Erametre Ngöbö Jehová ye “ja nire bianka” (Salmo 36:9). Ye medenbätä niara arabe raba ja nire bienta nitre krütanina yei arato. Ye erere nuaindi kwe ja känenkäre Biblia tä mike gare metre nie. (Mäkwe ñäkä Hechos 24:15 yebätä.) ¿Ñobätä Ngöbö tö nitre krütanina ye gaikröta?

Ngöbö ni Sribekä ye tö namani ni tuai nüne kärekäre (Génesis 1:31; 2:15-17). Aune niara töi täbe ye erere. Nita nüne ño ye tä nemen tare ie: nita nüne kä braibe te aune nita ja tuin kukwe keta kabre tare ben. (Mäkwe ñäkä Job 14:1, 14, 15 yebätä.)

¿Ngöbökwe ni sribebare nünankäre kä kwinbiti? Ñakare. Niarakwe angeletre ye sribebare nünankäre kä kwinbiti, aune ni sribebare kwe nünankäre Kä tibienbätä (Génesis 1:28; Job 38:4, 7). Kukwe ne ererebätä, Jesukristo käkwe nitre ganinkröta yebätä töbike. ¿Nitre ye ganinkröta medente? Nete, Kä tibienbätä. Aune ye erere rabai bare nitre kwati gaikröta ja känenkäre yebätä: nünandi kwetre Kä tibienbätä. (Mäkwe ñäkä Juan 5:28, 29; aune 11:44 yebätä.)

Akwa, Ngöbökwe nitre braibe dianinkä ne kwe rükadreta nire kä kwinbiti, yete niaratre ngrabare ye rabai üaire (Lucas 12:32; 1 Corintios 15:49, 50). Nitre braibe ye käkwe gobrandi Jesukristo yebe Kä tibien ye jökräbiti. (Mäkwe ñäkä Revelación [Apocalipsis] 5:9, 10 yebätä.)