Monsobiti kä kwä kükü yei rünta niere: “Mekerabe mekerabe Ngöbökwe Kä tibien aune jondron jökrä tä kä tibienbätä ye sribebare. Ñänä, Sö aune muke ye sribebare kwe arato”. Monso chi töita nemen neä kukwe ye jiebiti biti tä kukwe ne ngwentari rün ie: “Tata... ¿aune nirekwe Ngöbö sribebare?”.

Rün tä niere ie: “Niara ñaka sribebare. Ngöbö tä käre kore”. Kukwe ye tä kä mike juto monso chi yebätä. Akwa, tä kite nirien ye ngwane töta nemen kukwe ye mikai gare bäri jai. Ngöbö ñaka sribebare nieta ie ye ñaka nemen tuin metre ie. Nemen töbike “¿Kukwe ye metre? Jondron jökrä sribebare”. Tä nemen kukwe ne ngwentari jankunu: ¿ñokänti Ngöbö namani?.

¿Biblia tä dre niere? Ni rüne itibätä blitani tä kukwe niere ye erere Biblia tä niere arato. Moisés niebare Jehovai: “Mä jämi ngutuä sribere, o kä tibien aune dobro sribere, ye känenkri mä abokän Ngöbö kirabe aune käräkäre” (Salmo 90:1, 2). Isaías ni Ngöbö kukwei niekä käkwe kukwe ye erere niebare arato: “Jehová kä tibien jökrä Sribekä, niara Ngöbö nünanka käre. [...] ¿Ye jämi gare mäi o mä jämi kukwe nuin?” (Isaías 40:28). Aune Ngöbö tä “käre” mikata gare tärä Judas yebätä (Judas 25, Ngöbö Täräe, tärä okwä ükaninte).

Bersikulo ye tä mike gare Ngöbö “abra gobranka kärekäre”, Pablokwe niebare ye erere (1 Timoteo 1:17). Ni raba kä nikanina kirabe ta yebätä töbiketa, akwa niara ye abokän, tä käre kore. Aune täi käre (Apocalipsis 1:8). Ngöbö ñaka sribebare aune ñaka gaite jire, metrere niara ye kore.

¿Ñobätä kukwe ye ñaka tä nemen nuäre rükadre gare nie? Ni ñaka nüne raire yebätä, ye medenbätä Jehová kräke kä kwäbe ye erere ñaka ni kräke. Ñodre, niara kräke kä mil ye kä köböitibe ye erere, ñobätä ñan aune niara tä käre (2 Pedro 3:8). Ani bämike. Tröda niena kri ye tä nüne köbö 50 näre. ¿Nita nüne kä 70 o 80 te ye raba nüke gare ie? ¡Ñakare! Ni abokän tröda ye erere, ni ñaka Ni ni Sribekä ye erere. Niara töi bäri kri ni töi kräke (Isaías 40:22; 55:8, 9). Yebätä kukwe niarabätä ye ruäre ñaka raba nüke gare nie.

Ngöbö käre ye ñaka tä nemen nuäre rükadre gare nie, akwa kukwe ye metre. Ni iti käkwe Ngöbö sribebare akräke, ni ye abokän ni aune jondron jökrä Sribekä. Akwa, Biblia tä mike gare metre Jehovakwe jondron jökrä dätebare (Apocalipsis 4:11). Ne madakäre, kä kwinta aune kä tibien ne ñaka nämene ye gare kwin nie (Génesis 1:1, 2). ¿Ñokänti namani? Erametre, Ni jondron ye Sribekä namanina. Aune namanina nitre mada töbätä ye känenkri arato, ñodre, namanina Monso kena kwe aune angeletre ye känenkri (Job 38:4, 7; Colosenses 1:15). Erametre Ngöbö jämi jondron sribere ye känenkri nämene kaibe. Niara ñaka sribebare, ñobätä ñan aune jondron aune ni ñaka nämene jire niara känenkri.

Ni aune jondron jökrä sribebare ye tä mike gare metre Ngöbö käre ye tärä. Ni kä kwinta, kä tibien aune jondron jökrä sribekä bätä kukwe ükatekä jondron ye jie ngwankäre ye tä käre. Niara ye aibe köböire jondron mada nire ye jökrä namani (Job 33:4).