BIBLIA TÄ MIKE GARE: “Kä rükai näre nitre jökrä tä dobote ngwanta törö jai, yei niara [Jesús] kukwei juruai aune jataita kä merebiti” (Juan 5:28, 29, TNM).

Jesukristo rabai gobrane kä ja känenkäre yete angwane, nitre krütani ñaka rabaira dobote niebare kwe. Fernando kädrieni kukwe käne yebätä ye kätä niere: “Tikwe ñäkäba Juan 5:28, 29 yebätä ye ngwane ti töi rababa ñan krütare. Kukwe käbämikata ye metre rababa gare tie, yebätä ti jataba tö ngwen kukwe kwin ie ja känenkäre”.

Ja känenkäre kä rükai näre angwane Ngöbökwe Job mikaita nire yei nämene tö ngwen. Job käkwe ngwanintari: “Ni krütadre angwane, ¿ni raba nüketa nire?”. Aune niara arabe käkwe niebare metre: “Köbö kwatire kwatire sribi ribeta ja dibiti tie ye jökrä te tikwe ngübadi, nememe ti diandretari ye näire. Mäkwe ti kärädi, aune tikwe ñäkäi mä käre” (Job 14:14, 15).

Nitre krütani gaikröta ye nämene gare Marta Lázaro ngwai yei. Lázaro krütani ye bitikäre, Jesús niebare Marta ie: “Mä ngwai rükaita nünenta”. Aune Marta niebare ie: “Niara rükaita nire [...] kä ja ken ngwane, gare tie”. Angwane Jesukwe niebare ie: “Ti abrä ni mikakata nire, aune ja nire bianka arato. Nire tä tödeke tibiti, yebrä gataira, akwa nünandita kwe” (Juan 11:23-25, Ngöbö Täräe, tärä okwä ükaninte). Ye bitikäre, Jesukwe Lázaro ganinkröta. Dre rabai bare ja känenkäre ye ni raba bämike ja töite kukwe kwin krubäte kädrieta ne köböire. Nitre kwati kä jökräbiti tibien gaikröta, ¡ye käi rabai juto krubäte nibätä!

BIBLIA TÄ MIKE GARE: Nitre ni kwä ganinkröta kädrieta Bibliakwe ye erere Jesukristo ganinkröta, akwa ñaka namani bare ja erebe. Ñobätä ñan aune nitre ni kwä ye ganinkröta Kä tibienbätä. Akwa, Jesukristo ganinkröta yebätä Biblia tä niere: “Nikaninta kä käinbti amne tä [...] Ngöbö küde ruenkri” (1 Pedro 3:21, 22). ¿Jesukristo aibe gaikröta nünankäre kä kwinbiti? Ye känenkri käbämikani kwe nitre ja tötikaka kwe ie: “Ti näinta kä ükete munkrä, yebti ti jatadita mun tuenta, kä näin mun ngwena jabe angwane, ti tädi ti Rün känti, ye känti mun tädi ketetibe tibe” (Juan 14:3).

Jesukristo nikani kä kwinbiti aune kukwe ükaninte kwe nitre ja tötikaka kwe ruäre ka ngäbitikäre. Biblia tä mike gare ye erere, nitre 144,000 näin kä kwinbiti (Revelación [Apocalipsis] 14:1, 3). Akwa, ¿nitre kristiano ye käkwe dre nuaindi yete?

 Erametre, sribi rabai krubäte nuaindre ietre. Biblia tä niere: “Nitre rükabata nire kore, ye abko deme amne ni yebtä kä rabadi nuäre kri. Niaratre ñan krütadre mda, ye abko Ngöbökwe ñan mikadi ja ngie nuen akwa, nünandi kärekäre kwetre Ngöböbe angwane, ni blitaka Ngöböbe ni mda mda diäre tä sribire, ye kwrere sribidi kwetre Ngöbökrä amne Kristokrä amne gobrandi kä mili krati kwetre ben gwaire arato” (Apocalipsis 20:6). Nitre jökrä ye rabai reire aune sacerdotere, aune Jesube gwaire gobrandi kwetre Kä tibien ye jökräbiti.

BIBLIA TÄ MIKE GARE: Pablo kukwe niebare ye tä tikani krörö Bibliabätä: “Tita tö ngwen Ngöböi, kukwe ie tita tö ngwen ne arabe ie niaratre tätre tö ngwen arato, nitre kukwe metre nuainkä aune nitre ñaka kukwe metre nuainkä krütanina ye gaikröta” (Hechos 24:15, TNM).

¿Nitre “kukwe metre nuainkä” ye abokän nire nire? Ni iti “kukwe metre nuainkä” kädeka nämene Daniel yebätä ani töbike. Niara Ngöbö kukwei niekä käkwe ja ngwani metre ie Ngöbökwe niebare: “Mäkwe ja dükai, akwa köbö rükai yete jondron kwin nuaindi mä kräke ye näire mä rükaita krö” (Daniel 12:13). ¿Medente Daniel gaikröta? Biblia tä mike gare: “Nitre kukwe metre nuainkä yekwe kä tibien rabai, aune nünandi kärekäre te kwetre” (Salmo 37:29). Ne madakäre, Jesukwe niebare: “Nire nire ñan tä bike kri ni mda mda okwäbti abko Ngöbökwe die mikadi amne kä rabadi nuäre btä, ñobtä ñan angwane Ngöbökwe kä temen ne biandi ie” (Mateo 5:5). Daniel aune nitre mada Ngöbö mikaka metre täte ye gaikröta nünankäre Kä tibienbätä, aune rabai nüne kärekäre yete.

¿Aune nitre “ñaka kukwe metre nuainkä” ye abokän nire nire? Ye nitre kwati krubäte krütani abokän ie kukwe Bibliabätä ye ñaka namani gare aune ñaka nuainbare kwetre. Nitre ye gaikröta angwane, nire abokän Jehová * bätä Jesukristo ye rükai gare ietre, aune rabaitre tarere (Juan 17:3). Nire nire käkwe ja töi mikai Ngöbö mike täte, ye käkwe nünain kärekäre Jehová ye erere.

BIBLIA TÄ MIKE GARE: Ngöbökwe “niaratre okwä ñöi sökadite jökrä ietre amne ni ñan krütadre jire iti mda amne ñan ja müaidre jire chi mda amne ñan ja müaidre ja tare nikabtä, ñobtä ñan angwane kukwe nämane ükaninte ño känekäne, erere nikanina jökrä ta” (Apocalipsis 21:4). “Niaratre ju sribedi, aune nünain te kwetre; niaratre uva nökai aune ngwä kwetai kwetre” (Isaías 65:21).

Nikwe nünandre kä ye erere te ni mräkätre tare nikwe gaikröta yebe ye bämike ja töite. Akwa kukwe ngwantarita tä keteiti mikadre gare jai: ¿nitre gaikröta ye ñobätä ni raba mike era jai?