Kä nikanina 3,000 ta yete ni poeta kukwe ne tikabare: “Mäkwe ti sribebare kwin krubäte yebätä tikwe mä käi ngwain nuäre jabätä” (Salmo 139:14). Aune kukwe ye metre: jondron chi (célula) ye tä kite nikwite monso chi erere ye tä ni töi mike ñan krütare, ¿ñan ererea? Ni aune jondron nire ye jökrä Ni ni Sribekä käkwe sribebare nitre kwati tä nütüre. (Mäkwe ñäkä Salmo 139:13-17 aune Hebreos 3:4 yebätä.)

Ni jondron jökrä Sribekä ye käkwe Kä Tibien sribebare aune jondron jökrä nire tä te ye sribebare kwe arato (Salmo 36:9). Niarata kukwe mike gare ni kä tibienbätä ie ne kwe niara rükadre gare ietre. (Mäkwe ñäkä Isaías 45:18 yebätä.)

Kukwe keta kabrebätä ni ngrabare ye bäsi ja erebe jondron mada nire yebe. Ni Sribekä itibe käkwe ni aune jondron jökrä ye sribebare nünankäre Kä Tibienbätä yebätä ni bä ja erebe. Niarakwe ñaka ni nire sribebare jondron mada nire ye köböire, ñakare aune ni sribebare kwe dobro yebiti. (Mäkwe ñäkä Génesis 1:24 aune 2:7 yebätä.)

Kukwe ketebu abokänbätä ni ñaka ja erebe jondron nire mada yebe. Kena, ni raba Ni ni Sribekä ye mike gare jai, tarere aune mike ütiäte jai. Ketebukäre, ni sribebare nünankäre kärekäre, akwa jondron mada nire ye ñaka sribebare ye erere. Ni brare kena ye käkwe Ngöbö kukwei mikani ngwarbe jai yebätä nita krüte. (Mäkwe ñäkä Génesis 1:27 aune 2:15-17 yebätä.)