Ngöbö jämi ni kä tibienbätä dätere ye känenkri, mekerabe angeletre dätebare kwati krubäte kwe (Job 38:4, 7). Nitre üaire dite ye tä Ngöbö mike täte. Ruäre ngwane, tä juen nitre niara mikaka täte ye jie ngwen aune kriemike (Salmo 91:10, 11). Kä nengwane, angeletre tä nitre dimike ne kwe nitre ja tötikaka Jesukwe tä kukwe driere ye köböire kukwe kwin rabadre kwetre. (Mäkwe ñäkä Apocalipsis 14:6, 7 yebätä.)

Yebätä, ¿ni rabadre orare angeletre ie ne kwe ni dimikadre kwetre? Ñakare; ñobätä ñan aune orasion nuainta ye Ngöbö mikakäre täte, aune ni rabadre Ngöbö aibe mike täte (Apocalipsis 19:10). Angeletre tä Ngöbö mike täte yebätä Ngöböta dre ribere ietre ye erere tätre nuainne, aune nitre kä tibienbätä tä dre ribere ye ñaka ai nuainta kwetre. Ye medenbätä, käre ni rabadre orare Ngöböi Jesús käbiti. (Mäkwe ñäkä Salmo 103:20, 21 aune Mateo 26:53 yebätä.)

Nitre kä tibienbätä ye erere, angeletre dätebare ne kwe rabadre akwle dre kwin aune dre käme ye den nuaindre jai. Akwa, angeletre kwati Ngöbö kukwei mikani ngwarbe jai (2 Pedro 2:4). Satana ja mikani kena Ngöbö rüere; angeletre mada käkwe ye erere nuainbare aune ye köböite namanintre chokalire. Kä jämi niken raire ta yete Satana aune chokalitre kä kwinbiti kitani Kä tibienbätä. (Mäkwe ñäkä Apocalipsis 12:7-9 yebätä.)

Kä 1914 yete ja känenkäre kukwe käme tä krubäte aune ni mada nuainta tare. Ye tä mike gare Ngöbö köböra Satana aune chokalitre mike krüte, aune Kä tibien ne kwitai bä nuäre kwe. (Mäkwe ñäkä Apocalipsis 12:12 aune 21:3, 4 yebätä.)