Biblia ye bäri ütiäte tärä mada dirikäre ye kräke. Tärä mada ñaka Biblia erere käkwe nitre töi mikanina kukwe mike era jai kä kwati krubäte te. Ne madakäre, Biblia ye tuaninte bäri ne kwe kukwe blo kwandrebätä aune ja mikani krubäte rüere.

Ñodre, nitre ja tötikaka kukwe nebätä tä niere, Biblia kä nengwane ye copiabare kena ye ererea ñaka gare metre. Profesor iti ja tötikaka kukwe nebätä käkwe niebare: “Kukwe metre tikani kena ye jökrä niena nikwe ya ye ñaka gare nie. Copia kwanina keta kabre ye jökrä blo. Copia ye ruäre nuainbare kä nikani kwati krubäte ta kukwe Ngöbökwe tikani kena ye kräke aune ñaka ja erebe”.

Nitre kukwe mada mikaka täte abokän tä niere, texto Bibliabätä ye kwitani jene. Ñodre, Faizal abokän mräkätre kwe ñaka ja mike kristiano ye ngätäite ririabare. Biblia ye tärä deme, akwa kwitani jene driebare ie. Faizal tä niere: “Ye köböite nitre tö nämä blitai Bibliabätä tibe ye ti ñan nämä mike era jai. Biblia nämä kwetre, akwa ñaka Biblia metre ai”.

¿Akwa Biblia kwitani o ñakare ye ai ütiäte ya? Töbike kukwe nebätä: kukwe kwin käbämikata Bibliabätä nie ja känenkäre. Kukwe ye ñan nämäne tikani kena ye erere rabadre ruin mäi ngwane, ¿mä raba tö ngwen ie? (Romanos 15:4). Nengwane Bibliata nikwe ye ñaka tikani kena ye erere akräke, ¿mä raba ja jie ngwamana ie sribibätä, mä mräkä o Ngöbö mikadre täte yebätä?

Biblia tikani kena ye ñaka niena, akwa copia dianinkä keta kabre yebätä ni raba kukwe känene. Copia ruäre abokän nuainbare kira. Biblia tika nämäne jondron niken ngwarbe jötröbätä, ¿akwa ñobätä täbe nengwane? Ja mikani rüere aune kwita tö namani jene, ¿akwa ñobätä ñaka ganinte? Kukwe ye rabadre gare mäi, ¿ye ñobätä raba mä dimike tö ngwen Biblia tä nengwane ye ie? Kukwe jene jene yebiti ta Biblia täbe nengwane kädriei jatäri, yete kukwe ngwantarita ne rabai gare mäi.