KUKWE TÄRÄ KWATABÄTÄ: TÖBIKAKWE DIANDREKÄ ÑO JA TÖITE
Töbikakwe ni mräkä yebätä
Janet tä niere: “Ti rün krütaba ye bitikäre kä rikaba braibe ta ye ngwane, meri mada nämä ti mukobe nieba kwe tie. Käbube kä mikakaba gwi kwe, ja tribe jänrikaba kwe aune ti tuametreba kwe monsotre kia nibu yebe”. Sribi kwani Janet ie, akwa ngwian ñaka namani nemen debe jondron jökrä kökakäre ie. Akwa kukwe mada bäri tare nämene nemen barebätä. Tä niere: “Tikwe monsotre kia ngübadre kaibe aune jondron mada nuaindre ja gwirete ye nämä ti ngwen töbike krubäte. Nitre rüne mada nämä jondron kökö monsotre kwetre kräke ye erere ti ñaka nämä nuainne monsotre tikwe kräke yebätä ja rababa nemen ruin ngite tie. Nitre mada tä töbike ño tibätä aune monsotre tikwe yebätä ye täbe ti mike töbike kä nengwane. ¿Tikwe ñaka ja di ngwani nünankäre jankunu ti muko yebe nütüta kwetre?”
Janet
Orasion tä Janet dimike ja töi mike kwin aune jata nemen ruin bäri Ngöbö ken ie. “Dibire bäri tita nemen ulire. Kätä kite titibe ye ngwane, kukwe ñaka kwin ye aibe tä kite ti töite. Tita orare aune ñäke Bibliabätä ye tä ti dimike kübien. Filipenses 4:6 aune 7 ye nemen tuin bäri kwin tie, tä niere: ‘Munkwe ñan töbika ngwarbe dikaro, akwa munkwe blita Ngöböbe jakrä amne, kukwe jökrä mike gare ie munkwe amne, ja di käräre kwärä munkwe kuin nie Ngöböye arato. Munkwe nuendre kore angwane, Ngöbökwe kä jäme jakwe mikadi mun motobtä. Kä jäme Ngöbökwe abko ñan rükadre gare jire ni kä nebtäye. Kä jäme biandi Ngöbökwe munye, ye käkwe mun moto amne mun töi ngibiadibti’. Ruäre ngwane tita orare dibire nükebe kä ngwen, aune Jehovata ti töi mike jäme.”
Jesukwe Kukwe Kädriebare Ngüdrebiti Kuin ye ngwane, blitabare kwe orasion yebätä ye raba ni dimike kukwe ruäre tä ni mike töbike ye ngwane. Niebare metre kwe: “Munta dre dre mdei nike, ye mun ngämi kärere mun Rünye, ye känenkri tärä nebe gare ie” (Mateo 6:8). Akwa, nita dre ribere jai ye nikwe ribedre Ngöböi ye tä nemen ngübare nie. Orasion yebiti metrere nita nökrö Ngöbö ken ye nikwe ngwandre törö jai. ¿Ye köböire dre rabai nikwe? Biblia tä niere: “Ngöbökwe krötadi känime mun ken” (Santiago 4:8).
Orasion ye ñaka tä ja driekäre jerekäbe Jehovai. Niara ye “orasion Kukwe Nuaka” yebätä nire tä tö ngwen ie ye niara tä ngübare arato (Salmo 65:2). Ye medenbätä, nitre ja tötikaka Jesukwe “ñan di krütadre blitabtä Ngöböbe” driebare kwe ietre (Lucas 18:1). Ngöbökwe ni jie ngwandre aune ni dimikadre ye nikwe ribedre käre ie, ni kukwe nuai kwe yei nikwe tö ngwandre. Niara tö ni dimikai aune nuaindi kwe yei nikwe tö ngwandre käre. Nikwe orasion nuaindi käre angwane, nita tö ngwen Ngöböi aune nita tödeke ie ye nikwe bämikai (1 Tesalonicenses 5:17).
¿TÖDEKATA YE NGWANE DRE DRE NUAINTA?
Nikwe tödekadre Ngöböi yekäre nikwe niara mikadre gare kwin jai (Juan 17:3). Nita ja tötike Bibliabätä ye ngwane, niara ye ño aune töita ño ye tä nemen gare nie. Ye abokän, niara töita ni itire itirebätä ye tä nemen gare nie. Akwa Ngöbö rabadre gare jerekäbe nie ye ñan aibe ngörä. Nikwe niara mikadre gare jai ja ketamuko bäri kwin ye erere. Ni ñaka raba ja kete kwin drekebe ngwarbe ni madabe; kätä niken raire ta ye ngwane nita nemen ja kete kwin ni yebe. Ye erere arato, nita Ngöbö mike gare bäri kwin jai, dre tuin kwin ie ye nita nuainne aune tä ni dimike ye tä nemen gare nie ye ngwane nita kite tödeke bäri aune tö ngwen bäri ie (2 Corintios 10:15; Juan 8:29). Janet tä tödeke ye erere, ye köböire tä töbikakwe ye denkä ja töite.
Janet tä niere: “Jehovata nun ngübare ye tä ti dimike tödeke bäri. Kukwe ñaka kwin rababa bare nunbätä yebätä kä ñaka rükai nunye rababa ruin nunye. Tikwe oraba bä kabre ye bitikäre, Jehovakwe nun dimikaba kukwe yebätä. Tita orare batire batire debe biankäre ie ye ngwane, dre dre nuainbarera kwe ti kräke yebätä tita töbiketari. Nita ja di ribere ie ngwane tä ni dimike; ruäre ngwane, tä ni dimike drekebe ngwarbe. Ja ketamuko kwin bianina kwe tie arato, nitre ye ni kristiano metre abokän tätre käre juto ti dimikakäre aune tätre kukwe kwin bämike monsotre tikwe käne. *
”Ja tuanmetreta ye ñobätä tuin blo Ngöböi nieta Malaquías 2:16 yekänti ye nüke gare matare tie. Ni muko tä nemen ni madabe ye tä nemen tare krubäte nie. Kä nikanina kabre ta, akwa ruäre ngwane jata nemen ruin ulire tie. Jata nemen ruin kore tie ngwane, tita ja töi mike jondron nuainne ni mada kräke, köböire tita kukwe ye käi kwitekä jabiti”. Ye köböire Janet ñaka ja denkä mento, nieta Bibliakwe ye erere (Proverbios 18:1). *
Ngöbö abokän “nitre rün ñakare ye rün aune meritre kän muko krütani ye kriemikaka”. (Salmo 68:5)
Janet tä niere: “Ngöbö ‘ye nitre rün ñakare ye rün aune meritre kän muko krütani ye kriemikaka’ ye tä ti töi mike metrere jäme. Niarakwe ñaka nun tuainmetre jire, ti muko käkwe nuainbare ye erere” (Salmo 68:5). Ngöbö ñaka ni nuinte kukwe blo yebiti, ñakare aune tä ni mike töbätä aune tä ja “di kri” bien nie kä ngwankäre nüke jai ye gare Janet ie (Santiago 1:5, 13; 2 Corintios 4:7).
Akwa ¿kukwe tare raba nemen bare nibätä ye tä ni ngwen töbike ye ngwane dre nuaindre?
^ párr. 9 Mäkwe ñäkä 1 Corintios 10:13 aune Hebreos 4:16 yebätä.
^ párr. 10 Täräkwata ¡Despertad! julio 2015 suliare yebätä kukwe kädekata “Recupere el control de su vida” yekänti kukwe mikata gare abokän raba mä dimike töbikakwe ye denkä ja töite, tärä www.pr418.com yete arato.