KUKWE TÄRÄ KWATABÄTÄ
¿Nire abokän nitre testiko Jehovakwe?
“Mekerabe Mike gare tie. Niara testiko Jehovakwe, aune kukwe mikata täte kwe ye käre tä ti mike töbike krubäte. ¿Nire abokän Jehová? ¿Ñobätä nitre Testiko ñaka bieta käi ngwen juto jabätä? Mike nämä kukwe ngwarbe mike täte nämä ruin tie.” (Becky, nünanka California, Estados Unidos)
“Nitre nünanka ti bäre ye jataba ja tötike Bibliabätä nitre testiko Jehovakwe ben, aune tikwe nütüba: ‘¡Kukwe mikata täte kwetre ye kä jene! ¿Dre gärätä rä?’” (Zenon, nünanka Ontario, Canadá)
“Nun ñaka nämä niken iglesiate yebätä ja nämä ruin ngite nunye, yebätä nitre testiko nämä nüke kraire nunbätä ti aune ti muko nämä nemen nütüre. Ne madakäre nun tö nämä kukwe mikai gare jai ye mika ñaka nämä gare nunye kukwe keta kabre drie nämä yekänti, nitre testiko nämä kukwe ngwarbe jene mike täte yebätä bäri ñaka mikai gare nunye nun nämä nütüre.” (Kent, nünanka Washington, Estados Unidos)
“Erametre, niaratre ye abokän nire nire aune kukwe meden mika nämä täte kwetre ye ñaka nämä gare jire tie.” (Cecilie, nünanka Esbjerg, Dinamarca)
Mä tärä tuin kukwe driere ju ju te aune ji ngrabare, täräkwata mikete aune ja tötika Bibliabätä driere nitre madai raba ruin nunye. Täräkwata tä mä kisete ye niaratre käkwe mikaninte mäi raba ruin nunye. Akwa nitre kädrieni kena käkwe kukwe ngwanintari jai ye erere mä töita raba ruin nunye, erametre nire abokän nitre testiko Jehovakwe.
Mä tö kukwe ngwaintari o kukwe ruäre mikai gare jai nitre testiko Jehovakwe yebätä angwane, ¿mä raba dre nuainne? ¿Kukwe meden mikata täte kwetre, sribi nuainta kwetre aune ju ja ükarakrö ye ütiä bianta ño kwetre, ñobätä tätre niken ju ju te o tätre blite ji ngrabare mäbe ye medente mä raba mike gare jai?
Cecilie, kädrieni käne, tä niere: “Tikwe ñäkäba kukwe kabrebätä Internet yete nitre testiko Jehovakwe yebätä. Kukwe keta kabre kädrie nämä ti olote aune nie nämä niaratre yebätä, ye käkwe ti töi mikaba ñaka töbike kwin niaratre yebätä”. Akwa blitabare kwe nitre Testiko yebe angwane, kukwe ye namani gare metre ie.
Mä törba kukwe mikai gare bäri jai nitre testiko Jehovakwe yebätä angwane, mä raba ngwentari ietre. Tätre täräkwata ne sribere aune mätä kukwe ngwentari ye niaratre aibe raba mike gare metre mäi (Proverbios 14:15). Niaratre ye abokän nire nire, tätre kukwe meden mike täte aune tätre dre dre nuainne ye mikai gare mäi ja känenkäre.
