“Kukwe jökrä Tikani yebätä Ngöbökwe ja töi mikani aune kwin krubäte ni tötikakäre” ye nun testiko Jehovakwe tä mike era jai (2 Timoteo 3:16, TNM). Nunta Biblia yebiti ja tötike Ngöbö ni Sribekä yebätä, aune ja jie ngwankäre nüne kwin arato.

Biblia tä niere: “Ne kwe rabadre gare nitre jökrä ie mä kä Jehová; mä aibe Kri kä tibien ye jökräbiti ta” (Salmo 83:18). Ye medenbätä nunta Ngöbö Jehová ye aibe mike täte. Ne madakäre, nun testiko kwe yebätä nunta ja di ngwen niara kä ye mike gare (Isaías 43:10-12).

Nun abokän kristiano aune Jesús ye “Ngöbö Monsoi” * ye nunta mike era jai, aune niara nükani Kä tibienbätä aune namani Mesías erere (Juan 1:34, 41 Ngöbö Täräe [NGT], tärä okwä ükaninte; 4:25, 26). Jesús murie ketani ye bitikäre, ganinkröta aune nikaninta kä kwinbiti (1 Corintios 15:3, 4). Ye bitikäre, mikani Reire Gobran Ngöbökwe yete [Apocalipsis] 11:15). Gobran ye abokän ükaninante aune ye käkwe Kä tibien kwitaita bä nuäre (Daniel 2:44). “Nitre töi jäme yekwe kä tibien rabai, aune kä jäme krubäte yete ja rabai ruin kwin krubäte ietre”, käbämikata Bibliakwe (Salmo 37:11, 29).

Kukwe nieta Bibliakwe ye raba nitre dimike kä nengwane ye gare nun testiko Jehovakwe ie (Isaías 48:17, 18). Ye medenbätä, tä dre niere ye nunta ja di ngwen mike täte. Ñodre, nikwe ñaka ja ngrabare aune ja töi ye mikadre käme nieta Bibliakwe, yebätä nun ñaka sö duin aune droga duin (2 Corintios 7:1). Biblia tä kukwe ñäkäire metre ta ye nun ñaka nuainne arato, ñodre, nun ñaka dröbanike, ja mike gure ngwarbe aune gore (1 Corintios 6:9-11).