Ti jataba ja kite gimnasia aune fisicoculturismo yebätä. Ye bitikäre tikwe gimnasio mikaba San Leandro (California, Estados Unidos) aune ti jataba sribire nitre fisicoculturista yebe, nitre ye iti gananbare míster América yebätä yebe ti nämä sribire. Ti rababa kukwänte ngrabare akwa ja ñaka rababa ruin kwin tie.

Ti tö nämä Biblia tuai nüke gare jai ye nämä gare ja ketamuko iti tikwe nämä nemen gimnasiote yei aune ni nämä gare ie yebe tikwe blitadre nieba kwe tie. Jetebe dekä se kwrere, ni testiko Jehovakwe rükaba ti känti aune ti nämä kukwe ngwentari ye mikaba gare kwe tie Bibliabiti ora kräbokä te. Jatadreta dere ti känti tikwe nieba ie, aune tikwe blitaba ben nememe kä ruäre deu. Nämä blite tibe ye rababa tuin kwin krubäte tie, yebätä jetebe se kwrere ti raba niken ben aune nämä blite ño ni madabe ye ti raba niken mrusaire o ñakare ye tikwe ngwantariba ie. Nitrekwe kukwe ngwantariba ye ni Testiko yekwe mikaba gare kwin Bibliabiti ietre yekwe ti töi mikaba ñan krütare. Yebätä tikwe ja töi mikaba ye erere nuainne.

Tikwe gimnasio rürübäinba aune ti rikaba kukwe driere prekursor yebe, nitre tä kukwe driere köbö täte ye nitre testiko Jehovakwe tä kädeke ye erere. Kä 1948 sö mayo yebätä tikwe ja ngökaba ñöte Estadio Cow Palace de San Francisco (California) yekänti. Kä rikaba kwati ta ye bitikäre tikwe ja mikaba prekursor arato.

Ye ngwane, nitre Testiko rikadre ti meye känti tikwe nieba ietre. Ti meyekwe nitre ye ka ngäbitiba kwin aune kä ñaka rikaba raire ta ye ngwane ja ngökaba ñöte kwe. Kukwe ye ñaka mataba kwin mräkätre kwe yebätä, akwa ti meye ja ngwanba metre Ngöböi nememe krütaba ye ngwane, krütani ye käi nikanina ruäre ta. Nun mräkätre ye ngätäite nun nibu aibe käkwe ja mikani Testiko.

Kä 1950 yete ti rikaba nüne Grand Junction (Colorado), kä yekänti Billie rababa gare tie. Kä 1928 ye ngwane niara därebare aune Kukwe Kri namani bare ye ngwane ngwian ñaka jatanina ütiäte ye näire ririabare. Käre deu meye kwe Minnie nämene ñäke Bibliabätä ie ñotra trä diäre yebiti. Kä namani kobokä Billie yebiti ye ngwane ñäkä namanina gare täräbätä ie aune kukwe kira namani bare kädrieta Bibliabätä ye keta kabre namanina gare töbiti ie. Kä 1950 jatanina ja ken ye ngwane, meye jatani ja tötike Bibliabätä nitre testiko Jehovakwe ben aune kä ñukwäre te nitre mikata ja tare nike drieta ye ñaka metre namani gare ie, ñakare aune ye abokän nitre tä niken ja düke tä krüte ye ngwane meden bämikata (Eclesiastés  9:5, 10). Minnie aune muko kwe ja mikani Testiko.

Billie nämene näin kwela krite Boston, akwa 1949 yete nükaninta ja gwirete aune jatani ja tötike Bibliabätä. Ñaka ja töi mikani kwe dirire kwelate, ñakare aune ja töi mikani kwe sribire Ngöbö kräke. Estadio Yankees Nueva York yekänti gätä kri känti nitre juta madate nübaita nuainbare nitre Testiko yekwe yete ja ngökani ñöte kwe kä 1950 ye ngwane. Kä rikaba braibe ta ngwane ja rababa gare nunye, nunkwe ja mäkäteba aune gwaire nun jataba sribire köbö täte Ngöbö kräke.

Nun rikaba nüne kena Eugene, Oregón, kä yekänti ja ketamuko rababa kwati nunkwe. Kä 1953 ye ngwane nun rikaba nüne Grants Pass konkrekasion te nitre nämä braibe ye dimikakäre. Kä ye arabe te nun nübaiba Kwela Galaad número 23 yete, ye abokän nitre testiko Jehovakwe nämene South Lansing yekänti nitre tötike sribikäre misionero, kä ye nämä nemenkä 400 kilómetro (250 milla) noroeste juta Nueva York yei.

Ti aune Billie graduaba Galaad ye bitikäre sö rikaba krärike ta ye ngwane, sö diciembre kä 1954 yete avión nen motor kububiti yete nun rikaba Brasil. Nun rikabara ora krati kwinta angwane motor kwati gidianteba, yebätä avión mikaba mata nüke tibien Bermudas. Kukwe rababa bare drekebe ngwarbe bobukäre yebätä avión mikaba mata nüke tibien Cuba, nunkwe nänbara raire 36 ora ye bitikäre nun rikaba nemen sukursal nitre testiko Jehovakwe Río de Janeiro (Brasil) yekänti.

Nun ñaka nuaba raire yete, ye bitikäre, Billie, misionera nibu aune ti rikaba Bauru (São Paulo) ju känene nitre misionero kräke. Juta yete nitre nämä nüne 50,000 biti bäri, aune nun aibe Testiko nämä yete.

Nun jataba näin nitre känti gwi gwi blitakäre bentre, akwa sacerdote kä yekänti nämä rubun nun kräke: nämä niken nun jiebiti aune nitre ñaka rabadre nun kukwe nuin nämä niere ietre. Akwa, nun jataba nitre ja mräkäre kabre tötike Bibliabätä. Bämän rikaba braibe ta ngwane nitre tö rababa ja mikai Testiko aune ye bitikäre ja ngökaba ñöte kwetre. Ñan raire aune nitre mada jataba ja tötike nunbe arato.

Nitre ja mräkäre ja ngökaba ñöte ye mräkä iti nämä ji ngwen club social ütiäte yete. Nunkwe kukwe ükateba ben gätä kri nuainkäre club yete. Kukwe ye namani gare sacerdote ie angwane, ñaka nuaindre niebare kwe, akwa ni ji ngwanka yekwe ja ükakröba nitre mada sribikä ben yebe aune nieba kwe ietre: “Ñaka nuaindi angwane, tikwe ja diainkä sribite”. Mrä mada, nunkwe gätä kri nuainba.

Kä 1956 yete, nitre Testiko 40 bäsi nämä konkrekasionte nunbe yebe nun rikaba tren yete gätä kri nuaindre Santos (São Paulo) yebätä. Nun rükabata Bauru ngwane, ti rikadre ni ni tuabitikä ye erere konkrekasion nitre testiko Jehovakwe ye tuinbiti tikani täräbätä ti kräke kwanba tie. Tikwe sribi ye nuainba bäsi kä 25 te aune tikwe dikakaba juta Brasil ye jökrä te.

Kä ye ngwane, ñaka nämä nuäre nänkäre kä madakänti, ñobätä ñan aune nun nämä niken bus, tren, bicicleta, carreta yete aune nun nämä näin gürere arato. Kena nun janama konkrekasion tuinbiti Jaú (São Paulo). Yete sacerdote rakakaba nun rüere.

Nieba kwe nunye: ¡Mun ñaka raba kukwe driere obeja tikwe yei!

Nunkwe nieba kukwei gäre: Obeja ye ñaka mäkwe. Ye Ngöbökwe.

Nunkwe kukwe ükateba video kädekata La Sociedad del Nuevo Mundo en acción ye mikakäre tuare ne kwe sribi Ngöbökwe nuainta ño kä jökräbiti tibien ye mikakäre gare, akwa sacerdote nikani nitre nänkä ben yebe nun nuainkäre tare. Ye rababa gare nunye angwane,  nunkwe ñäkäba guardiatre ie telefononte. Nitre ye jataba nüke kä yekänti angwane, guardiatre nämä kwati yete kürübe kisete aune nämä kürü ñäke bätätre. Nitre video tuaba yebätä kä rababa juto krubäte.

Kä jökrä känti nitre kukwebätä brukwä nämä nun kräke. Ñodre, kä Brusque, nemenkä Blumenau (Santa Catarina) ken, yekänti prekursora nibu rababa gare nunye. Nämenentre kukwe driere yekänti rüe nämene nakainkä krubäte, akwa kä ngwani nüke kwetre jai ye köböire kukwe kwin namani bare. Kä nikanina 50 ta, kä nengwane konkrekasion tä 60 biti bäri kä yekänti, aune Ju ja Ükarakrö Gätä Kri Kräke bä nuäre tä känime Itajaí.

Nun nämä konkrekasion tuinbiti ye ngwane nun nämä kukwe ükete gätä kri kräke ja mräkätre ben ye käi nämene nemen bäri juto nunbätä. Kä 1975 nemen 1977 ye ngwane ti nämä gätä kri jie ngwanka Estadio kri Morumbi yete. Konkrekasion nämä känime ye 100 te nitre ribeba ni jätä jene jene ne kwe rikadre estadio ye ükete gätä kri nuaindre ye känenkri deu.

Köbö ye näire deu, nitre bola täkätekä nämä kiteta kä bätäri ye ngwane nämä kukwe ne niere nun kötaikäre kwärä: “¡Meritre tä kä sökaraka ben kisete tua yete!”. Kä sökaraka aibebiti akwa estadio ye jökrä rababara merebe kä ruäre deu. Ni ji ngwanka estadio yete käkwe nieba: “¡Munkwe sribi nunien ora braibe te ye nun abokän käkwe nuaindre bämän krati jire!”.

Kä 1980 yete ti rün krütaba aune kä rikaba braibe ta ngwane nun rükabata Estados Unidos ti meye ngübakäre Fremont (California). Ju krikri bätädrete aune ükadrete yebätä nun nämä sribire dibire ne kwe nun tädre prekursor ye nuainne jankunu aune nun tädre nitre blite kukwe portugués yebiti ye dimike. Ye bitikäre valle de San Joaquín nemenkä Fremont ken yekänti nun rikaba nüne. Kä kri Sacramento nemen Bakersfield yekänti nun nämä nitre blite kukwe portugués yebiti ye känene arato. Kä nengwane kä California yekänti konkrekasion niena ketajätä kukwe portugués yebiti.

Ti meye krütaba ye bätärabe kä 1995 yete nun rikaba Florida Billie rün ngübakäre nememe krütaba ye ngwane. Meye krütanina kä 1975 yete. Kä 2000 yete nun rikaba nüne meseta desértica nemenkä suroeste kä Colorado yei yekänti. Kä yekänti nun nämä kä denkä jai blitakäre Bibliabätä nitre navajo aune ute tä nüne ja käite yebe. Febrero 2014 yete Billie krütani.

Tikwe kukwe ngwantariba ye ni testiko Jehovakwe mikaba gare Bibliabiti tie ye käi nikanina 65 biti bäri ta. ¡Tikwe kukwe nuaba aune nämä blite tibe ye metre o ñakare ye tikwe mikaba gare jai ye käita juto tibätä! Ye köböire, tikwe ja dianinkä sribikäre Ngöbö kräke... aune ye bäri kwin.