Nitre kwati tä nütüre Ngöböta kä ne gobraine. Kukwe ye metre akräke, ¿ja tare nika tädre krubäte? (Deuteronomio 32:4, 5.) Kä ne tä ni gobranka käme krubäte kisete drieta Bibliakwe. (Mäkwe ñäkä 1 Juan 5:19 yebätä.)

Akwa ¿ni ye namani ño kä ne gobraine? Kena dekä, ángel iti, Satana, käkwe ja mikani Ngöbö rüere aune ni brare kena bätä meri kena yekwe ja mikadre niarakri niebare kwe ietre (Génesis 3:1-6). Ni brare ye aune muko kwe ye käkwe kukwei mikani täte, aune ja tuanimetre kwetre jie ngwandre ie. Ngöbö bäri dite krubäte ye aibe rabadre ni kä tibienbätä gobraine, akwa tare nikwe yebätä ni rabadre mike täte ie niara tö (Deuteronomio 6:6; 30:16, 19). Akwa, Adán bätä Eva ñaka kukwe kwin nuainbare ye erere nitre kwati käkwe nuainbarera. (Mäkwe ñäkä Apocalipsis 12:9 yebätä.)

¿Ngöbökwe Satana tuainmetre käre kä ne gobraine? Ñakare. Diablukwe kukwe keta kabre blo nuainbarera, akwa Jesukristo köböire Ngöbökwe diainkä jökrä. (Mäkwe ñäkä 1 Juan 3:8 yebätä.)

Ngöbökwe ja di biani Jesús ie Satana gatekäre (Romanos 16:20). Ye rabai bare ngwane, Ngöbö rabai gobrane ni kä tibienbätä yebiti aune tö namani ni tuai nüne ño kena ye erere nuaindi kwe: kä jutobiti aune jäme. (Mäkwe ñäkä Apocalipsis 21:3-5 yebätä.)