Kena tikwe nünanba ti mräkätre yebe Leipzig, República Democrática Alemana kirabe ye ken, kä ye nämä nemenkä Polonia aune República Checa kä nengwane ye ken. Kä nämä kwä ti tibiti ye ngwane nun rikaba nüne Brasil ti rün nämä sribire kä yekänti yebätä, biti Ecuador.

Kä rababa 14 tibiti ye ngwane, ti rün aune ti meye käkwe ti juanbata Alemania ja tötikakäre internado yekänti. Ti rababa mente krubäte niaratre yebätä ye medenbätä ja nämä gare kaibe tie. Ti nämä jondron nuainne kaibe aune jondron nuain nämä tikwe ye nämä mate kwin ni madabätä o ñakare ye ñaka nämä töibikadre ti kräke.

Kä rababara 17 tibiti ye ngwane ti rün aune ti meye rükabata Alemania. Kenanbe tikwe nünanba bentre, akwa ti tö nämä jondron nuain kaibe yebätä niaratre nämä dre niere tie ye ñan nämä nemen kwin ti kräke aune kä rababa 18 tibiti ye ngwane tikwe kä mikakaba gwi.

Köbö nämä niken kwatire kwatire ta yete bäri ja ñaka nämä nemen ruin kwin tie, yebätä dre dre kwin nuain raba tikwe ye ti jataba känene. Nitre nämä kukwe ükete ye nämä dre dre nuainne yebätä tikwe kukwe mikaba gare jai, aune nitre kä nebätä käkwe kä tibien bä nuäre ne juandre ngwarbe ye känenkri bäri kwin tikwe mikadre gare jai ye rükaba gare tie.

Tikwe motocicleta kökaba jai, tikwe kä mikakaba Alemania aune ti rikaba África. Akwa, kä ñaka rikaba raire ta angwane, ti rikabata Europa ñobätä ñan aune moto rikaba ngwarbe tikän. Tikwe ükatebata jai ye bitikäre, ti rikaba nüne ümanbiti Portugal. Ti rababa yete ye ngwane bäri kwin tikwe moto ye tuanemetre aune ti rikadre barcote kä jökräbiti tibien ti rababa nütüre.

Monsotre nämä ja mike juto nänkäre océano Atlántico yete ta ben ti rikaba. Monsotre ye ngätäite Laurie nämä, ja käne nunkwe ja mäkäteba. Nun rikaba nemen ngutuä mrente jene jene Caribe yekänti biti nunkwe ñaka nuaba raire Puerto Rico angwane, nun rikabata Europa. Laurie aune ti törbaba barco chi (velero) ie aune ti törbaba ükaite jai nünankäre te. Akwa sö krämä te nunkwe känänba, ye bitikäre nunkwe tuametreba, ñobätä ñan aune nitre Alemania rükä rikaba ti ngwena jabe.

Sö rikaba 15 ta yete tikwe sribiba nitre rükä Mrenbiti yebe, aune kä ye näire nunkwe ja mäkäteba. Nun tö nämä nänbätä  jankunu kä jene jene känti. Nitre rükä jämi niken ti ngwena ye känenkri, nunkwe lancha nitre diantarikäre ye kökaba jai aune ti nämä sribire nitre rükä ben ye ngwane, nunkwe lancha ye ükateba jai barco chi (velero) ye kwrere. Nun töi nämä nünanbätä te aune nänbätä jankunu kä jökräbiti tibien. Ti ñaka rababara sribire nitre rükä Mrenbiti yebe aune barco jämi nemen bare tie ye känenkri, nitre testiko Jehovakwe blitaba nunbe aune nun jataba ja tötike Bibliabätä.

Tikwe kukwe keta kabre tuanemetre ye tikwe ñaka nütüba kenanbe: meri nämä nüne tibe yebe tikwe ja mäkäteba aune tikwe sö dua ye tuametrebara (Efesios 5:5). Ne madakäre, ti nämä näin kä jökräbiti tibien jondron sribebare bä nuäre Ngöbökwe mrusaikäre ye abokän ti nämä kukwe kwin nuainne rababa ruin tie.

Akwa kukwe ruäre nämä tuanemetre tie, metrere ja töi nämä kwitadre tie. Ja nämä ruin bäri tie aune ti töi nämä jondron nuainbätä kaibe, bätä dre dre nuain nämä gare tie aune dre dre nämä tikwe yebätä ti nämä bike bike. Ja nämä bäri ütiäte ti kräke.

Bati tikwe ñäkäba Kukwe Kädriebare Ngüdrebiti Kwin yebätä (Mateo, kapitulo 5 nemen 7). Dre nuaindre nünankäre kä jutobiti abokänbätä Jesukwe kukwe niebare yebätä ti töi rababa ñan krütare kenanbe. Ñodre, niebare kwe nitre ie mröta nemen krubäte aune tomana tä nemen krubäte yebätä kätä nemen juto (Mateo 5:6). Akwa nitre ie mröta nemen krubäte aune tomana tä nemen krubäte yebätä kä raba nemen ño juto ye ti nämä ngwentari jai. Kukwe Bibliabätä jataba gare bäri tie ye ngwane ni jökrä tä kukwe ja üaire ye ribere jai ye jataba nüke gare tie aune rabadre nikwe yekäre, tärä nikwe ye rabadre nüke gare käne nie. Ye erere Jesukwe niebare krörö: “Nire nire ie gare tä kukwe ja üaire ribere jai yebätä kätä juto” (Mateo 5:3, TNM).

Laurie aune ti jataba ja tötike Bibliabätä Alemania, akwa nun rikaba nüne Francia aune ye bitikäre nun rikaba nüne Italia. Nitre Testiko ye nämä kä jökrä känti. Niaratre nämä ja tarere aune keteitibe yebätä ti töi rababa ñan krütare. Niaratre kä jökräbiti tibien ye nämä erametre ni ja mräkäre ye kwrere rababa tuin tie (Juan 13:34, 35). Ja käne nunkwe ja ngökaba ñöte.

Ti rababara testiko Jehovakwe, akwa ja töi nämä kwitadre jankunu tie. Laurie aune ti rikaba mente mrenbiti tibien África aune nun rikaba Atlántico ta nemen Estados Unidos. Nun nämä mobe mrenbiti tibien, barco chi te aune kä jate ñaka rababa tuin nunye ye ngwane, rükaba gare tie nibrä ngwarbe aune Ni ni Sribekä ye abokän kri krubäte. Kä nämä krubäte tie (mrenbiti jondron ñaka nuaindre krubäte), yebätä ti jataba ñäke Bibliabätä. Jesukwe dre dre nuainbare nieta yekwe ti töi mikaba ñan krütare. Niara ye töi nämene metre aune töi nämene kwin krubäte, akwa ñaka namani bike bike. Ja ñaka nämene bäri ütiäte kräke, ñakare aune Rün ye nämene bäri ütiäte kräke.

Jesukwe dre dre nuainbare yebätä tikwe töbikatariba angwane, tikwe ñaka Gobran Ngöbökwe ye mikadre köre jai, ñakare aune tikwe mikadre käne jai ye rükaba gare tie (Mateo 6:33). Nun rikaba jate Estados Unidos ye ngwane, nun nämä niken kä jene jene känti ye nunkwe tuametreba aune nunkwe ja töi mikaba sribi Ngöbökwe nuainne.

Käne, ti töi nämä ja aibebätä ye ngwane, dre dian nämä nuaindre tikwe jai ye köböire jondron kwin o jondron ñaka kwin rabai tikwe ye ñaka nämä gare tie. Kä nengwane kukwe kwin köböire jondron kwin tä nemen nikwe käre ye kwanina tie (Isaías 48:17, 18). Ne madakäre, jondron kwin nuaindre ye kwanina tie: ye abokän Ngöbö mikadre täte aune nitre mada dimikadre Ngöbö mike gare jai.

Kukwe nieta Bibliabätä ye köböire ti aune Laurie tä nüne bäri kwin jabe. Ne madakäre, Jehová köböire nun ngängän bä nuäre tä nunkwe aune niara ie Ngöbö namani gare bätä tä tarere arato.

Nunkwe ja tuabarera kukwe keta kabre ben. Akwa Jehová ñaka tä nun tuenmetre kaibe aune nun töita kwatibe nänbätä ja käne bätä tö ngwain käre ie (Proverbios 3:5, 6).