JOSÉ tä näin gwita aune krübärie tä nen ngrabare. Sribi ye ribi aune kä ngire krubäte. Ju bäre kä ngwen, akwa kä teri kä trä ñaka, kä drüne. Tä ngite yekänti kä jutra ngitiekä Ñänä ngire krubäte yebätä. Ladrillo kwatire kwatire tä ngetrani ye niena gare töbiti José ie; nete tä nüne mantre jetebe. Mikata ütiäte jai, akwa niara tä ngite.

¡Ju kwe, oveja rünkwe, ngutuä Hebrón ye törö krubäte ie! Kä nämene 17 niarabiti ye ngwane nänbare mente krubäte kwe rünkwe juani jondron nuainne ye nuainkäre. Nengwane tä näin gwita kä tä ketaninkä nitre ngite kräke ye aibe känti. Niara etebatre brukwä namani krubäte kräke yebätä tö namanintre murie ketai aune mrä mada rürübäinbare kwetre nitre jondron rürübäinkä yei. Jänikani Egipto, yete sribibare kwe ni kädeka nämene Potifar kräke. Kä nikani ta angwane ni ye namani tö ngwen ie, akwa Potifar muko kukwe ngwarbe niebarebätä, tö namani mikai ja dibiti jabe niebare kwe yebätä kitani ngite. Nengwane tä nete, ngite kä käme nekänti (Génesis, kapitulo 37 bätä 39). *

Kä niena 28 Josebiti, kä 10 tä klabore o ngite. Ñaka nämene töbike nünanbätä ne erere. ¿Niara mikaita kwäre? ¿Rün tare kwe aune eteba köre Benjamín ye tuaita kwe? ¿Nuadi kä kwäbe kwe ketaninkä nete?

¿Ja tärä nemen ruin José ye erere mäi? Ni nämene bati ye ngwane ni tö nämene nünain ño ye abokän erere ruäre nüna ñaka. Ruäre ngwane kukwe tare ye ñaka krütai jire aune ñaka ükaite jire tä nemen ruin nie. ¿Kukwe mikata gare Josebätä ne raba ni dimike ño? Ani mike gare jai.

Jehová ñaka José tuenmetre jire ye gare ie aune ye kätä dimike kä ngwankäre nüke jai. Tä kä drüne te ngite, akwa Ngöbö kwe tä jondron kwin nuainne kräke. “Ngöbö nämane [José] ben jangunu, aisete nämane die mike, abko köböire ni nämane ni ngite ngibiabtikä abko, nikani tödeke Josebti mda” nieta Bibliakwe (Génesis 39:21-23, Jändrän Kena, [JK]). José sribibarera ja dibiti aune jondron keta kabre nuainbarera kwe yebätä Ngöböta dimike. Niara ñaka tä kaibe gare ie ye kätä töi mike jäme raba ruin nie.

“¿Jehová ti tuainmetre kärekäre nete?”, José tä ngwentari jai raba ruin nie, akwa kukwe ye ñaka gare ie. Tä kukwe ne niere mantre jetebe orasionte. Aune tä nemen bare ye erere, niara ñaka kukwe ngübare abokän erere nibi bare. Ni mada nibu jänü ngite yebätä kukwe nibi bare. Ye abokän ni nibu tä sribire metre ta faraón Egipto ye kräke: ye ni ban sribekä bätä ni vino bianka rei ie (Génesis 40:1-3).

Jefe nitre ngite ngübabitikä ye käkwe nitre nibu ütiäte miri ngübadrebiti José ie. * Deu, niaratre nibu  käkwe köböni aune ye käkwe miri töbike krubäte. Käki ngwen dekä ye ngwane, nitre ye nibi tuin jene José ie yebätä ngwinintari kwe ietre: “¿Dre kukwe mtare amaribti, mun nibi ulire ulire dikaro nibi tuen tie yere?” (Génesis 40:3-7, JK). Blitani töi jämebiti kwe bentre ye käkwe niaratre töi miri ja driere ie. Niaratre blitani ye köböire kukwe rabai bare bä jene kärekäre José kräke, akwa ye ñaka gare ie. Ni raba ngwentari jai: ¿Josekwe ñaka ja töi mikadre niaratre yebätä akräke niaratre blitadre ben? Kukwe nuainbare kwe ye käkwe ni mikadre ngwentari jai nita ja töi mike ni mada dimikabätä o ñakare. Yebiti nita tödeke Ngöböi nita bämike.

Nitre nibu ye käkwe köböni aune dre gärätä ye ñaka gare ietre nini kwe José ie. Köböta ye tuin ütiäte krubäte nitre Egipto ie aune käre tä nitre känene ne kwe köbö ye mikadre gare kwe ietre. Jehová Ngöbö Josekwe käkwe nitre ye miri köböre ye ñaka gare ietre, akwa gare José ie. Yebätä nitre ye töi mikakäre jäme nini kwe ietre: “Munkwe köböniri ño, ye niere tie munkwe, ñobtä ñan angwane Ngöböbe köböire, [...] ti raba niere munye” (Génesis 40:8, JK). ¡Ni töbätä erere kukwe nini kwe! Ni jökrä ja tötikaka Bibliabätä kä nengwane rabadre ja töi mike bobre ye erere arato. Nikwe ñaka bikadre kri aune ja di kärädre Ngöböi ne kwe Kukwe kwe tä dre niere ye rükadre gare metre nie (1 Tesalonicenses 2:13; Santiago 4:6).

Ni vino bianka käkwe blitani käne. Niarakwe kri mu chi turi köböre, vid küde krämäbätä uva ngwä nibi nemenkä. Uva ye nibi taine aune niarakwe ñöi kwarite copa reikwe yete. Jehová diebiti, köbö ye tä dre mike gare ye nü gare drekebe ngwarbe José ie aune kri küde krämä ye abokän köbö köbömä meden gärätä nini kwe ni yei: köbö böbömä te rei käkwe mikaita sribire täte. Ni vino bianka yebätä kä nibi juto angwane, Josekwe kukwe ne ribeni ie: “Ma raba sribireta Baraonkrä angwane, tita ngite nete rüka töre mae angwane, makwe ti ngwian ruen bobre jae. Makwe blita tikrä Baraonbe” (Génesis 40:9-15, JK).

Ni vino bianka yei kukwe kwin miri gare, yebätä ni ban sribekä käkwe köböni ye nini kwe José ie. Kutuä täni komä niara dokwäbiti turi köböre kwe. Kutuä ye kwati ban täni aune kutuä kwati yete nukwä nibi ban ye kwete. Jehovakwe köbö ye mirita gare José ie, akwa nekänti kukwe tare miri gare kwe. José nini: “Kutia komä turi makwe, ye abko köbömä mtare Baraonkwe ma tuamna nete arato, bti ma jäkämnadi kribtä käin kwe. Ma krütadi angwane, nukwäkwe ma kwetadi” (Génesis 40:16-19, JK). Ni Ngöbö mikaka täte jökrä ye erere, kukwe kwin o kukwe käme kärera, José ñaka kä jürä ngwini jabätä kukwe Ngöbökwe ye mikakäre gare (Isaías 61:2).

Köbö niki köbömä ta angwane José kukwe nini ye erere nibi bare täte. Faraón tä cumpleaño kwe ye käi ngwen juto jabätä, juta Ngöbökwe kirabe ñaka nämene ye nuainne, cumpleaño ye näire kukwe ürüte kwe nitre nibu sribikä kwe yebe. Ni ban  sribekä ye murie kiti, José niebare ye erere, akwa ni vino bianka ye tunimetre nire aune mirita sribire kwe. Akwa ni vino bianka ye käkwe José käi kwitikä jabiti (Génesis 40:20-23).

Kä nikira kubu ta (Génesis 41:1). José tä ulire krubäte raba ruin nie. Nitre nibu käkwe köböbare ye Jehovakwe dimikani mikakäre gare ietre, ye bitikäre mikai kwäre namani ruin ie. Niara mikai kwäre ye ie nämene tö ngwen mantre jetebe, aune köbö kwatire kwatire deu nämene ketaninkä ye nämene mike ulire krubäte raba ruin nie. Kä kubu yete ja tare nikabare bäri krubäte kwe raba ruin nie, akwa ñaka ja di ngwani nekä jire kwe kukwe yebätä; tö ngwani jankunu kwe Jehovai. Töi nämene kwatibe nänbätä ja käne, aune kukwe tare namani barebätä ye käkwe mikani bäri dite (Santiago 1:4).

Nita nüne ne näire kukwe tare krubäte tä nemen bare, yebätä ¿nikwe kä ngwandre nüke jai ye nire ñaka ribere? Kukwe tare tä nakainkä nibätä yebätä ni tö kä ngwain nüke jai angwane, Ngöbö aibe raba ni töi mike jäme aune ni mike kukwe kwin ngübare bätärekä ye nita ribere. Niarakwe José dimikani, aune ni dimikai kwe kä ngwankäre nüke jai nita nemen di nekä ye ngwane aune ni mikai tö ngwen kwe kukwe kwin ie (Romanos 12:12; 15:13).

Ni vino bianka rei ie ye käkwe José käi kwitikä jabiti, akwa Jehová ñaka käi kwitekä jabiti. Deu faraón miri köböre bobu kwe. Kena, rei käkwe nibi köte köte aune kwin turi krä kükü näin jate ñö Nilo yete aune ye bitikäre nibi krä aune bren krä kükü turi kwe. Angwane, nibi krä ye käkwe nibi köte ye ñarikä. Köböninta kwe ye ngwane trigo ngwä nibi krä kükü krikri aune ere, ye bitikäre trigo ngwä krä kia aune nötare nibi trigo ngwä käne ye ñainkä turi kwe. Rei nü ngwäte dekä ye ngwane, köböni kwe ye nibi mike töbike krubäte aune nitre töbätä, nitre sukiare aune nitre ja di käräkä choka ie ye käräni kwe ne kwe köbö ye mikadre gare kwetre ie, akwa ñaka nü gare ietre (Génesis 41:1-8). ¿Kukwe ñaka ngitianinkä? ¿Dre niebare kwetre? Ñaka gare nie. Kukwe ye ñaka nükani gare jire ietre yebrä gare nie aune faraón abokän tö namani köbö ye mikamana gare jai.

Mrä mada ni vino bianka ye käkwe José ngwini törö jai. Niara töi nibi nike, yebätä niki faraón känti aune kä nikanina kubu ta niara bätä ni ban sribekä käkwe köböbare ye monso iti töbätä käkwe mikani gare metre ietre ye kädrieni ben kwe. Bengwairebe faraón käkwe ni juni José den jakänti (Génesis 41:9-13).

Nitre rei kukwei ngwanka nükani José känti angwane ja namani ruin ño ie ye ñaka raba gare nie. Drekebe ngwarbe dän kwiti jabätä kwe aune ja klo sürü kwe. Ja dokwä drüen ye sökani kwe arato raba ruin nie, ñobätä ñan aune ye erere nitre Egipto nämene nuainne. ¡Niki rei ngwärekri ye ngwane orani krubäte kwe Jehovai ne kwe kukwe kwin mikadre nemen bare kwe kräke raba ruin nie! Jötrö ngwarbe nibira ju kri gobrankäre yete, faraón ngwärekri. Reikwe kukwe ne niebare José ie nieta Bibliakwe: “Tikwe köböniri abko, dre käbätikani tikwe ñan nebe nüke gare jire chi ni mdaye. Akwa ma abko, nita köböre nieta mae angwane, dre käbätikata täbe nüke gare mae, nini tie”. José töita bobre aune tä tödeke Ngöböi ye bämiri kwe bobukäre kukwe nini kwe nebiti: “Makwe dre [turi] ma tö gai, ye ti ñan raba niere ja di jenbti amne, Ngöbökwe niedi mae ti dänkien” (Génesis 41:14-16, JK).

Nitre töi bobre aune ja ngwen metre ye Jehová tä mike tuin ütiäte krubäte jai, ye medenbätä nitre töbätä bätä nitre sacerdote Egipto tö kukwe gai ye abokän miri gare kwe José ie. Faraón köböni bobu ye tä kukwe arabe mike gare José nini ie. Kukwe ja erebe miri gare, ye tä mike gare Jehovakwe “kukwe mikaninantebe” ye abokän erere rabai bare. Nibi köte köte aune trigo ngwä ere ye abokän kä kwä kükü te jondron rabai krubäte Egipto meden gärätä. Nibi krä aune trigo ngwä nötare ye abokän kä kwä kükü te mrö nikadi ja känenkäre meden gärätä. Mrö nikadi krubäte ye medenbätä jondron ngwä namani krubäte ye käi rikwitaikä nitre yebiti (Génesis 41:25-32).

José kukwe miri gare ye metre ye gare rei ie. Akwa ¿dre nuain raba? Kukwe ne erere nuaindre Josekwe nini: rei käkwe “ni töbtä kri känändre”  nüra ngwä rabai kä kwä kükü te ye ükakrökäre ne kwe mrö nikadi ye ngwane rabadre döräire (Génesis 41:33-36, JK). Erametre, José käkwe sribi jie ngwanina ye käkwe tötikani sribi ye nuainkäre, akwa niara ñaka tä ja mikamana ütiäte faraón ie. Niara töi bobre krubäte aune tä tödeke krubäte yebätä kukwe ye ñaka nüke töite. Nita tö ngwen metre Jehovai angwane, ni ñaka rabai ja käikitekä aune jondron ribere jai arato. Nikwe kukwe ye tuainmetre kisete aune nikwe ngübai bätärekä, niarakwe kukwe ye ükaite ño ye gare ie yebätä.

José kukwe nuainmana ye kwin ye gare faraón bätä nitre sribikä kwe yei. Ngöbö tä monso ye dimike ye gare faraón ie, ye medenbätä bengwairebe, nitre sribikä kwe ye jökrä ngwärekri nini kwe: “Ni ne kwrere ñakare jire mda ni ngätäite nete”. Aune kukwe ne nini kwe José ie: “Tikwe köböbare abko, Ngöbökwe mikani gare jökrä mae, aisete ni töbtä kri ma ye kwrere ñakare jire mda nete. Ye aisete ma rabadi jändrän jökrä tikwe ngibiabtikä nete. Mdakäre abko, makwe dre nuemna, ye erere ni jökrä rabadi ma kukwei mike täte, akwa ti abko, dänkine jreire aisete ti aibe rabadi ma dänkiene” (Génesis 41:38-41, JK).

Faraón kukwe niebare ye erere nuainbare kwe. Ni juani kwe dän kwin linore kite Josebätä, anillo kwe ye dianinkä ja kisebätä kwe aune biani kwe ie. Arato cadena orore biani kwe ie, mikani ütiäte kwe aune karo nitre reire kräke biani kwe ie ne kwe rikadre kwäräkwärä juta yete sribi kwe ye nuainkäre (Génesis 41:42-44). José mikani ngite aune mrä namani ju gobrankäre reikwe yete; namani ni ngite ye erere akwa mrä namani ni nibukäre bäri ütiäte Egipto. José käkwe tö ngwani Jehovai ye abokän kukwe bäri kwin nuainbare kwe ye namani gare ye näire. Kä kabre te kukwe tare nuainbarebätä ye Ngöbö kwe käkwe tuani aune ñongwane ükadrete ye erere ngwane nuainbare kwe bätä ükaninte bäri kwin kwe. Akwa Ngöbö ñaka tö namani kukwe ye ükaite jerekäbe, ñakare aune tö namani juta Israel ja känenkäre ye kriemikai. Kukwe nebätä blitai kukwe mada kädriei jatäri yekänti.

Mekerabe kukwe tare nuainta mäbätä o kukwe tä nemen bare mäbätä angwane, mäkwe ñaka ja töi mika ulire krubäte. Mäkwe José ngwan törö jai: käre ja töi mikani bobre kwe, tödekani kwe aune ja töi mikani jäme kwe ni jökrä kräke. Kä ngwani nüke kwe jai nememe mrä aune kukwe keta kabre nuainbare kwe ye köböire Jehovakwe jondron kwin nuainbare kräke.