Kä tibienbätä jondron keta kabre tä ükaninte kwin nünakäre. Ñö tärä krubäte kä tibienbätä, ñö ye kwin krubäte ja nire kräke. Kä tibien tä ükaninte metre, ñodre, tä räkä kirire, tä dänikwite ta aune tä näin bolore ta ne kwe ñö kä jökräbiti tibien ñaka rabadre nikrenkä aune ñaka rabadre ngrötökä. Atmósfera aune campo magnético tä kä tibien bäre ta ye tä kriemike kä trä ngire yebätä. Arato jondron nire aune kri bätäkä ngwarbe tä nire ja köböire kwärikwäri. Yebätä, nüke gare nitre kwati ie Kä tibien ne sribebare kukwe kwin kräke. (Mäkwe ñäkä Isaías 45:18 yebätä.)

Akwa, kukwe käme aune ja tare nikata krubäte Kä tibienbätä kä nengwane yei Ngöbö tö namani arato, ye nitre ruäre tä ngwentari jai. (Mäkwe ñäkä Deuteronomio 32:4, 5 yebätä.)

Kä tibien sribebare nünankäre kä jutobiti nitre ja mräkäre ie, nitre ye rabadre ja mike ütiäte jai kwärikwäri aune rabadre Ni ni Sribekä ye tarere. Ye tä mike gare kukwe kwin tä ni kräke, akwa bäri ütiäte kukwe tä jondron nire aune kri bätäkä ngwarbe kräke yebiti ta. Nirekwe ni Sribebare ye nüke gare nie aune tä ni tarere bätä tä kukwe ükete metre ye ni raba mike tuin ütiäte jai aune ni raba ja ngwen niara erere. (Mäkwe ñäkä Eclesiastés 12:13 aune Miqueas 6:8 yebätä.)

Ni ni Sribekä tä dre käbämike ye jökrä raba mike nemen bare, yebätä gare metre nie kukwe käme aune ja tare nikata krubäte ye diainkä kwe, aune Kä tibien mikai kwe nünana kä jutobiti nitre ja mräkäre ie. (Mäkwe ñäkä Salmo 37:11, 29 aune Isaías 55:11 yebätä.)