KUKWE TÄRÄ KWATABÄTÄ: ¿NIRE ABOKÄN NITRE TESTIKO JEHOVAKWE?
¿Sribi nuainta kwetre ye tätre ütiä bien ño?
Kä kwatire kwatire te nunta Biblia aune tärä bätä täräkwata imprimire aune döräire millon kwati krubäte. Nunta sukursal sribere aune máquina imprimikäre yebiti tärä sribere kä jökräbiti tibien. Kukweta ükaninte kwin nunkwe konkrekasion kwati krubäte te aune ju sribeta ju mada ye kwrere te nunta ja ükökrö ye nunta kädeke Ju ja Ükarakrö. ¿Nireta jondron jökrä ne ütiä bien?
Ngwian bianta ja töi jeñebiti yebiti sribi jökrä nuainta ye ütiä bianta (2 Corintios 9:7). Kä 1879 ye ngwane, täräkwata ne kädeka nämene Zion’s Watch Tower sribebare ketebukäre ye käkwe niebare: “JEHOVÁ diebiti [täräkwata ne] sribeta ruin nunye, aune niara diebiti sribe tädi angwane ñaka ngwian kärädi jire kwe nitre ie sribekäre”. Nun töi täbe ye erere, nükebe kä nengwane.
Ngwian biandre ye juan raba sukursal nunkwe yekänti o kita raba kajate Ju ja Ükarakrö yete. Nun ñaka diezmo kärere, ngwian ükökrö aune nunta gätäre bätä nunta täräkwata mikete ye nun ñaka ütiä kärere jire. Nunta kukwe driere, dirire konkrekasionte, aune ju ja ükarakrö sribere ye ütiä bian ñaka nunye. Jesús niebare erere: “Tikwe bini ngwarbe munye [...], munkwe ñan ütiä kärä arato (Mateo 10:8). Nitre jökrä tä sribire oficina bäri kri yete aune sukursal yete yei sribi ütiä bian ñaka jire, Nitre Braibe Konkrekasion Jökrä Ngübabitikä yei sribi ütiä bian ñaka arato.
“Nitre testiko Jehovakwe tätre sribi nuainne ye jökrä tätre nuainne töi jeñebiti, itire itire töta nemen ‘ngwian biain’ nuäi aune ñongwane raba bien ye ererebätä tätre nuainne.” (Tribunal Europeo de Derechos Humanos, 2011)
Ngwian bianta yebiti nitre mada dimikata arato kukwe tare tä nakainkä ye ngwane. Nitre kristiano siklo kena ye nämene nitre mada dimike töi kwinbiti kukwe tare nämene nakainkä bätätre ye ngwane (Romanos 15:26). Ye erere arato, kukwe tare tä nakainkä kätä ju juen ngwarbe nitre madakän ye nunta dimike sribekäreta, nunta mrö, dän aune kräkä bien ietre. Arato Ju ja Ükarakrö juanta ngwarbe ye nunta üketeta.
Ne rabai tuen kwin mäi arato
NI MIKAKA MOKRE (TÄRÄKWATA JA TÖTIKARA)
¿Nitre tä ja tuin kukwe tare ben ye ni raba dimike ño?
Nitre testiko Jehovakwe tä sribi Ngöbökwe nuainne kä jökräbiti tibien ye kräke ngwian bianta, ngwian yebiti nitre tä jondron ribere jai dimikata ño metrere aune kukwe ja üairebiti ye mäkwe mika gare jai.
¿Ni raba ngwian bien ño ja töi jeñebiti internet yete?
Ngwian bian raba ño töi jeñebiti ye raba nemen gare mäi.
