Kä krütai ye näire kukwe tare krubäte rabai bare nieta Bibliakwe nie. Tä mike gare: “Kä dätebare kena angwane ja tare nika ñakare krübäte kore abko erere ja tare nikadi kri krübäte kä ye ngwane. [...] Ye abko, Ngöbökwe ñan köbö krötadre jötrö käne ja tare nikakrä, ye ngwane ni ñan rabadre dianintari jire iti” (Mateo 24:21, 22). Akwa nitre ruäre rabaite nire käbämikata kwe: “Jändrän jökrä kämekäme Ngöbö rüere [...] ye abko rikadi jökrä ta, akwa Ngöbö tö dreye, erere nire nire tä mike täte, ni ye abko käkwe nünandi kärekäre” (1 Juan 2:17).

¿Nikwe dre nuaindre ne kwe ni rabadrete nire? ¿Nikwe ja töi mikadre jondron ükökrö o kukwe mada nuainne? Ñakare. Biblia tä kukwe ne niere: “Jondron ne jökrä gütiaite, aune munkwe nünandi ño, aune mun rabai ño kwin deme, nebätä munkwe töbika. Munkwe köbö Ngöbökwe ngüba ngäbiti; aune arato munkwe köbö ne kröta jötrö ja ken” (2 Pedro 3:10-12, Ngöbö Täräe, tärä okwä ükaninte). Kukwe nieta yete ye tä mike gare nie, jondron keta kabre “gütiaite” ye abokän gobrantre käme kä nebätä, nitre jökrä kätä ja mike gobrantre yekri aune nitre ñaka gobran Ngöbökwe kain ngäbiti medenbätä blitata. Ye tä mike gare metre nie, jondron kä nebätä tädre ere nikwe ye ñaka käkwe ni mikai kwäre nitre käme gaite ye ngwane.

Erametre, Ngöbö tö ni tuai ja ngwen ño erere nikwe ja ngwandre aune nikwe mikadre metre täte ye köböire ni rabaite nire (Sofonías 2:3). Nita nüne kä krüte te ye nitre kwati ñaka mike era jai, ye erere nikwe ñaka ja töi mikadre, ñakare aune nikwe “köbö Ngöbökwe ngüba[dre] ngäbiti”. Mäkwe dre nuaindre ne kwe mä rabadrete nire ye nitre testiko Jehovakwe raba driere mäi Bibliabiti.