Nitre krütani gaikröta ye mikadre era jai angwane ni töi ñakare nitre ruäre raba nütüre. Apóstol Pablo töi ñaka nämene ye erere, ñobätä ñan aune niebare kwe: “Nikwe nünandre kä nebtä aibe kräke nita tödeke Kristobti ne ngwane, ni jökrä ngätäite, ni abko bäri bobre jakän. Akwa Ngöbökwe Kristo mikaninta nire, ye abko era bkänä amne, Ngöbökwe nitre tödekaka Jesubti krütanikrütani mikadita nire bkänä, abkokäre Jesu mikaninta nire ni jökrä tödekaka niarabti ye känenkri” (1 Corintios 15:19, 20). Nitre krütani gaikröta ye nämene tuin kukwe metre ye erere Pablo ie. ¿Ñokänti kukwe ye metre nämene gare ie? Jesús ganinkröta yebätä kukwe ye metre nämene gare kwin ie (Hechos 17:31). * Ye medenbätä, Jesús “mikaninta nire ni jökrä tödekaka niarabti ye känenkri” niebare kwe, ñobätä nan aune ganinkröta käne nünankäre kärekäre. Jesús ganinkröta käne ye tä mike gare nie nitre mada gaikröta arato.

Nitre krütani gaikröta yei ni raba tö ngwen metre kukwe madabätä: Ngöbö Jehová kukwe metre niekä ye abokän “ja kukwei kite ñakare temen” (Tito 1:2). Niara ñaka ni ngökö jire aune ñaka nuaindi kwe. Ye medenbätä, Ngöbö ñaka raba nitre krütani gainkröta aune die ñaka nuainkäre angwane, ¿raba kukwe ye käbämike raba ruin mäi? Niara ñaka raba ye erere nuainne jire.

Ni tare Jehovakwe, yebätä ja töi mikani kwe nitre krütani ye gainkröta. Job kukwe ne ngwanintari: “Ni krütadre angwane, ¿ni raba nüketa nire? Mäkwe ti kärädi, aune tikwe ñäkäi mä käre. Mäkwe jondron sribebare ja kisebiti yebätä mä töi rabai krubäte” (Job 14:14, 15). Job Rün kä kwinbiti tö rabadi niara gaikröta ye nämene gare metre ie. ¿Ngöbö töi täbe ye erere? Biblia tä mike gare metre: “Ti abokän Jehová; ti ñaka ja töi kwite” (Malaquías 3:6). Ye erere, Jehová töi täbe nitre krütani ye gaikröbätä ne kwe rabadre nüne kä jutobiti. Ni rüne kän monso krütani tö ye  erere ie. Akwa Ngöbö ñaka töita jerekäbe ye nuainbätä, ñakare aune die tärä nuainkäre (Salmo 135:6).

Jehovakwe ja di biain Jesuye nitre krütani ye gakrökäre, nire nire kän mräkä tare krütani yebätä kä rabai juto krubäte. Ne madakäre, ye käi juto Jesubätä arato. ¿Ñokänti gare nie? Niara jämi ja ketamuko kwe Lázaro gainkröta ye ngwane, “müaba[re]” kwe ñobätä ñan aune Lázaro ngwaitre aune ja ketamuko kwe nämene ulire krubäte ye namani tuin bobre ie (Juan 11:35). Köbö mada ngwane, meri kän muko krütani ye monsoi itibe krütani kän ye ngwane “namani ruentari tare kri Jesuye, käkwe niebare ie: Ma bobre, ngäbäkre krüta tare makän ne abko, akwa makwe ñan müai jakän”. Ye bätärabe, monso ye ganinkröta kwe (Lucas 7:13). Kukwe ye tä mike gare nie ni mräkä tä krüte ye tä ni mike ulire krubäte ye nemen tare krubäte Jesús ie arato. Ye medenbätä, kä rabai juto Jesubätä nitre krütani gakrökäre ne kwe nitre ñaka rabadrera ulire, ñakare aune kä rabadre juto bätätre.

¿Mä mräkä tare mäkwe krütanina mäkän? Nitre tä krüte ye nikwe ñaka tuaita mä raba nemen nütüre. Akwa, Ngöbökwe nitre krütani ye gaikröta aune sribi ye mikani kwe Jesús kisete. Ngöbö tö mä tuai yete ne kwe mäkwe mä mräkätre ye kadre ngäbiti ye mäkwe ngwan törö jai. Mä tädre kukwe ükete bentre jondron nuainkäre kä ja känenkäre yete ye bämike ja töite, kä yekänti mun täi kärekäre jabe.

Lionel, kädrieni kena tä niere: “Nitre krütani gaikröta ye ni iti käkwe nieba kena tie angwane, ñaka rababa tuin metre tie aune nämä ti ngökö rababa ruin tie. Akwa kukwe ye metre rababa gare Bibliabätä tie. ¡Ti tö ti ruai tuaita!”.

¿Mä tö kukwe mada mikai gare jai? Nitre krütani gaikröta ye gare metre nitre testiko Jehovakwe ie, kä rabai juto bätätre kukwe ye mikakäre gare mäi Biblia yebiti. *