Ti därebare Acul, kä tokwä nemenkä mente kädrikri Guatemala yekänti. Ti mräkätre ye nitre ixiles, nitre ye kite nitre maya yekri. Blita gare suliare tie, akwa blita namani gare tie ti kukwei yebiti arato. Nitre ja käite arabe nämä rüre jabe ye näire ti jataba nirien, rü ye nuaba kä 36 te. Rü yete nitre ixiles kwati kämikani.

Kä nämene kobokä tibiti, ti eteba abokänbiti kä nämene kwä kükü angwane, mämene jadenkä bomba yebiti abokän betaninkä kisete. Ye köböite, ti okwä nikani ngwarbe aune ti eteba krütani. Yete ja käne, ti ngübabare ju nitre kä drüne okwäte kräke yete Juta Guatemala abokän känti tärä okwä braille ye namani gare tie. Ñobätä nitre sribikä yete ñaka tö nämä ti tuai blite monsotre madabe aune ñobätä monsotre ye ñaka tö nämä ja ketai tibe ye ñaka rükaba gare jire tie. Käre ti nämä kaibe, sö krobu ti mikate nämä ti meyebe ye köböi rükadre jötrö ti nämä ngübare, ti nämä tare krubäte ti meyekwe. Akwa, kä rababa 10 tibiti angwane krütaba. Ti rababa ulire krubäte, ñobätä ñan aune niara aibe nämä ti tarere.

Kä rababa 11 tibiti angwane, ti rikabata nüne ti etebakrä aune mräkä kwe yebe. Ti nämä dre ribere jai ja ngrabare kräke ye bianba kwetre tie, akwa kukwe nämä ti mike töbike yebätä ti dimikaka ñaka nämä jire. Ruäre angwane ti nämä niere ja dibiti Ngöböi: “¿Ñobätä ti meye krütani? ¿Ñobätä kä namani drüne ti okwäte?”. Kukwe tare nämä nakainkä tibätä ye erere ie Ngöbö töi nämä nitre nämä niere tie. Yebätä Ngöbö ye ñaka kukwe metre nuainne aune kukwe käme krubäte nuainkä ti nämä nütüre. Ti rabadre akräke, tikwe ja murie ketadre.

Ti okwä nikani ngwarbe yebätä ti rababa ruin ñaka kriemikani tie, ja ngrabare aune ja töi yebiti. Ti nämä chi ngwane nitre mada küdreba bä kabre tibätä. Nitre küdrebare tibätä ye tikwe ñaka driebata jire, ñobätä ñan aune ñaka rabai ütiäte nitre mada kräke ti nämä nütüre. Nitre ñaka nämä blite jire tibe. Ti nämä ulire aune ti ñaka tö nämä ja tuai nitre madabe, ñobätä ñan aune ti ñaka nämä tö ngwen nitre madai.

Kä rababa 13 tibiti ye ngwane, nitre gure testiko Jehovakwe käkwe blitaba tibe kwelate recreo yete.  Niaratre jatadre tikänti ye meri iti dirikä kwelate käkwe ribebare ietre, dirikä yei ti nämä tuin bobre krubäte. Nitre okwäte kä drüne yei kä rabaita tuin aune nitre krütani ye gaikröta Biblia tä käbämike nieba kwetre tie (Isaías 35:5; Juan 5:28, 29). Ti tö nämä niaratre kukwe nuai, akwa ti ñaka nämä blite ni madabe, yebätä ti nämä nemen kwekebe. Ti töi ñaka nämä ngitiekä jötrö, akwa niaratre nämä ti dimike bätärekä aune nämä ja töi mike kwin ti kräke, aune nämä niken tikänti Biblia tä dre niere ye driekäre tie. Niaratre nämä näin kilómetro 10 kä tokwäte ta rabakäre ti nämä nüne yekänti.

Niaratre ye ño ye ti eteba käkwe bämikaba tie angwane, nitre ye bobre akwa ja ükete kwin nieba kwe tie. Ti nämä tare kwetre ye nämä gare kwin, ñobätä ñan aune nämä jondron kia kia bien tie. Nitre kristiano metre ye aibe raba ja di ngwen krubäte ye erere ye nämä gare metre tie.

Täräkwata tikani braille yebiti ti nämä ja tötike Bibliabätä. Kukwe drie nämä tie ye nämä nüke gare tie, akwa kukwe ruäre drie nämä ye ti ñaka nämä kain ngäbiti. Ñodre, Ngöbö töi nämä tibätä aune ni mada nämä ti mike tuin ye erere jai ye ñaka nämä tuin era tie. Ñobätä Ngöböta kukwe käme ye tuenmetre nakainkä ye rükaba gare tie, akwa ñaka rababa nuäre ti kräke mikakäre tuin jai ni rün ni tarekä ye erere. *

Bätärekä bätärekä, Biblia tä dre niere ye jataba nüke gare tie, ye jataba ti töi kwite. Ñodre, nita ja tare nike ye nemen tare Ngöböi rababa gare tie. Nitre niara mikaka täte ngwanta ja tare nike yebätä tä niere: “Juta tikwe ye tä ja tare nike krubäte [...] ye gare metre tie; niaratre tä ja tare nike ye gare kwin tie” (Éxodo 3:7). Ni tare krubäte Jehovakwe rababa gare tie ye ngwane, tikwe ja diankaba mento niara mikakäre täte. Kä 1998 ti ja ngökaba ñöte aune ti ja mikaba testiko Jehovakwe.

Ti ja ngökaba ñöte ye bitikäre kä rikaba kwati ta angwane, tikwe kukwe ükateba nitre kä drüne okwäte ye tötikakäre juta Escuintla yekänti. Ñaka nämä nemen nuäre ti kräke nänkäre gätäbätä Acul ye namani gare ni iti ji ngwanka konkrekasionte juta yekänti yei, ñobätä ñan aune nitre testiko gure ti tötikaka ye nämene näin kä tokwäte ta ye arabe känti ta niara nämene näin arato. Ti dimikakäre, ja mräkä meden raba kä bien tie ja gwirete aune ti dimike nemen gätäbätä ye känänbare kwe. Tätre ti ngübare mräkä kwetre ye erere nükebe kä nengwane.

Ja mräkätre mada tä ti tarere krubäte yebätä ti raba kukwe mada keta kabre kädriere. Nitre testiko Jehovakwe ye kristiano erametre abokän ngätäite tita ye gare metre tie (Juan 13:34, 35).

Ja ñaka niena ruin ngwarbe tie jondron kwin ñaka ni kräke ye kwrere; nengwane tita tö ngwen jondron kwin ie ja känenkäre. Kä drüne ti okwäte ye ñan aibätä tita töbike, ñakare aune tita kä denkä jai nitre mada dimikakäre kukwe kwin Bibliabätä mikakäre gare jai. Tita ji ngwen konkrekasionte aune tita kukwe Bibliabätä kädriere konkrekasion känime yete. Arato gätä kri nuainta yete tita kukwe kädriere ye käi juto tibätä, gätä yete nitre kwati krubäte tä ja ükökrö.

Kä 2010 yete, ti graduaba Kwela Känti Nitre Tötikata Sribi Ngöbökwe Jie Ngwankäre yete (nengwane kädekata Kwela Nitre Gobran Ngöbökwe Kukwei Driekä kräke) El Salvador yekänti. Kwela ye käkwe ti dimikani ja mräkätre dimikakäre bäri kwin. Ti ütiäte aune ti tare krubäte Jehovakwe ye nüke gare tie ti tötikani ye köböire, niara raba ni ño kärera dimike sribi kwe ye nuainkäre.

“Nita jändrän bien ni mdaye, btä käta neme bäri nuäre nibtä ni jändrän kaka ngäbti ye ngwä” (Hechos 20:35). Erametre kä juto krubäte tibätä, kä rabai ye erere tibätä ye ti ñaka nämä nütüre jire, matare ti raba nitre mada dimike ruin tie.