel juani iti dimike (Lucas 22:42, 43). Ye erere arato, ni di mikadre ie ni töta nemen ye ngwane Ngöbö raba ja ketamuko ruäre nikwe töi mike kukwe kwin niere nie ni dimikakäre (Proverbios 12:25). Tä kukwe ye nuainne abokän ni ñaka gain, yebätä ni tädre juto biarebe mikakäre nüke gare jai.

Ñongwane ni dimikadre kwe ye ni rabadre ngübare ruäre ngwane.

Ngöbö bäri dite krubäte ye tä kukwe nuainne nitre töi bobre kräke kä debe näre te mikata gare Bibliakwe (1 Pedro 5:6). Yebätä nita dre ribere jai ye ñaka tä nuainne drekebe ngwarbe ni kräke angwane, töi ñaka nibätä ye ni ñaka rabadre nütüre. Ñakare aune, niara bäri kri aune ni tö dre ie ye gare ie, ye medenbätä nita dre ribere ie yebätä raba töbike bäri kwin.

Töbike kukwe nebätä, mäkwe bicicleta kökadre monso chi mäkwe kräke niedre kwe mäi. ¿Drekebe ngwarbe mäkwe kökadre kräke? Monso chi yei nia jämi gare bicicletabiti rabadre tuin mäi angwane, mäkwe ñaka kökadre kräke. Nia rabaira garebiti ie rabadre tuin mäi ye ngwane mäkwe kökai kräke. Ye erere arato, töi bökänbiti nikwe ja di käräi Ngöböi aune nikwe orasion nuaindi käre ye ngwane, nita dre ribere ie ye nuaindi kwe ni kräke kä debe näre te (Salmo 37:4).

Nitre kristiano tä dre ribere orasionte ye nuaindi kräketre yei rabadre tö ngwen nieta Bibliakwe. Akwa ni ruäre raba niere: “Nuäre niedre, akwa nuaindre ye ñaka nuäre”. Erametre, mekera kukwe kri tä ni kisete o kukwe käme nuainta nibätä ye ngwane Ngöbökwe ni dimikadre ye ñaka nemen nuäre ni kräke ngübakäre. Akwa yebiti ta, oradre jankunu niebare Jesukwe ye nikwe ngwandre törö jai.

Meri bobre kän muko krütani namani ja di kärere bati bobu ni kukwe ükatekä töi käme ie yebiti Jesukwe kukwe bämikani (Lucas 18:1-3). Kenanbe ni kukwe ükatekä yekwe ñaka dimikani,  akwa biti töbikabare krörö kwe: “Meri kän kwäräi krütani se käkwe ñan ti nikadre krübäte mda, abkokäre ti bike kukwe ükete kräke, niara ñan jatadreta mda abkokäre, ñobtä ñan angwane tädre nüke janknu kore, käkwe ti moto mikadre iko” (Lucas 18:4, 5). Kukwebiti texto ye tikani abokän kwitani “ñan ti nikadre” ye abokän “ni metadre okwäte” ye kwrere meden gärätä, aune kukwe ye bämikata, “ni mada kädriedre blo” yebätä. * Ni kukwe ükatekä töi käme käkwe ja töi mikani meri bobre kän muko krütani dimike ne kwe ñaka blitadre blobätä yekäre, Ngöbö ni tarekä käkwe bäri ni “käta blite dibire rare ben” ye dimikai. Jesukwe niebare ye erere, niarakwe ni “die mika[i] jötrö” (Lucas 18:6-8).

Ruäre ngwane ni ñan törbai ja di käräi mada Ngöböi, akwa nikwe ñaka ja di ngwandre nekä. Nikwe orasion nuaindi jankunu angwane, ni tö tuai ja dimike ye nikwe bämikai ie. Ne madakäre, nita ja di ribere ie ye tä nuainne ño ni kräke rükai gare nie, ye köböire, ja rabai ruin bäri ken nie. Erametre, nikwe oradre ño ie Jehová tö ye erere nikwe nuaindi aune nita tödeke yebätä nikwe nuaindi angwane, nita dre ribere ie ye nuaindi kwe ni kräke yei nikwe tö ngwandre (Lucas 11:9).