Omar: Tibike niere metre mäi, ti töi ñaka krubäte kukwe Ngöbökwe yebätä. Ye medenbätä kukwe ñaka krubäte kädriedre nie raba ruin tie.

Bruno: Mä töita ño erere mätä niere yebätä tä debe. Ti kä Bruno. ¿Aune mä abokän kä ño?

Omar: Omar.

Bruno: Mä käi nibi juto tibätä, Omar.

Omar: Ti arato.

Bruno: Ti tönibi kukwe ngwaintari mäi: ¿käne mä nämene kukwebätä?

Omar: Jän, ti nämä chi ye ngwane. Akwa ti rikaba ja tötike kwela krite ye ngwane kukwe ye rababa tie.

Bruno: Nibira gare tie. ¿Drebätä mäkwe ja tötikabare kwela kri yete?

Omar: Historia aune Ciencias sociales yebätä. Kukwe namani bare kirabe kädrieta ye tä nemen tuin kwin tie; nitre käkwe dre dre nuainbarera jatäri kä tibienbätä yebätä ti töta nemen ja tötikai.

Bruno: Jän, ye kwin krubäte. Kukwe namani bare kira ye Biblia tärä mike gare ye gare mäi raba ruin tie. ¿Mä tärä kukwe känene tärä yebätä?

Omar: Ñakare. Tärä ye kwin krubäte gare tie, akwa kukwe namani bare kira ye kädrieta kwe yebätä ti ñaka töbike jire.

Bruno: Mä ñaka nitre kitete raba tuin mäbätä tie. Kä tärä mäi angwane, kukwe namani bare kira ye Biblia tä mike gare metre ye ti törba mikai gare ruäre mäi.

Omar: Raba tuin kwin tie, akwa Biblia ñaka tikwe.

Bruno: Kukwe ñaka. Tärä kwati nete tikwe. Käne, ani ñäke 1 Crónicas kapitulo 29, bersikulo 26 aune 27 yebätä. Ani ñäkebätä: “Angwane David Jesé ngobo, käkwe gobranbare juta Israel ye jökräbiti; aune niara gobranbare kä 40 te Israel yebiti. Hebrón yekänti gobranbare kä 7 kwe, aune Jerusalén gobranbare kä 33 te kwe”.

Omar: ¿Ye kukwe kena?

Bruno: Jän. Mekerabe, nitre ñäkäkä kukwe Bibliabätä rüere namanintre niere, kukwe mikata gare David yebätä ye abokän kukwe ngwarbe.

Omar: ¿Metreya? ¿Ñobätä?

Bruno: Ñobätä ñan aune David nünanbare ye kädrie nämene Biblia ye aibebätä aune mika ñaka nämene gare kä madabiti jire. Akwa kä 1993 yete, nitre arqueólogo ie jä kwani abokänbätä tärä okwä ketebu nämene tikani, tärä okwä ye kwitadre abokän “ju Davidkwe” aune “rei Israel” meden gärätä.

Omar: Mmm... Raba tuin kwin krubäte tie.

Bruno: Ni mada kädrieta Bibliabätä abokän ñaka nünanbare nitre kwati nämene niere, ye abokän Poncio Pilato, ni ye nämene gobrane Jesús näire. Ni ye nämene gobrane nitre mada nämene gobrane ye  näire nieta Lucas kapitulo 3, bersikulo 1 yekänti.

Omar: Ah, bäkänä, nete tä niere: “Gobernador Poncio Pilato nämane gobrane käkä Judeate. [...] Herodes Antipas abko nämane gobrane käkä Galileate”.

Bruno: Ye erere. Poncio Pilato nünanbare ye ñaka namani tuin metre nitre ie kukwe gare yei kä kwati krubäte te. Akwa kä nikanina 50 ta yete, Oriente Medio yekänti jä mada kwani abokänbätä ni ye kä nämene tikani.

Omar: Kwre tua yete, ye kukwe mrä ti kräke.

Bruno: Yebätä tita kukwe ye mike gare mäi ye kwin krubäte ti kräke.

Omar: Ti törba niei metre mäi, käre tita Biblia ye mike tuin jai tärä mada ye erere, akwa ñaka raba ni dimike kukwe kä nengwane yebätä raba ruin tie. Tä kukwe namani bare kirabe ye aibe mike gare raba ruin tie arato.

Bruno: Nitre kwati tä töbike mä erere, akwa ti töi ñaka ye erere. ¿Ñobätä gare mäi? Ñobätä ñan aune ni sribebare kena ye ngwane nükebe kä nengwane nita jondron arabe ribere jai. Käre nita mrö, dän aune ju ribere jai. Käre ni töta nemen blitai ni madabe aune nünain kä jutobiti ni mräkäbe, ¿ñan ererea?

Omar: Jän, ye metre.

Bruno: Nita dre dre ribere jai yebätä Biblia raba ni dimike. Tärä ye kira, akwa kukwe nieta kwe ye täbe ni dimike kä nengwane.

Omar: ¿Ye ererea?

Bruno: Jän, ye metre. Biblia tikani ye ngwane kukwe nieta kwe ye nämene ütiäte, aune täbe ütiäte kä nengwane.

Omar: Kwre, bämike keteiti tie.

Bruno: Nita töbike ngwian, ni mräkä aune ja ketamuko yebätä angwane, Biblia tä kukwe kwin krubäte niere ja jie ngwankäre nie. Mapa tä ni jie ngwen metre ye kwrere tärä ye bämikata. Ñodre, kä nengwane nikwe monsotre jie ngwandre kwin aune nikwe ni muko taredre ye ñaka nuäre, ¿ñan ererea?

Omar: Ye metre. Tikwe ja mäkätebare kä kwatira ti muko ben aune ruäre ngwane ñaka nemen nuäre kukwe ükatekäre jabe nunye.

Bruno: Biblia tä kukwe niere metre aune käre tä ni dimike. Ñodre, ani Efesios kapitulo 5, bersikulo 28 ye mike ñärärä. ¿Mä törba ñäkäibätä?

Omar: Jän, tä niere: “Ni brare brare käkwe meri kwe taredre. Amne niara tä ja ngrabare tarere au, ye kwrere meri kwe taredre kwe”.

Bruno: Tä debe. Ni brare gure käkwe kukwe ye erere nuaindre ye ngwane raba nüne kwin mräkä kwe yebe, ¿ñan ererea?

Omar: Jän raba ruin tie, ye nuäre niedre, akwa nuaindre ye ñaka nuäre.

Bruno: Ye erere, ni jökrä ngite. Ñodre, kapitulo ye arabebätä bersikulo keteiti tä mike gare nie nikwe töbikadre kwin. * Ni gure jökrä ñaka töbikadre ja aibebätä, ñakare aune töbikadre kwe muko kwe yebätä. Bibliakwe ti aune ti muko dimikanina ja töi mike ye erere.

Omar: Nibi tuin metre tie.

Bruno: Nun testiko Jehovakwe tä kukwe ütiäte mike Internet yete abokän känti kukwe ütiäte mikata gare nitre gure aune nitre ja mräkäre kräke. Kukwe meden meden mikata gare Internet yete ye tibike mike gare jötrö ngwarbe mäi.

Omar: Jän, jötrö ngwarbe akräke kukwe ñaka.

Bruno: Internet käi ye abokän jw.org... Ne página kena.

Omar: Foto ye nibi tuin bä nuäre tie.

Bruno: Ye ti mräkätre abokän tä kukwe driere kä jene jene känti kä jökräbiti tibien. Ani mike ñärärä... tä nete. Täräkwata ne kädekata Ngöböta kukwe kwin mike gare nie. Kukwe ja tötikara 9 yekänti kukwe ne ngwantarita: “¿Ni ja mräkäre raba nüne ño kä jutobiti?”. ¿Kukwe ketarike ne meden raba tuin kwin mäi?

 Omar: Ne: “¿Ni brare aune meri gure rabadre ja mike tuin ño jai kwärikwäri?”. Dre nieta kukwe yebätä ye ti törba mikai gare jai.

Bruno: Kukwe ye mikakäre gare, kukwe nieta Bibliabätä ja jie ngwankäre mikata gare ruäre, ye abokän raba ni dimike kä nengwane. Ñodre, ani párrafo ne mike ñärärä. ¿Mä raba ñäkebätä, Omar?

Omar: Jän. Tä niere: “Ni brare aune meri gure metre ye rabadre ja tarere aune ja mike ütiäte jai kwärikwäri. Niaratre nibu därebare ngite, ye medenbätä rabadre ngite juen ta jabiti ne kwe nünandre kä jutobiti kwetre jabe”.

Bruno: Mäkwe ñäribätä yebätä tärä debe. Texto Bibliabätä tä yete arato. Tita Biblia tikwe ngwen jai, mä raba ñäke texto yebätä.

Omar: Jän, Efesios 5:33 tä niere: “Mun itire itire käta ja tarere au, ye kwrere jire munkwe meri munkwe tare amne, mun merire merire abko käkwe ni brare munkwe mika ütiäte jae”.

Bruno: ¿Kukwe ye nü gare mäi? Ni itire itire tä dre ribere jai ye erere biandre kwetre jai ye meden gärätä.

Omar: Mike gare bäri kwin tie.

Bruno: Ni brare gure jökrä töta nemen ja mikamana ütiäte muko kwe ie, ¿ñan ererea? Aune meri gure jökrä töta nemen ja taremana muko kwe ie, ¿ñan ererea?

Omar: Jän, ye metre.

Bruno: Ni brare gure tä muko kwe tarere ye bämikadre käre kwe ie angwane, niara tö ja mikamana ütiäte muko ie ye erere muko raba nuainne, ¿ñan ererea?

Omar: Jän, raba nemen bare raba ruin tie.

Bruno: Kä nikanina 2,000 ta kukwe ye tikabare, akwa täbe ütiäte kä nengwane. Nitre gure käkwe kukwe ye erere nuaindre angwane, dre dre ribeta kwetre jai kwärikwäri ye erere nuaindi kwetre.

Omar: Kukwe keta kabre mikata gare Bibliakwe ye ti ñaka nämä nütüre ye ti raba niere metre.

Bruno: Mä töita kore ye kwin krubäte. ¿Mada ngwane ni raba bliteta kä nekänti jabe? Kukwe ja tötikara nekänti kukwe mada ngwantarita ne tuin ño mäi abokän ti törba gai: “Nitre gure ñaka tädre nüne kwin jabe, ¿yebätä rabadre ja tuenmetre?”. *

Omar: Raba tuin kwin tie. Tikwe ti muko nübai ñäke gwairebätä jabe.